Kazu Jose Luis Guterres Hahu Hosi Ne'ebé?

nuno rodriguez TCHAILORO
Kazu Vise Primeiru Ministru Jose Luis Guterres hahu sai ba publiku iha fulan Fevereiru 2008 bainhira Bankada Fretilin levanta kazu uza osan estadu ba benefisiu pesoal iha plenaria Parlamentu Nasional. Bainhira kazu ne'e foti iha Parlamentu Nasional membru Parlamentu Nasional husu ba Bankada Fretilin atu hatudu faktus no provas.

Iha loron 8 fulan Abril, deputada Ilda Conceicão levanta kazu ne'e iha Parlamentu Nasional. Tuir komunikasaun imprensa ne'ebé Fretilin haruka ba media katak Jose Luis Guterres ne'ebé uluk asumi kargu nudar ministru negosiu estranjeiru transfere osan liu hosi Ministerio Finansas ba nia kaben iha Nova Yorke. Tuir karta ne'ebé Ana Maria, Jose Luis Guterres nia kaben haruka ba Vise Ministra Negosiu Estranjeiru iha tempu ne'eba hateten katak Ministerio Finansas halao transferensia ba nia konta pesoal iha loron 24 de Novembru 2006 hamutuk $ 10,673.33 ba primeiru trimester, $ 8.005 iha loron 11 Janeiru 2006 ba segundu trimester no iha loron 11 Abril hamutuk $ 18.667.14 ba terseiru trimester.

Bainhira Mari Alkatiri rezigna an hosi Primeiru Ministru, Ramos Horta nudar Primeiru Ministru foun husu Ambaxador Timor-Leste iha Estadus Unidus Jose Luis Guterres atu sai nudar ministru negosiu estranjeiru. Jose Luis Guterres simu kargu ne'e no fila mai Timor, maibe nia kaben Ana Maria no nia oan mane Paolo Guterres (21) no oan feto Niara Guterres (16) kontinua hela iha Nova Yorke.

Vise Primeiru Ministru Jose Guterres hateten ba kla'ak katak Ramos Horta rasik mak hateten estadu sei tau matan ba nia familia ne'ebé kontinua hela iha Nova Yorke. Tuir Deputadu Estanislao da Silva ne'ebé uluk mos asumi kargu nudar primeriu ministru hateten ba kla'ak katak estadu tau matan duni hodi kontrata nia nudar funsionariu lokal. Funsionariu lokal iha Nova Yorke fulan-fulan simu $ 2800.

Ana Maria la kontrata nia hanesan funsionariu lokal maibe sai nudar diplomata. Tuir karta ne'e rasik mos Ana Maria hateten katak maski nia hetan pasaporte diplomatiku maibe nia rasik laiha direitu atu sai nudar sidadaun Timor Leste tamba tenki hela minimu tinan 8 iha Timor. Tamba ne'e labele klasifika nia hanesan diplomata ida. Tuir informasaun ne'ebé kla'ak hetan katak ambasador Timor-Leste iha Estadus Unidus Nelson Santos rasik la hatene mudansa hirak ne'e halao. Tansa Ana Maria bele sai diplomata no la kontratu nia hanesan funsionariu lokal?

Provedor Adjunto, Dr. Amândio de Sá Benevides, ne'ebe halao nia knar iha area boa governasaun, ba kla'ak halao entrevista iha edifisiu Provedoria Direitus Humanus e Justisa (PDHJ) iha segunda-feira 14/04 liu ba hateten katak husi PDHJ nia parte akompana informasaun konaba kazu Vise Primeiru Ministru Jose Luis Guterres nian ne'e. "Ami agora buka hela meius hotu-hotu atu bele buka dadus. Rekolla informasaun. Ami identifika ona ba ema sira ne'ebe mak atu ami bele hetan informasaun hirak ne'e. Atu nune'e bele haree posibilidade bele investiga Vise ka labele investiga. Ida ne'e mak agora ami halo hela," esplika Provedor Adjunto.

Lei fo duni autoridade ba PDHJ, atu klarifika duvidas hirak ne'e. Tanba ne'e mak Amândio de Sá Benevides husu ema hotu-hotu ne'ebe mak iha dadus bele aprezenta ba iha PDHJ hodi nune'e, PDHJ bele halo investigasaun klean liu tan ba eiz Ministru Negosiu Estranjeiru Jose Luis Guterres. "Ita hakarak atu hatene, transferensia ne'e iha baze ruma ka lae no tamba saida mak tenki halo transferensia osan hirak ne'e liu husi kontas privada. Iha tempu ne'eba iha duni fiskalizasaun konaba transferensia osan ne'e ka lae," hatutan Amândio de Sá Benevides.

Husi transferensia osan ne'e, Amândio de Sá Benevides esplika liu tan katak la'os atu buka ema ne'ebe mak ema akuza. Maibe problema osan ne'e povu nian. "Karik iha duni iregularidades ne'ebe mosu, ita buka meius hotu-hotu atu bele hadia situasaun ne'e para aban bain rua kazu hanesan ne'e labele akontese tan," subliña Amândio de Sá Benevides.

Kuandu to'o ikus mak iha duni erro katak Jose Luis Guterres ne'ebé uluk asumi kargu nudar Ministru Negosiu Estranjeiru transfere osan liu hosi Ministerio Finansas ba nia kaben iha Nova Yorke, ita bele foti asaun dixiplinar, asaun korrektiva liu husi dalan tribunal, konforme husi rezultadu. "Karik iha tendensia administrativa, tuir lei prosesu penal, iha obrigasaun atu partisipa. Atu fo hatene ba polisia, atu fo hatene Procurador Geral da Republica (PGR)," hateten Amândio de Sá Benevides.

Provedor Adjunto ba iha área boa governasaun ne'e husu ba parte ne'ebe mak halo alegasaun atu entrega dokumentus. "Ami to'o agora seidauk bele bolu vise Primeiru Ministru Jose Luis Guterres, tanba ami tenki haree didiak lai iha duni irregularidade ka lae. Tamba ne'e mak ami presiza halao kontaktu ho ministeriu finansas atu haree liu ba tamba saida mak iha transferensia. Tamba osan hotu-hotu mai husi ministeriu finansas. Depois tenki haree mos iha duni baze legal ruma ka lae," tenik Amândio de Sá Benevides.

Amândio de Sá Benevides hatutan liu tan katak maske ema seidauk hatama keixa ruma maibe tuir lei PDHJ nian katak Provedoria tenki foti inisiativa rasik atu investiga no atu rekolla dadus konaba alegasaun ruma ne'ebe mosu iha publiku nia leet. "Ema ruma, ami deskonfia katak nia halo duni abuzu de poder, ami bele toma inisiativa rasik atu halo investigasaun ba nia," esplika nia.

Akuzasaun ba Vise Primeiru Ministru aktual, Jose Luis Guterres konaba transfere osan liu hosi Ministerio Finansas ba nia kaben, Ana Maria iha Nova Yorke to'o agora sei sai hanesan misteriu ne'ebe mak sei rai iha fatin nakukun ida. PGR rasik mos seidauk hola inisiativa atu halo investigasaun konaba alegasaun ne'e. Maske nune'e membru Parlamentu Nasional husi partidu opozisaun, bankada Fretilin husu ba Primeiru Ministru, Xanana Gusmão atu hasai tiha Jose Luis Guterres husi ninia kargu nu'udar Vice Primeiru Ministru. To'o agora seidauk iha medidas ruma husi Primeiru Ministru. Maske nune'e Vise Primeiru Ministru, Jose Luis Guterres presiza esplika ba publiku alegasaun ne'e los ka lae. Kuandu Vise Primeiru Ministru nonok hela deit, ema bele foti konkluzasaun katak alegasaun ne'e los duni.

Fretilin Husu Governu Demite Jose Luis Guterres

nuno rodriguez TCHAILORO, zevonia VIEIRA
Bankada Fretilin iha loron 8 fulan Abril foti fila fali kazu Jose Luis Guterres iha Parlamentu Nasional, iha biban ne'e Fretilin mai ho provas ho evidensia.

"Iha fulan Fevereiru 2008 iha Uma Fukun Parlamentu Nasional, ami Bankada Fretilin aprezenta kazu konaba Sr. Jose Luis Guterres bainhira nia kaer kargu Ministru Negosiu Estranjeiru, momentu ne'e nia fo autorizasaun ba finansas halo transferensia salariu ida ke aas tebtebe ba nia kaben ne'ebé halo knaar iha Embaxada Timor Leste iha Nova Yorke, Bankada Fretilin konsidera kazu ne'e grave tamba ami haree involve abuzu de poder, korupsaun no nepotismu," Ilda hateten.

Bankada Fretilin hatoo nia deklarasaun hodi fo sai karta ne'ebé Ana Maria, Jose Luis Guterres nia kaben hakerek mai Vise Ministra Adaljisa Magno. Tuir karta ne'e hateten katak Ministerio Finansas halao transferensia ba nia konta pesoal iha loron 24 de Novembru 2006 hamutuk $ 10,673.33 ba primeiru trimester, $ 8.005 iha loron 11 Janeiru 2006 ba segundu trimester no iha loron 11 Abril hamutuk $ 18.667.14 ba terseiru trimester.

Tuir Vise Primeiru Ministru Jose Luis Guterres hateten katak bainhira nia simu kargu nudar ministru negosiu estranjeiru Ramos Horta rasik koalia ba nia atu lalika preokupa nia familia iha Nova Yorke tamba estadu sei tau matan. Deputadu Parlamentu Nasional hosi Bankada Fretilin Estanislao hateten: "Laiha kumprimisiu ida atu selu fali nia kaben ho salariu spesial ne'e. Tanba ne'e maka aseita altura ne'eba, Sr.Jose Ramos Horta hanesan PM, nia aseita no konkorda Sr. Jose Luis nia kaben hanesan funsionariu lokal.'Lei funsionalismu publiku nian hateten katak ema estranjeiru labele sai diplomata. Iha Ana Maria nia karta ne'e hateten katak maski nia hetan pasaporte diplomatiku maibe nia rasik laiha direitu atu sai nudar sidadaun Timor Leste tamba tenki hela minimu tinan 8 iha Timor. Tamba ne'e labele klasifika nia hanesan diplomata ida. Maski nune'e bainhira kla'ak konfirma ho Jose Luis Guterres iha nia servisu fatin hateten katak iha fatin barak ema estranjeiru halo funsaun diplomatiku hanesan uluk iha Geneva no Eric Hotung iha Asia.

Deputadu Parlamentu Nasional hosi Bankada Fretilin Estanislao da Silva hateten: "Ida, nia aseita nia kaben servisu sai diplomatika, ida fali aumenta nia kaben nia osan." Jose Luis Guterres hateten ba kla'ak katak buat hotu-hotu liu hosi prosidementu formal no la los buat ne'ebé levanta iha Parlamentu Nasional.

Estanislao hateten katak liutiha Jose Luis Guterres foti desizaun hodi foti Ana Maria nudar diplomata no hasae nia salariu Ambasador iha Estadus Unidus Nelson Santos rasik la hatene desizaun tamba ne'e nia buka klarifikasaun hosi Vise Ministru Negosiu Estranjeiru Adaljisa Magno. Bainhira Adaljisa Magno hatene kestaun ne'e nia diretamentu hapara pagamentu.

"Sr Jose Luis Guterres, nudar Ministru Negosiu Estranjeiru hatene katak nia kaben, nudar ema estranjeiru, labele hetan estatutu nudar diplomata iha Embaxada Timor-Leste nian iha Nova Yorke. Tamba sa nia foti desizaun ida ne'e? Ne'e laos kazu abuzu de poder, korupsaun no nepotismu," Ilda hateten iha konferensia imprensa ne'ebé kla'ak simu.

Tuir Estanislao katak osan hirak ne'e rasik mak uza hodi hola grand piano. Bainhira Vise Primeiru Ministru Jose Luis Guterres ba tuir konferensia iha Australia konaba boa governansia iha fulan Fevereiru, tuir radio ABC katak Jose Luis Guterres hateten nia laos ema riku no se nia la hetan servisu ba nia kaben ho salariu ne'ebé hanesan nia simu, nia ho nia oan sira sei uma laiha. Jose Luis Guterres mos kestiona tamba sa mak Fretilin hein too agora mak levanta problema ne'ebé akontese iha tempu governu uluk nian.

Iha nia intervista iha Radio ABC, Jose Luis Guterres hateten: "ida ne'e nudar solusaun temporariu, tempu ne'eba tempu krize hau tenki fila mai Timor atu servi nasaun, tamba ne'e nudar solusaun iha tempu ne'eba."

"Ida ne'e asuntu ne'ebé seriu tebes tanba kazu tranferensia osan husi fundu publiku. Fundu publiku ne'e osan estadu nian absolatamente povu nia osan", dehan Estanislao da Silva.

Deputadu CNRT Aderito Hugo hateten: "Povu iha direitu atu hatene prosesu ne'e oinsa. Ida fali maka ne'e buat ne'e los ka los tenki ba instituisaun ne'ebe kompotente para atu prosesa, se la prosesa maka ita maka hanesan ne'e deit ona."Estanislao hateten katak Fretilin sei kontinua husu ba Primeiru Ministru Xanana Gusmão atu demite Jose Luis Guterres hosi governu.

Eiz Seminarista Ne'e Hetan Alegasaun Halo Korupsaun

almerio ALVAREZ, zevonia VIEIRA
Nia ema ida ne'ebe sempre kalma no La'os ema ne'ebe nervozu. Kuandu iha meeting press, sempre hatan perguntas jornalista sira nian ho kalma no nakonu ho atensaun. Jose Luis Guterres, hahu koñese no estuda letra abc la to'o primeira klase ba eskola iha Soibada. Ho ninia deviza privadu ukun ho dame no domin depois kontinua ninia estudu iha seminari Dare to'o deit quinto ano, mai fali Liceu, to'o iha 1974.

Revoluzaun hasoru imperializmu Indonezia akontese. "Iha tempu ne'eba hamutuk apoiu movimentu independensia ba Timor-Leste, hau mos sai membru fundador iha laran mos iha Francisco Xavier do Amaral, Ramos Horta, Mari Alkatiri, Nicolao Lobato. Dezde inisiu ema barak hamutuk komesa funda ona ASDT iha 11 Setembru 1974 nu'udar sumbrina ida ba luta independensia Timor-Leste nian husi okupasaun militar Indonezia.

Luta atu ukun aan ne'e, fundador ASDT sira komesa estuda buat barak husi movimentu independenista Dom Boaventura ne'ebe hahu revoluzasaun kontra kolonializmu portugues iha 1912 no barak liu husi aktividade politika. "Iha memoria diak ida mai hau ne'ebe to'o agora hau sei lembra nafatin. Hau Francisco Xavier, Ramos Horta ami ba same atu haree Dom Boaventura atu estuda no buka esperensia husi inspirasaun Dom Boaventura," esplika Vise Primeiru Ministru ne'e ba kla'ak iha Palacio do Governu wainhira jornalista kla'ak halao entrevista esklusivu ho nia durante minutu 30 nia laran.

Jose Luis Guterres ne'ebe dau-daun ne'e hetan alegasaun husi partidu Fretilin tanba transfere osan povu nian ba ninia kaben iha Nova Yorke liu husi kontas privadu ne'e hatutan liu tan katak movimentu independensia ninia objetivu mak hakarak hametin abut, tuir tradisaun luta ba ukun aan. "Ami ba Same nudar momentu istoriku. Jerasaun 74 fo respeitu no hakarak hatutan buat ne'ebé halao tiha ona. Ida ne'e hanesan buat ne'ebe hau lembra. Halo esklarisimentu iha fatin barak," tenik Jose Luis Guterres ne'ebe iha tempu luta ba independensia nu'udar ativista ba ukun aan ne'e.

Iha tinan 1975, Jose Luis Guterres dezloka ba iha Portugal atu estuda kimika. Maibe idealizmu ne'e nia rasik labele realiza tanba to'o tiha iha Portugal aktividade politika maka'as liu. "Iha Portugal, estudante timor-oan mos komesa halao aktividade politika. Iha Portugal iha tinan 1975, kuandu Nicolao Lobato ba Portugal molok invazaun, ami halo reuniaun entre apoiante Fretilin atu hili xefi delegasaun iha iha Portugal. Hau mak hetan votus barak liu hanesan delegadu substitutu Portugal servisu hamutuk ho Abilio Araujo," katak eiz Ministro Negosiu Estranjeiru ne'e.

Viajen politika barak mak eiz embaixador ba Estadus Unidos ne'e halao iha tempu rezistensia nia laran. Iha fulan Juñu tinan 1975, Jose Luis Guterres ba iha rai pizza, Italia; liliu iha rai Torino atu partisipa seminariu konaba movimentu libertasaun iha nasaun paizes lingua Portugeza. "Ida ne'e hanesan primeira seminariu ne'ebe mak hau tuir antes funu atu tama iha Timor," hateten Jose Luis Guterres ne'ebe konsege hasoru mos Prezidente Mozambique, Samora Machel hamutuk ho delegasaun ne'ebe xefia husi Mari Alkatiri.

Karrera Jose Luis Guterres nu'udar aktivista komesa aumenta ba bebeik. "Iha tinan 1977, hau hanesan nomeadu reprezentante iha Angola," dehan Jose Luis Guterres ne'ebe iha tinan 1999 tuir konsulta popular iha Lisboa ne'e.Wainhra jornalista kla'ak husi ninia sentimentu konaba karreira ne'ebe daudaun ne'e nia assume, Jose Luis Guterres esplika katak husi nia parte, nia laos ema pessoal ida ne'ebe gosta buka funsoens. "Hau laos ema buka funsoes. Hela diak ho familia ka mai Timor fo kontribuisaun para hadia estabilidade atu povu labele terus tan," tenik Jose Luis Guterres ne'ebe mak gosta rezolve problema liu husi dialogu, debate, maibe laos konfrontasaun.

Estanislao da Silva: "Iha Salan Rua Ne'ebé Nia (Jose Luis Guterres) Halo"

Bankada Fretilin levanta kazu Vise Primeiru Ministru Jose Luis Guterres iha fulan Fevereiru maibe seidauk iha rezultadu, semana kotuk dala ida tan Fretilin levanta kazu ne'e ba publiku ho evidensia balun. Salan saida los mak Jose Luis Guterres halo bainhira asume kargu nudar Ministru Negosiu Estranjeiru? Tuir mai intervista jornalista kla'ak Nuno Rodriguez Tchailoro no Zevonia Vieira ho membru Parlamentu Nasional Estanislao da Silva ne'ebé uluk mos asumi kargu nudar Primeiru Ministru.

Bele esplika konaba kazu Jose Luis Guterres ne'ebé fo osan ba nia kaben iha Nova Yorke?
Ida ne'e asuntu ne'ebé seriu tebes tanba kazu tranferensia osan husi fundu publiku. Fundu publiku ne'e osan estadu nian absolutamente povu nia osan. Transfere ne'e halo ho konsentementu husi Sr. Jose Luis Guterres altura ne'e nudar ministru negosiu estranjeiru, ida ne'e maka problema seriu tanba nia kaben servisu iha ne'eba tuir despasu vise ministra negosiu estranjeiru ninian, servisu hanesan funsionariu lokal para manan osan deit $ 2800. Hau koalia rasik ho vise ministra, no nia hateten mai hau katak wainhira atu despasu osan ba Amerika ne'e, Vise Ministra Adaljisa Magno la hatene buat ida. Portantu ida ne'e signifika katak orientasaun ne'e mai husi ministru negosiu estrangeiru altura ne'e Jose Luis Guterres rasik, nia maka halo despasu. Entaun, nia mak autoriza osan para aumenta nia kaben nia vensimentu hanesan diplomata. Tuir lei nia kaben labele sai hanesan diplomata.

Osan husi $ 2800 ne'e atu aumenta ba hira?
Nia salariu $ 2800 hanesan funsionariu lokal depois aumenta ba salariu diplomata, nia manan osan boot liu. Husi osan ne'e ita bele hare nia total no nia trasferensia, nia diferensia hira. Husi traferensia 10 mil. Iha primeiru ne'e portantu 10.773 mill, portantu ne'e signifika katak nia vensimentu ne'e liu $ 2800.

Tuir esplikasaun katak osan hirak ne'e uza ba aluguer uma nian?
Sira maka hela iha ne'eba, ne'e laos kumprimisiu governu Timor Leste maka hili, atu selu nia kaben ba hela iha Amerika, ida ne'e laiha kumprimisiu. Tanba ne'e maka aseita katak nia kaben sai hanesan funsionariu lokal iha ne'eba.

Ho osan total $ 2800 ne'e inkui uma ba funsionariu sira ne'ebé hela iha ne'eba ?
Sim ne'e inklui uma hotu.

Vise PM hateten katak buat sira ne'e liu prosesu normal, iha tempu bainhira hili nudar ministru negosiu estranjeiru, Ramos Horta no mos ita boot rasik mak dehan lalika preokupa ho ita nia kaben, tanba governu sei tau matan?
Hau la hatene buat ida ne'e, ami altura ne'e kontaktu nia maibe Jose Luis Guterres hateten aseita no hakarak simu kargu ida ne'e. Laiha kumprimisiu ida atu selu fali nia kaben ho salariu spesial ne'e. Tanba ne'e maka aseita altura ne'eba, Sr.Jose Ramos Horta hanesan PM, nia aseita no konkorda Sr. Jose Luis nia kaben hanesan funsionariu lokal.

Deklarasaun vise PM hateten ne'e la los?
Deklarasaun ne'e la los, tanba hau hanesan vise premeiru ministru iha altura ne'eba nunka asume kumprimisiu ida para dehan atu hatama ninian kaben hanesan diplomata. Altura ne'e Sr.Jose Ramos Horta hanesan PM, nia koñesimentu katak konfirmadu husi Vise Ministra Magno katak Jose Luis Guterres nia kaben atu servisu iha embaxada Timor iha Nova Yorke hanesan funsionariu lokal. Derepente nia sae ba diplomata, nia salah boot. Salah boot liutan tanba Jose Luis Guterres nudar ministru iha tempu ne'eba tuir lolos hatene katak lei Timor ne'e la premiti ema estranjeiru atu simu kargu diplomata. Portantu iha salan rua ne'ebe nia halo: ida, nia aseita nia kaben servisu sai diplomatika, ida fali aumenta nia kaben nia osan. Depois nia foti desizaun Ambaxador Nelson Santos mos la hatene buat ida. Ikus mai Ambaxador Nelson Santos hatene maka nia buka klarifikasaun husi Vise Ministra Adaljisa Magno.

Wainhira Nelson Santos halo klarifikasaun ba saida maka Adaljisa hateten?
Momentu nia klarifika, hateten katak vise ministra halo despasu para Jose Luis Guterres nia kaben servisu hanesan funsionariu lokal.

Jose Luis mos dehan katak tanba sa maka uluk la levanta agora maka foin levanta?
Tanba altura ne'e Embaxador Nelson Santos kontatu Vise Ministra Adaljisa Magno, haruka hapara kedas no kansela kedas. Iha tempu ne'eba mos Nelson Santos bolu fungsionariu ministeriu negosiu estranjeiru nian hodi husu. Tanba sira halo buat la iha koñesimentu. Signifika katak Jose Luis Guterres altura ne'eba servisu nem konsulta no hato'o ba vice ministra negosiu estranjeiru. Laiha kombinasaun, se nia Ministru tenki halo desizaun no despasu funsionariu sira seluk. Portantu nia halo desizaun unilateral. Adaljisa Magno tanba nia hatene, altura ne'e hau Primeiru Ministru, Adaljisa haruka para kedas pagamentu sira ne'e.

Pagamentu ne'e lao oinsa?
Altura ne'e halo investigasaun, i altura ne'e seidauk denunsia tanba governu ne'e iha rohan tiha, ami mos laiha tempu atu kontinua halo investigasaun. Ne'e duni ami husik hela no hein katak governu agora ne'e halo prosesu ne'e. Hanesan mos informasaun koalia katak Embasador Nelson Santos hato'o relatoriu mai to'o ministeriu negosiu estranjeiru no to'o agora la hola medidas ida.

Wainhira halo tranferensia hosi Ministru Negosiu Estranjeiru Jose Luis Guterres nia Kaben Ana Maria lao durante fulan hira?
Nia hahu iha Novembru 2006 to Marsu ka Abril 2007, altura ne'e Jose Luis Guterres hanesan Ministru Negosiu Estranjeiru. Abril hahu tiha ona kampanha ba elisaun presidensial depois tama kampanha elisaun legislativa haree katak tempu ki'ik demais ona maibe medidas hola nafatin buka hatene tuir nafatin kona ba problema ne'e. Iha tempu ne'eba nia bolu ema administrasaun no finansas nian para hatene tansa maka nia halo buat ne'e. Buat ida grave liutan kuandu ho aumenta ema ida nia osan hola desizaun ne'e, premeiru o tenki anula despasu ida ne'ebe halo tiha ona. Sr. Jose Luis Guterres la anula despasu ida ne'ebe Adaljisa Magno halo para hatama nia kaben hanesan funsionariu lokal, signifika desizaun ne'e abritraria. Nia hola buat ne'ebé benefisia ninian ema no familia deit. Osan ne'e estadu no povu nia, laos gasta osan arbiru deit tenki tuir prosidementu no regras ne'ebe iha.

Tuir deklarasaun Fretilin katak osan ne'e hola grand piano, maibe Jose Luis Guterres dehan ida ne'e laiha relasaun?
Ida ne'e tanba Embasador Nelson bolu Jose Luis Guterres nia kaben ba koalia no husu ba nia, Ana Maria ne'e dehan osan ne'e nia gasta hola saida deit, ne'e maka ami hatene katak osan ne'e nia utiliza para hola grand piano, la interese segunda ka terseiru mao, na realidade katak nia hola grand piano, utiliza osan povu nian, selu nia la tuir prosidementus. Hola grand piano ho osan rasik ne'e la iha problema, se hola grand piano ho osan ne'ebe la los no osan povu nian, ne'e sala boot.

Saida maka atu halao ba iha prosesu ne'e ba oin tanba kazu foti tiha ona?PDHJ kontaktu ona hau para ami hato'o informasaun hodi bele haree kazu ida ne'e. Tanba kazu ida ne'e liga ho fungsionariu publikus, ami kontinua nafatin ijiji ba PM Xanana Gusmão para demiti Jose Luis Guterres tanba nia ema ida ne'ebe laiha integridade, utuliza fundus estadu nian ba benefisiu pesoal. Portantu ida ne'e koerentu, tanba nia hakarak governu ida transparensia, integridade. Pelu menus halo suspesaun ba nia no halo investigasaun, to'o agora desde ami levanta kazu ne'e, iha fulan Fevereiru to agora ami seidauk buat ida. Ne'e hatudu katak laiha esforsu, laiha komitmentu para halo governasaun ne'e ho transparansia.

Lutu Metan ba Estado de Sítio

almerio ALVAREZ
"Hau la haree iha estado de sítio, wainhira ema oho Prezidente Estadus Unidus, John F. Kennedy. Hau mos la haree iha estado de sítio, wainhira bomba nakfera iha Español ne'ebe rezulta ema barak mate. Iha tinan 1998, wainhira estudante sira hatun Prezidente Soeharto husi ninia kargo, laiha estado de sítio". Timor ne'e iha saida mak tenki iha estado de sítio? Atu kaer Salsinha deit mak tenki iha estado de sítio"?

Lamentasaun no perguntas hirak ne'e hato'o husi deputadu Mario Viegas Carrascalão wainhira halao soru mutu ho Provedor Direitus Humanus e Justisa (PDHJ), Sebastião Dias Ximenes iha Uma Fukun Parlamentu Nasional, Segunda-feira 14/04 loraik. Relatoriu husi monitorizasaun ba area direitus humanus ne'ebe mak PDHJ halao durante estado de sítio hatudu katak, iha duni violasaun direitus humanus no torturasaun ne'ebe mak membru Polisia Nasional Timor Lorosa'e (PNTL) no F-FDTL sira halo ba sidadaun.

Durante atuasaun iha tempu estado de sítio, keixas ne'ebe PDHJ hetan katak, membru polisia sira ne'ebe mak kaer ema, la tuir prosesu ne'ebe mak iha. "Wainhira ami to'o iha dentensaun laran iha Polisia Kaikoli, ami haree sira hetan tratamentu ho diak. Maibe prosesu antes atu ba iha sela dentensaun ne'e mak la di'ak. Tanba membru polisia sira ne'e baku no tuku sidadaun sira ne'ebe lao iha oras estado de sítio," esplika Provedor, Sebastião Dias Ximenes iha plenaria iha Uma Fukun, Parlamentu Nasional 14/04.

Konaba atuasaun husi forsas Komando Operasaun Konjunta "HALIBUR" ne'ebe mak halao sira nia knar la respeita direitus sidadaun seluk nian, PDHJ informa ona ba orgaun ne'ebe kompetente atu bele hadia hahalok membru polisia no forsas militar. "Tanba kapturasan ne'ebe ami haree, membrus balun ou elementus ka individus balun aproveita fali situasaun estado de sitio. Tuir lei katak laos polisia mak halo interogasaun, maibe polisia tenki aprezenta ema ne'e ba iha juiz investigasaun atu hetan tratamentu justisa ho diak," katak Ximenes.

Implementasaun estado de sitio laos deit PDHJ mak kestiona, maibe mos komunidade sira ne'ebe mak loron kalan servisu iha tempu kalan. Impaktu estado de sitio ne'e mos viola ona direitu ekonomiku husi sidadaun. Povu sira ne'ebe mak baibain tama servisu kalan hanesan restaurante, sira lakon servisu no sira nia salariu hamenus, tanba restaurante taka sedu. "Ami haree liu ba ema sira ne'ebe mak halao servisu iha tempu kalan no ikus mai tenki tama ba iha sela detensaun. Razaun polisia ka forsas sira kaer ema, tanba sira lao iha oras estado de sitio,"sublina Ximenes.

Problema boot liu ne'ebe mak Provedor foka maka'as mak, membru polisia sira ne'ebe mak halo atuasaun, sira hatais farda polisia, maibe sira nia naran la iha. Realidade ida ne'e susar ba vitima sira atu hato'o keixas ba iha PDHJ ka Komando Operasaun Konjunta "HALIBUR".

Wainhira Polisia ka forsas militar sira ne'ebe mak halo atuasaun ba iha komunidade, la tau identidade, ida ne'e grave tebtebes. Oinsa vitima bele hato'o keixas konaba hahalok membru polisia ka militar sira ne'ebe halo violensia ba iha sidadaun sira, kuandu polisia nia identidade rasik vitima la hatene. "Sira mai lori sira nia kanek, sira la konsege identifika ema se mak baku sira, maibe tanba membru polisia sira ne'ebe halao sira nia servisu iha tempu estado de sitio, sira la iha naran. Sira hasai tiha sira nia naran," tenik nia.

Hafoin Provedor hato'o relatoriu, Ana Pessoa (bankada Fretilin) lamenta tebtebes violasaun direitus humanus durante implementasaun estado de sitio. "Direitus humanus tenki tau iha fatin aas. Ita nia instituisaun estado tomak tenki defende ba direitus humanus. Hau mos kestiona katak PNTL sira tau farda, baku ema, ida ne'e kazu ida ke grave tebtebes. Tanba tuir loloos sidadaun hotu iha direitu atu hatene polisia se mak halo atuasaun ba nia, baku no tuku sidadaun ida. Hau konsidera hahalok husi membru PNTL ne'e grave tebtebes," lamenta eiz Ministra Estatal ne'e.

Ana Pessoa mos hatutan tan katak estado de sitio, laos estado de marsial. "Estado de sitio, laos ita kura mental," dehan Ana Pessoa.

Lamentasaun konaba estado de sitio, laos mai husi paridu opoziasaun hanesan Fretilin. Maibe mos mai husi partidu ne'ebe mak hola parte iha governu AMP hanesan PSD, PD, no CNRT. Mario Carrascalão ne'ebe dezde inisiu vota kontra estado de sitio, hato'o ninia persepsaun katak ema balun uza fali estado de sitio ne'e atu sobu fali politika unidade nasional.

Maske relatoriu ne'ebe mak hato'o husi Provedor ne'e hamosu polémika no pro-kontra, maibe maioria membru Parlamentu Nasional husu ba PDHJ atu halao nafatin ninia knár hodi defende direitus humanus. "Ita boot nia knár tuir mandatu konstituisaun ne'e importante; liliu sai nu'udar defensoria direitus humanus i justisa. Sentidu konfigasaun atu defende ita rain ne'e importante. Ita mos labele nega katak iha Timor-Leste iha duni violasaun ba direitus humanus," hateten Jose Texeira husi bankada Fretilin, depois de Provedor, Sebastião Ximenes hato'o relatoriu konaba violasaun ba direitus humanus durante implementasaun estado de sitio.

Ideia atu defende nafatin direitus humanus iha tempu estado de sitio, diferensa ho Duarte Nunes, husi bankada CNRT. "Iha tempu estado de sitio, militar la haree ba lei. Tanba soldadu obedese deit ba iha orden komando nian," esplika Nunes.

Deputadu Vital dos Santos (deputadu PD) iha ninia intervensaun hateten katak implementasaun estado de sitio durante ne'e negativu tebes. "Iha Bobonaro, polisia kaer joven ida baku nia, depois joven ne'e sai tiha aleiza. Laos deit komunidade baibain mak hetan baku husi membru polisia balun. Maibe deputadu rasik mos sai vitima husi implementasaun estado de sitio," tenik Vital. Kazu ne'ebe mak akontese iha 2008, la grave liu realidade saida mak akontese iha 2006. Iha 2006, kuazu violasaun ba direitus humanus ne'e hamutuk 100. Maibe iha altura ne'eba governu la implementa estado de sitio. Iha 2008, volume desturbu ne'ebe akontese, numeru ne'e maiz ou menus hamutuk 20 resin deit. Implementasaun estado de sitio mos laos atu duni no kaer ema ne'ebe mak halo atentadu iha 11/2. Maibe komunidade baibain ne'ebe la iha forsa, kbiit, no la iha ligasaun-relasaun ho Gastão Salsinha mak hetan violasaun maka'as no boot liu.Realidade ida ne'e mak sai preukupasaun ba membru Parlamentu Nasional, wainhira rona tiha relatoriu ne'ebe hato'o direitamente husi Provedor, Sebastiao Dias Ximenes iha Uma Fukun Parlamentu Nasional. Governu karik kontente ho implementasaun estado de sitio, maibe estado de sitio ba Parlamentu Nasional, nu'udar meius ida atu defende interese ema ida ka rua nian deit. Tanba ema uza fali estado de sitio, atu sobu politika unidade nasional. Kuandu implementasaun estado de sitio ne'e viola nafatin direitus sidadaun hotu-hotu nian, povu tenki hateten sai katak, diak liu ita kesi lutu metan iha kakorok to'o mate.

Jose Brandão: "Tinan ne'e….kobertura ba 80 %, 3G, telefone publiku, internet ba eskola…."

Foin lalais Ministra Finansas Emilia Pires hasai deklarasaun katak fo prazu fulan 6 ba Timor Telecom atu hadia jestaun. Atu bele hatene liu tan signifikansia prazu fulan 6 ba Timor Telecom, Nuno Rodriguez Tchailoro dadalia ho Administrador Delegado Jose Brandão iha nia servisu fatin (11/4) atu hatene liu tan mos planu Timor Telecom ba oin. Kla'ak rasik koko atu intervista Ministra Finansas no Ministru Infrastutura maibe too dadalia ne'e hatun, ministru nain rua seidauk fo resposta atu koalia ho kla'ak too edisaun ne'e publika. Saida mak Timor Telecom sei halao iha tinan ne'e?

Ita bele esplika oinsa Timor Telcom hahu opera iha Timor-Leste?
Timor Telecom atua iha Timor-Leste bazeia ba kontratu konsesaun entre Timor Telecom no Governu. Kontratu ne'e halao liu hosi konkursu internasional ne'ebé kompetitivu, inisia ho administrasaun UNTAET no remata primeiru governu konstitusional. Kompetitivu signifika kompania ne'ebé deit mak hakarak tuir bele deit. Ikus liu, Timor Telecom mak aprezenta presu diak liu, kualidade diak no kondisaun diak liu. Tamba ne'e governu halo kontratu konsesaun.

Timor Telecom halao tuir obrigasaun iha konsesaun. Iha buat barak ne'ebé lao diak liu fali ho kontratu ne'ebé iha, hanesan kobertura telemovel atinji 68 % populasaun. Iha termu presu inferior kompara fali ho kontratu ne'ebé iha, ne'e hatudu katak Timor Telecom nunka hasae presu durante halao nia knaar. Desde 2003, Timor Telecom mantein presu, iha kazu balun hanesan xamada internasional, presu agora tun tiha ona. Ida ne'e nudar ezemplu importante balun hosi atividade.

Oinsa dezenvolvimentu rekursu umanu iha Timor-Leste?
Timor Telecom iha politika formasaun ba ema. Iha loron independensia bainhira hahu pratikamente laiha ema espesializada iha Timor Telecom, ita bele dehan uituan liu. Ami presiza halo formasaun, ami iha relasaun diak ho universidade sira. Ami rekruta no halo formasaun, too agora ami halo tiha formasaun ona 8000 horas. Formasaun iha Timor Leste no mos iha rai liur.

Foin dadaun ministra Finansas fo prazu fulan 6 atu hadiak jestaun, ida ne'e signifika saida ba Timor Telecom?
Timor Telecom la asina kontratu ho governu, Timor Telecom asina kontratu ho estadu Republika Demokratika Timor Leste, Timor Telecom ho estadu. Timor Telecom halao kontratu iha ambitu ne'e, buka kumpre saida mak iha kontratu ne'e. Too ohin Timor Telecom halo liu fali buat ne'ebé iha kontratu. Ami seidauk hetan notifikasaun katak Timor Telecom la kumpre nia kontratu ka halo liu buat ne'ebé kontratu hateten. Asionista sira hetan informasaun diak saida mak empreza halo, inklui estadu. Deklarasaun iha jornal, ami sei la halo komentariu barak. Tamba ami hatene didiak saida mak atu refere. Prazu fulan ne'e halo ami no asionista sira hakfodak, agora presiza haree fila fali jestaun.

Governu reprezenta estadu, estadu rasik nudar asosionista ho 20 %?
Estadu hetan informasaun hosi empreza, fulan-fulan asosionista sira hetan informasaun hosi empreza. Hetan informasaun tinan-tinan ba relatoriu no kontas, asosionista sira hetan informasaun planu estratejiku. Iha asembleia jeral atu bele hadia liu tan, iha buat balun presiza koriji, Timor Telecom nakloke atu hadia an. Simu kritika hotu-hotu atu hadia servisu.

Ministra Finansas halo kritika katak Timor Telecom benefisia deit grupu kiik oan maibe laos ema barak?
Timor Telecom iha kontratu ho governu, obrigasaun Timor-Telecom iha kontratu ne'e nia laran. Kontratu ne'e proposta hosi estadu no asina kontratu ne'e. Ba ami, kontratu ne'e mak dalan, maibe se estadu iha buat ruma foun, nudar asosionista, estadu bele liu hosi asemblei jeral hodi fo hanoin hodi hadia liu tan Timor Telecom.

Governu ne'e agora hakarak loke Timor-Leste nudar destinu importante ida ba investimentu estranjeiru se haree hosi lei tributaria foun, karik se laiha kontratu hanesan ne'e tan ba Timor Telecom?
Kuandu ita koalia investimentu estranjeiru, Timor Telecom nudar investor mayor iha Timor Leste agora, hases tiha area petroliferu nian. Timor Telecom investe $ miliaun 31 ida ne'e reprezenta liu 1/3 hosi investimentu iha nasaun ne'e. Ida ne'e signifikativu tebes. Timor Telecom hodi tiha investimentu estranjeiru nian iha rai ne'e too ohin loron. Investor sira seluk ne'ebé atu investe iha dalan, eletrisidade seidauk mosu mai. Timor Telecom mosu iha tempu difisil bainhira ema lakohi atu investe iha Timor. Timor-Leste ema barak dehan la viavel, Timor Telecom mai no investe hodi kumpri nia planu, servisu ho estadu. Klaru katak estadu governa hosi governu. Governu bele altera nia politika. Timor Telecom seidauk hetan notifikasaun ida katak halo alterasaun.

Saida mak Timor Telecom sei halo, bainhira governu hakarak hapara tiha kontratu ne'e?
Ami la hatene se ida ne'e sei akontese ka lae, hasai tiha buat ne'ebé iha jornal, ami laiha informasaun ida. Maneira diak atu halo relasaun entre estadu ho empreza laos liu hosi jornal. Se iha buat ruma balun muda koalia hamutuk. Ami presiza fo sai buat ne'ebé governu hatene atu analiza didiak saida mak iha ba kontratu ne'e.

Nudar nasaun foun hanesan Timor, difikuldade saida mak Timor-Telecom hasoru?
Timor laos nasaun fasil atu servisu. Primeiru, merkadu kiik liu. Merkadu kiik ho sentidu rua: populasaun uituan no kapasidade atu sosa mos kiik. Timor-Leste sei sai nudar nasaun ida kiak liu iha mundu no tuir relatoriu banku mundial katak 40 % moris iha mukit laran. Timor-Leste mos iha problema ho rekursu umanu ne'ebé espesilizadu no ita iha problema ho falta seguransa. Iha problema ho seguransa ba infrasturuta telekomunikasaun. Ezemplu deit iha tinan 2006, Timor Telecom lakon fiu liu km 60. Laiha ema ne'ebé akuzadu, laiha rezultadu ba ne'e. Problema seluk mak difikuldade ba enerjia eletrika. Timor Telecom tenki produz rasik enerjia iha distritu 13, Timor Telecom iha jeradores liu 40. Problema seluk mak fiskal, impostu as liu. Ezemplu tasa faan nian 8 %, kartaun $ 10, tasa $1.2 laos ba Timor Telecom maibe ba estadu. Hein katak ho lei tributaria foun, buat ne'e sei ultrapasadu tiha. Problema mos konaba frekwensia. Maibe buat hotu ita tenki servisu nafatin hodi ultrapasa.

Koalia konaba folin Timor Telecom kompara ho nasaun sira seluk Timor Telecom iha klaran (la karun liu mos la baratu liu), Tuir estudu Banku Mundial katak folin Timor Telecom baratu liu nasaun 6 iha rejiaun pasifiku. Ne'ebe la los bainhira dehan katak Timor Telecom karun liu iha mundu. Estudu ne'e laos Timor Telecom mak halo, maibe Banku Mundial ba Ausaid.

Hanoin katak ho tasa ne'ebé hatun, investimentu ne'ebe ami halao dadaun, hadiak ami nia servisu ami bele dehan katak ami sei hatun presu.

Produtu foun saida mak Timor Telecom sei halao ba oin iha tinan ne'e?
Timor Telecom investe tiha ona $ miliaun 31, ami nia planu iha tinan tolu, tinan ne'e nia rohan sei investe tan $ miliaun 19. Total investimentu ba tinan tolu sei hamutuk $ miliaun 49. Se iha buat barak ami halao iha tinan ne'e: aumenta kobertura sei too 80 % ba servisu movel nian; 80 % populasaun, introdusaun internet banda larga atu aumenta rapidez ba asesu, introdusaun ba terseira jerasaun (3G) ho 3G bele halo xamada video conference, xamada multimedia, sei bele iha internet hosi telemovel hosi laptop iha fatin ne'ebé deit mak iha servisu. Ami sei halo instalasaun telefone publiku iha sidade mos iha aldeia, sei halo edifisiu telekomunikasaun foun iha distritu, iha tinan ne'e sei loke iha Manatuto, Lospalos, Aileu no Likisa. Ami aumenta roaming ho nasaun seluk, hadia komunikasaun ho Indonesia tamba durante ne'e kualidade la diak, internet ba eskola, ami sei halo pilotazen ba eskola 11 iha Timor. Ida ne'e projetu prinsipal iha tinan ne'e. Total too 2010, sei investi liu $18 miliaun.

BOLIVIA: Konsulta gratuitu ba ema miliaun 11

Brigada medisina Cuba fo konsulta ba ema hamutuk 11,039 848 hahu hosi sira mai iha Bolivia iha fulan Fevereiru 2006.

Relatoriu ofisial hosi kuarter diplomatiku iha La Paz espesifika katak iha periodu ne'e physician sira iha Caribia salva moris ema 11,893 no asiste liu labarik hahoris 8000.

Obrigadu ba knaar profesional hosi saude iha illa ne'e. Hosi ema 217 706, 176 624 Bolivianu sira bele haree fila fali.

Tuir tekstu ne'e, iha mos 17 563 Argentino sira, 11,710 Peru, 9868 Brazilianu no 302 Paraguay hetan operasaun ophthalmologic iha rejiaun fronteira.

Brigada Medisina Kuba iha Bolivia forma hosi 2,929 kolaboradores hosi 1,288 doutores no restu funsionariu paramediku.

Brigada medisina Kuba ne'ebé servisu iha Nicaragua fo tiha konsulta hamutuk 800 000, koordenador koloborasaun Luis Carlos Avila hateten.

Iha nia intervista iha Prensa Latina, ofisial fo sai katak sira too tiha ona numeru 792, 949 pasinte ne'ebé sira asiste hahu hosi servisu iha Maiu 2007.

Traduz hosi Prensa Latina

CUBA: Segundu Prezidente Cuba depois de Revolusaun "Raúl Modesto Castro Ruz"

MERICIO AKARA*
Iha 24 de Fevereiru de 2008, Asembleia Nasional hili Raúl Castro sai núdar Prezidente Cuba hodi troka Primeiru Comandante em Chefe Fidel Castro. Mudansa lideransa maksimu iha Cuba liu husi prosesu eleisaun demokratiku ida ne'ebé mak la'o ho hakmatek no susesu. Laiha konfrontasaun politika no sosial durante prosesu demokratizasaun ida ne'e la'o. Tanba ne'e mak halo mundu hakfodak, liu-liu halo hakfodak governu Estadus Unidus da Amerika ne'ebé mak imajina hela katak sei mosu konfrontasaun bo'ot husi povu durante mudansa lideransa ne'e la'o.

Ne'e duni maske nasaun bo'ot sira balun sempre kestiona demokrasia no direitus humanus iha Cuba, maibe povu Cuba hatudu dala ida tan ba mundu tomak katak, povu Cuba respeitu duni valores demokrasia no direitus humanus barak liu kompara ho nasaun sira seluk iha mundu tomak. Tanba iha nasaun barak wainhira hala'o prosesu eleisaun ka mosu mudansa ruma iha iha nivel alto dala barak rezulta konfrontasaun ne'ebé mak halo ema terus no mate barak.

Lalika haree ba dok, ita bele haree ita nia viziñu Indonesia wainhira iha mudansa lideransa ruma povu barak sai vitíma no mate. Ka ita bele kompara ba ita nia nasaun Timor-Leste, wainhira ema balun hakarak sai lideransa, tenke faan povu ninia vida tun-sae, ne'ebé halo povu barak terus no mate. Ida ne'e mak demokrasia ka? Hau hanoin Lae…!! Tanba valores demokrasia prinsipal balun hateten katak, presiza mak respeitu malun, tuir vontade maioria no laos faan povu ninia vida tun-sae. Hanesan ezemplu ida tan mak povu Cuba ho sira nia lideransa hatudu hela ba ita hotu oinsa implementa valores demokrasia.

Raúl Castro, núdar politiku nain nomos Chefe Militar, moris iha dia 3 de Juño de 1931 iha Biran, Cuba Oriental. Raúl núdar alin ida husi Fidel Castro, moris husi familia ida mak riku núdar rai nain ho plantasaun bo'ot iha Cuba. Núdar ema riku nia oan, la-fasil ba nia atu eskola. Tanba ne'e mak Raúl ho nia maun Fidel eskola iha Colegio Jesuita Dolores iha Santiago de Cuba nomos kontinua eskola tan iha Coleigo Jesuita de Belen iha Havana.

Durante nia tempu eskola no núdar joven ida, nia involve makaas tebes iha movimentu juventude Sosialista. Tanba ne'e mak Raúl hatene uluk prinsipiú no valores Sosialismu nomos deklara an núdar sosialista iha Cuba kompara ho Fidel Castro. Maibe, tanba Raúl besik liu Fidel, ne'e duni ikus mai Fidel mos muda nia ideologia formalmente ba Sosialismu. Satan Che Guevara mos núdar ema sosialista ne'ebé mak lori valores internasionalismu iha tempu luta ba revolusaun sai companeiro ida mak besik liu ho Fidel Castro.

Maske nune'e, politikamente Raúl ladun mosu iha oin. Nia sai deit hanesan lalatak ba Fidel Castro deit. Nia ajuda Fidel Castro hodi hahu luta kontra ditadura Prezidente Fulgencio Batista iha Cuba. Hanesan iha dia 26 de Juñu de 1953, Raúl ajuda Fidel hodi halo atake ba baraka militar Batista nian iha Moncada. Maibe, tanba iha failansu wainhira hala'o atake, militar Batista konsege kaer Raúl ho nia kolega sira hotu no hatama ba prizaun.

Iha 1955 Raúl ho nia kolega balun livre husi prizaun no sesan ba Mexico. Ne'e duni, Raúl mos iha tempu neba hola parte iha espedisaun Granma husi Mexico ba Cuba hodi kontinua movimentu kontra ditadura militar Prezidente Batista. Raúl mos sai ema ida mak moris wainhira militar Batista hala'o atake militar hasoru espedisaun Granma. Raúl hamutuk ho Fidel, Che, Camilo no sira seluk halai ba foho Siera Maestra hodi kontinua forma luta ho estratejia guerillha.

Iha 1958, Raúl hetan promosun núdar Commandante ba divisaun militar ida hodi forma segundo base de apoia hodi hasoru Batista. Nune'e sei kompara ho Che Guevara no Camilo Cienfuegos, Raúl ladun hetan susesu bo'ot iha funu guerillha. Maibe wainhira revolusaun manan iha 1959, Raúl mak sai pioner hodi halo esekusaun ba militar Batista nian ne'ebé mak konsidera núdar ema mak kontra revolusaun.

Depois de Manan tiha Revolusaun iha tinan 1959. Raúl Castro sai membru importante ida iha lideransa nasional hodi hala'o revolusaun intregradu iha nasaun Cuba. Raus mos sai membru ida iha Unidade Partidu Socialista Revolusionariu nian ne'ebé mak hari'i iha tinan 1962 no depois de tinan tolu (1965) dizolve tiha.

Ikus mai Raúl sai fali membru Comite Central iha Partidu Comunista de Cuba, no sai núdar segundu sekretariu iha Biro Politiku desde partidu ne'e hari'i iha fulan Outubru 1965. Iha tempu mak hanesan, Raúl Castro ezisti núdar Primeiru Vice Prezidente iha Conselho do Estadu Cuba, iha Asembleia Nasional de Força Popular, nomos iha Conselho Ministro ne'ebé forma iha tinan 1976.

Raúl Castro ninia pozisaun importante iha esekutivu mak nia sai mos Ministru da Força Militar Revolusionariu desde tinan 1959 to'o fulan Fevereiru 2008. Maske nune'e, Raúl mos ajuda Fidel hodi halo reforma ba areia merkadu agrikultura hodi bele sustenta hahan ba povu Cuba iha tinan 1990 nia laran, wainhira tempu Uniaun Sovietika rahun.

Ida ne'e mak kontribuisaun total Raúl Castro ba iha revolusaun iha Cuba. Ne'e duni susesu barak mak agora Cuba hetan, hanesan asistensia saude ne'ebé mak iha kualidade diak, edukasaun gratuitu ba ema hotu, povu moris ho lahamlaha, ajuda nasaun seluk ho prinsipiu internasionalista, nomos halo Cuba ezisti no forte nafatin iha tempu embargo ne'ebé mak govenu Estadu Unidus da Amerika implementa, sai núdar rezultadu husi kontribuisaun revolusaun Cuba. Raúl Castro núdar ema ida mak estraordinariu iha prosesu revolusaun Cuba ho nia companeiro seluk, hatudu ona ezemplu diak ida hodi hari'i nasaun uniku no alternativa. Venceremos…!!

Raúl Castro nia Personalidade no Cuba.
Area: 109,886 sq km (42,427 sq mi)
Populasaun (2007 est.): 11,238,000
Capital: Havana
Chefe do Estadu no Chefe do Governo: Presidente do Coselho do Estadu no Presidente do Conselho Ministros Raúl Castro Ruz

*) Program Manager Luta Hamutuk

Jurnalizmu Paz no Konflitu

zevonia VIEIRA
TLMDC organiza treinamentu kona ba jurnalizmu paz no konflitu iha Dare. Treinadora sira mai husi PECOJON (Peace and Conflict Journalism Network) husi nasaun Filipina. Iha treinamentu ne'e foka liu oin sa jornalista sira hakerek no halo kobertura iha fatin konflitu.

Iha dadersan tuku 11.00, loron 11/4, jornalista husi media jornal no elektronika halibur hamutuk iha edifisiu Timor-Leste Media Development Center (TLMDC), Kolmera atu ba Dare hodi tuir treinamentu.

Wainhira jornalista sira too iha Dare, iha fatin kongregasaun Institutu Mau-alin iha Kristu (Ismaik) nebe sai fatin ba treinamentu ne'e, kuaze sente kontente ho fatin nebe furak, malirin, verde, nakonu ho ai-hun tahan matak, dok husi polusaun no kalma. Iha tempu kalan hateke mai kraik, bele haree sidade Dili ho furak tebes. Iha Dare "aroma" konflitu nebe manas iha Dili la horon iha fatin ne’e. Manu fuik ne'ebe semo mai halo rai Dare furak tebes.

Jornalista hamutuk 14 hahu tuir treinamentu ne'ebe fo husi PECOJON husi Filiphina. Treinamentu konaba peace and conflict ne'e halao ba dala rua ona. Ba dahuluk halao iha tinan 2007 ne'ebe organiza mos husi TLMDC. Ba daruak ne'e hahu husi 11 - 14 Marsu 2008. Treinamentu ne'e hetan suporta husi Internasional Weiterbildung und Entwikcklung gGmbH (INWENT). Treinadora maka naran Antonia Koop husi Alemanha no assisten Len husi Filiphina.
Iha treinu ne'e foka liu kona ba peace & Conflict Journalism. Oin sa jornalista sira halo kobertura iha area konflitu halo kobertura ba dame nian. Jornalista sira tuir ho antuziasmu boot, no seriu ba saida maka Antonia esplika. Jornalista sira hato'o nia preukupasaun kona ba dezafius ne'ebe hasoru durante halao kobertura iha terenu; liliu oin sa hakerek istoria kona ba konflitu. Maske rai malirin, kalohan taka ho mahu wen maibe diskusaun lao kapas no seriu.

Debate lao kapas liu wainhira jornalista sira koalia kona ba asuntu diskriminasaun entre media nasional no internasional. Realidade ne'ebe media nasional hasoru katak ulun boot, Forsa Internasional iha Timor dalaruma fo espasu barak liu ba media internasional hodi hetan informasaun ka dadus ne'ebe importante. Tuir jornalista João da Silva reprezentante husi Asosiasaun Jornalista Timor Leste (AJTL) ho laran triste hateten katak akontesimentu 11/2, media nasional susar atu hetan informasaun ho lalais tanba ulun boot ka seguransa sira la fo fatin. "Ami atu halo intervista maibe wainhira media internasional husu, sira fo oportunidade boot hodi halo intervista".

Ho razaun ne'e Antonia Koop husu partisipantes sira hamutuk hakerek karta ida ba ulun boot sira, seguransa internasional no nasional hodi husu para lalika halo tan diskriminasaun ba media rai laran. "Tanba media rai laran maka importante liu. Iha tempu ne'eba kedas, jornalista sira komesa fo hanoin ba malu saida los maka tenki hakerek ba ulun boot no seguransa internasional sira," esplika Antonia Koop.

Iha deklarasaun ne'e jornalista sira hakerek hanesan ne'e: "hapara diskriminasaun hasoru media Timor Leste, tanba ida ne'e ami nia rain, ida ne'e ami nia problema internal. Komunidade Timor hakarak hatene saida deit maka mosu. Jornalista iha direitu no dever atu publika sai deit ba povu. Ami jornalista Timor nian servisu mos iha valor ne'ebe hanesan ho jornalista internasional sira ho domin jornalista Timor Leste."

Meles Veronika husi jornal Labarik ba kla'ak hato'o ninia sentimentu katak kontente ho treinamentu ida ne'e. "Tanba bele aumenta hau nia kapasidade hodi bele hakerek istoria ho diak liu. Hau bele hatene oin sa bele halo kobertura iha fatin konflitu. Ita hare katak Timor ne'ebe nunka para ho konflitu, hau bele lori hau nia kna'ar hanesan jornalista ne'ebe hadomi paz, bele hakerek artigu ne'ebe ajuda Timor-Leste sai husi konflitu no kuda domin no paz," tenik Veronika.Rohan husi treinamentu ne'e, jornalista sira espera katak treinu ne'e la to'o iha ne'e deit, maibe husu atu kontinua nafatin.Tanba rai ne'ebe foin moris presija aprende buat barak oin sa sai jornalista ne'ebe perfeitu. Mario Pedro jornalista Radio Timor Leste hato'o obrigado barak ba TLMDC ne'ebe tau matan ba jornalista Timor hodi bele estuda buat barak atu sai jornalista profesional. Mario espera katak husi rezultadu treinamentu ne'ebe nia hetan, Mario sei aplika iha terenu iha nia servisu fatin.

Populasaun Atauro Hetan Diskriminasaun Husi Governu Central

Atauro, rai ida nebe jeografikamente iha norte, husi kapital Dili, Timor Leste iha parte administrativa sub-distritu Atauro, distritu Dili. Ema barak konhese ilha Atauro nebe konhesidu ho ninian tasi nebe mak furak hodi dada turista lokal no estrangeiru sira ba paseiu iha fatin nee iha sabadu ho roo Nakroman.

Mayoria populasaun Atauro moris hosi vida nudar peskas. Maibe lahaluha populasaun hatudu nafatin sira nia disiplina no oin midar ba ema hotu nebe halo visita ba sira rain, tanba kaer metin ba kultura no relijiaun protestante nian, nebe metin no buras iha sira ninia fuan no hanoin. Maibe Atauro nia rai furak nee la refleta komunidade nia moris lorloron nebe mak kuandu ita ba hare ho matan, katak Atauro rai ida nebe furak duni. Maibe ita sente triste ho vida moris povo rai ketan nee ho problema oin-oin. Hafoin Iha elisaun 2008 nian laran, partidu politiku barak halo kampanha sai tama suku hodi faan nia programa politika no promete buat oioin ba komunidade Atauro. Maibe relidade hatudu oin seluk. Katak laiha partidu politiku ida mosu iha neba atu hatan ba problema nebe povo rai Atauro rasik infrenta ho identidade nia povo sai izoladu tebes no laiha dalan para atu hatoo sira nia kondisaun real nebe mak infrenta.

Depois hadulas tiha rai Atauro durante semana ida nian laran, no tama sai husi Suco hanesan Suco Vila Maumeta, Maqueli, Macadade, Biqueli no Beloi, ONG Luta Hamutuk simu keixa no prekupasaun barak konaba asunto Dezenvolvimentu nebe hato'o husi Komunidade Atauro rasik. Iha semana liu ba, ekipa ida hosi Luta Hamutuk nebe mak halao sira nia programa hodi fahe informasaun ho Objektivu atu habelar informasaun sobre Timor Leste nia riku soin; Mina, Gas no Informasaun kona ba Orsamento Geral do Estado, Diretor NGO Luta hamutuk, Merisio Akara hateten; "programa ida nee laos ba dala uluk ami halao iha ita nia rain, maibe programa hanesan nee ami realiza tiha ona iha fatin balun, iha Distrito Lautem, Baucau, Viqueque, Manatuto, Same no Aileu. Diskusaun konaba asuntu riko soin, Mina ho Gas no Orsamentu Geral do Estado, populasaun sente iha problema barak maka sira infrenta durante nee no lahatene atu lori ba nebe no ba se'e atu hátan ba sira nia problema. Eletrisidade sai faktor importante ba ema nia moris hodi bele halo movimentu ho diak, maibe Realidade hatudu katak too ohin loron rai Atouro sei nakukun nafatin no populasaun sei moris iha nakukun laran".

Suco Macadade, hanesan Suco ida nebe dook liu Suco hotu-hotu iha Atauro. Agora dadaun bele hetan ona aksesu transporte. Mesmu estrada nee foin mak tama iha faze pengerasan. Kestaun Prioridade iha Suco Macadade mak hanesan Kondisaun Escola Primaria mak aat liu tiha ona no hein para anin bot mai Sobu deit. Ida tan mak, persiza tebes governu hadiak sira nian kondisaun merkadu nebe la kondis no kakuluk taka ho Nu Tahan, agora kakuluk dodok liu ona. Tamba nee iha luta hamutuk nian konferensia da imprensas, nebe mak halao iha loron 16/4 hato'o nia Preokupasaun. Tuir Diretor Luta Hamutuk katak "semana ida tomak ami hamaluk sira iha neba no sente duni saida maka sira infrenta no tanba sa sira infrenta, tan nune ami hakarak husu ba iha orgaun nebe kompetente atu toma konsiderasaun ba iha difikuldades mak ita nian populasaun Atauro infrenta. Programa dezenvolvimentu tenki habelar ba fatin hotu iha rai timor leste inklui rai Atauro nebe sai hanesan eksemplu ba falta husi progarama governo rai nee nian konaba dezenvolvimentu.Ita tenke iha konsiensia nasionalismu nebe integradu, planeamentu ba dezenvolvimentu, nomos tenke integradu no iqual ba fatin hotu-hotu, inklui Atauro".

Enerjia Alternativu Biogas husi karau nia Foer

Arsenio Pereira da Silva
Enerjia alternativu atu dezenvolve maka bio gas husi karau nia foer, tamba bio gas nia iha valor barak, tamba ho teknologia simples ida ne'e ita bele hetan buat barak (bele hare iha dezeñu iha kraik).

Bio gas husi karau nia foer hetan valor barak, liuliu komunidade iha area rurais sekarik ita utiliza ida ne'e sai enerjia alternativu sei la estraga biodiversidade.

Hanesan ita hakiak karau bele fa'an, bele hetan proteina, kria kompost organik, bele kria ona gas atu sai eletrisidade no bele te'in. Ho hanoin ida ne'e Redi Hasatil fasilita nia membru sira ba halo studi komparativa iha Indonesia i mai implementa ona hanesan Caritas Dili implementa tiha ona iha Maubara Loes.

Animal nia foer nebe ema dehan dois, ne'e dois duni tamba nia iha unsur Methan Tinggi no karbondioksida nebe barak mak kria biogas. Kuandu ita hare teknikamente atu kria biogas ne'e, simples liu hanesan karau nia foer tampung iha tabung durante semana 3 nia laran bele sai ona biogas tamba tasak ona no-mos iha tabung laran nia rasik halo prosesu fermentasi. Mesmu atu halo konstruksaun primeiru bale gasta osan lubuk ida. (Surya Online kamis, 13 Desember 2007).
Halo konstruksaun Bio Gas bele han tempu no presiza gasta osan. Maibe ne'e mak alternativu ita atu kria rekursu lokal no ramah lingkungan.

Enerjia ne'e nia iha risku ba meu ambiente no agrikultura?
Bio gas ida sei la fo risku ba agrikultura tamba sei la estraga biodiversidade, ita bele hare, kesi karau bele kontrola animal labele estraga buat seluk, nia foer bele halo gas, hahan restu bele sai mulsa ba ai-horis no bele sai kompos, nia hahan bele kuda rasik, sei la kria monocultura, tamba nia pakan bele kuda intercroping ho tanaman inti (lutu moris, ai-horis satan teras).

• Sei la terkontamina ho residu kimiku buatan tamba laiha material ruma nebe husi kimia buatan wainhira ita kuda ai-han karau ho sistema lutu moris.
  
• Sei hamenus konsumi ai sunu.
  
• Hamenus erosaun.

Iha Risku ba saude?
Se konstruksaun no luhan halo besik uma bele kria aroma nebe la gosta tamba karau nia foer maibe teknikamente kria nia instalasaun no kontruksaun diak sei la hamosu aroma dois, nune'e mos konstruksaun karau luhan iha manutensaun hamos alende ida ne'e mos ba saude diak tamba la kontamina ho residu kimiku buatan ruma.

Ita hare ba global katak enerjia folin karun tamba mina folin sae maka'as no to tempu ruma mina no gas sira ne'e sei mohu, antau mundu laran tomak buka solusaun atu buka enerjia alternativu ruma hodi atende nesesidade ema nia. Maibe? Enerjia alternativu sira kria fali inbalansu ba ambiente, saude no seluk tan.

Ezemplu: Inbalansu ambiente, tamba sekarik ita hakarak kria ai-horis ruma hodi sai material ba enerjia entaun ita kria ona monocultura, estraga ona biodiversidade klaru ita presiza material barak entau ita la fo valor ona ba ai-horis seluk nebe tuir lolos sei iha valor no funsaun seluk. Pior liu uza pesticida, herbicida, fungicida kimiku.

Ezemplu seluk: iha Brazil kria Agrofuel: ho nia material batar no forekeli, batar ho forekeli hanesan ai-han ba ema, maibe kuandu ida sai fali ai-han ba besi aat sira ne'e antaun ita ema sei halo kompetisaun makaas ho motor kareta tamba ema iha orientasaun kuda batar atu fa'an ba fabrika hodi halo ba mina i saida mak ita atu konsumi? Pior liu tamba se batar sira ne'e fabrika presiza lalais entau agrikultur tenki uza pendekatan kimia hodi produz lalais batar, ne'e bele afeta ona ba meu ambiente, otomatikamente kria MONOCULTURA.

Klaru que batar, ai-farina, tohu shorgum sira ne'e hanesan alternativu enerjia husi biomassa nebe liquid/been, hanesan sai: biotenol, biooil no biodiesel.

Ezemplu seluk: Biodiesel seluk nebe uza aion mutin ou "Jatropha Curcas L" ba alternativu ida hotu hanesan mesmu alternativu ida atu atende nesesidade ba diesel maibe nafatin kria monocultura nomos sei estraga nafatin biodiversidade. Alemde ida ne'e mos neineik agrikultur sira sai buruh tani iha nia rai rasik no dependenti.

Iha Timor sekarik ita uza alternativu sira hodi intensaun ba fabrika ita sei kria barak liu dependensia tamba ita hatene katak ai-han atu konsumi mos menus area produktivu ba halo produsaun alimentar ki'ik, sata'an ita kuda ai-horis hodi konsumi depois ita kompete fali ho motor kareta.

Ezemplu seluk: iha Indonesia kria monocultura ba kelapa sawit alende uza ba biofuel nomos uza produtu sira seluk hanesan kosmetika nomos hahan seluk, nst. Mesmu iha mundu kelapa sawit hanesan produtu andalan ba nasaun tropis sira, liu-liu kuandu mina mentah folin sae USD.70/ barel. Iha Indonesia 5,3 juta ha. Kelapa sawit 2004 "reportajem husi Friends of the Earth-Netherlands. Hanoin tok biodiversidade hira mak estraga ona?

Rekomenda ba governu:

1. Sekarik kuda "Jatropha curcas L" iha foho lolon nebe la produktivu ba agrikultura hanesan husi Metinaru to Laleia, no Tasitolu to'o Liquica. So nune'e mak ita hare bele iha valor no funsaun barak. Maibe se kuda "Jatropha curcas L" ba iha lahan produktivu ba agrikultura sira ne'e entaun sei estraga nafatin no kria kiak ba agrikultur ki'ik sira.


2. Governu fasilita komunidade iha area rural atu fo treino no kapasita uza bio gas husi karau nia foer.


3. Antes atu halo akordu ruma ho kompania atu kuda "Jatropha Curcas L" ou seluk tan se bele halo koordinasaun entre ministerial.


4. Studi kelayakan ba analisa dampak lingkungan (AMDAL)


5. Agrikultur sira komprende uluk antes implementa. (valor ekonomia, ekolojia, sosial no kultural).

Proteza: Rai, we'e, fini, no valoriza produtu lokal.

GLOBALIZE HOPE
GLOBALIZE STRUGGLE

GLOBALIZASAUN DA LUTA
GLOBALIZASAUN ESPERANSA......

Dezeinhu ida ne'e hatudu fungsaun Kria instalasaun biogas husi karau nia foer iha valor ekonomia, ambiente no saude.

Artista Timor, Indonesia no Australia Rejeita Sai Vitima

Angie Bexley (Angie.Bexley(a)anu.edu.au)*
Iha fulan dezembru 2006, artista hosi nasaun tolu servisu hamutuk hodi kria dialogu laos iha nasaun ida deit ba diferensia sosial, politika no realidade kultura liu hosi media pinta.

Kolaborasaun ne'e hamosu mapa boot haat ne'ebé ilustra istoria injustisa estadu, konflitu, meiu ambiente no esplorasaun rekursu, no esperansa ba futuru. "Ami Rejeita Vitima" ne'e nudar deklarasun konaba nesesidade ba komunikasaun kultura entre Australia, Indonesia no Timor-Leste. Projetu ne'e halo ho kbiit rasik no involve grupu arte koletiva tolu: Gembel (Timor-Leste), Taring Padi (Indonesia) no The Culture Kitchen (Australia).

Ideia ba projetu mosu iha Canberra, iha ne'ebé artista pinta husi The Culture Kitchen ho artista Taring Padi hela iha Australia, Jon Priadi no Aris Prabawa. Hahu ho projetu ne'ebé hahu iha Canberra ho lalais lao liu tiha fronteira kapital Australia. Bainhira sira koalia barak, projetu ne'e moris buras liu tan no nia kapasidade atu inkopora ho perspetiva artista Indonesia no Timor-Leste.

Iha faze viajen, artista sira involve iha dialogu, konversa no visual, isu lokal no internasional. Sira komunika liu hosi variedade media visual no pinta, inklui pinta hena boot, ai, stensil no pinta ho liman. Projetu ne'e rezulta filme koloridu ne'ebé dokumenta prosesu servisu. Filme ne'e halo ho sound-track ne'ebé inklui knananuk husi Gembel, banda hosi Jogjakarta, Shaggydog no Teknoshit (eis banda Taring Band).

Koletiva Indonesia Taring Padi (literalmente, nehan hosi planta haree no metafor hosi poder povu) harii 1984 iha Jogjakarta. Grupu ne'e koñesidu ho kretividade ne'ebé emfaze iha koletividade, orienta liu ba prosesu ba produsaun arte. Taring Padi iha istoria halo kolaborasaun ho sosiedade seluk grupu focus iha nasaun laran mos iha nasaun liur ho aprosimasaun ne'ebé orienta ba povu.

Artista ne'ebé baze iha Canberra forma The Culture Kitchen iha Dezembru 2006 ho objetivu atu komunika sira nia arte no sira nia preokupasaun sosial no politika. Artista sinti katak dalan ba Australianu barak iha esperiensia no hatene kultura seluk dala barak liu hosi media deit hanesan televizaun no notisia hosi kompania boot sira. Projetu ne'e nudar oportunidade ba artista hosi kultura diferente atu diskuti isu jeral diretament, hosi sira nia perspetiva rasik ho hakotu tiha manu ain sira.

Naran koletiva Timor oan, Gembel ne'e nudar liafuan Indonesia ho sentidu 'moris iha dalan/gosta halo problema', no nudar reflesaun diretu ba oinsa ajensia dezenvolvimentu, governu no media internasional haree juventude timor. Figura juventude Timor oan nudar kria problema, sunu uma no naok sasan sai nudar imajen jeral durante krize 2006 ne'ebé akontese iha nasaun kiik. Membru hosi Gembel hakarak hatudu katak Juventude Timor laos atu estraga no la kontroladu.

Iha lian ne'e, Gembel refere ba 'Maubere', inisialmente termus derogativu ne'ebé Portugez uza atu refere ba Timor oan iha tempu kolonizasaun iha illha sorin balun (1511-1975). Termu Maubere hasae iha tempu revolusaun 1970, ne'ebé signifika orgullu nudar Timor oan no sai simbolu forte iha movimentu ba independensia Timor. Ba grupu ne'e, Gembel simboliza Maubere no esensia liu ne'ebé signifika juventude Timor moris iha sidun sosiedade Dili iha parke Borja da Costa.

Kolaborasaun liu fronteira kultura
Jon Priadi no hau rasik, armada ho mapa, halo viajen dala uluk ba Timor-Leste no servisu hamutuk ho artista Timor. Tamba preokupasaun seguransa iha Timor, desdie katak The Culture Kitchen sei viajen ba Indonesia atu servisu ho Taring Padi iha Jogjakarta. Iha Jogjakarta, Taring Padi no The Culture Kitchen haree no foti imajen Gembel sira servisu atu pinta no mos filma mensajen iha kamera atu hetan komprensaun ba kontestu no kondisaun servisu artista iha Timor-Leste.

Atu servisu iha mapa, grupu halao diskusaun inisial konaba topiku diferente iha ne'ebé sira hakarak servisu.Troka istoria, ideias no troka prespetiva no sira deside atu servisu. Ida hahu pinta imajen ida, sira seluk si kua no grupu seluk sei imprime imajen iha mapa.

The Culture Kitchen adapta ho diak ba kondisaun servisu ne'ebé diferente radikalmente ba pinta manual iha Indonesia, hanesan uza 'forsa ain' atu tau karimbu ba imprime iha mapa. Artista Australia moris ho kostume ba sensu nain koletivu. Bernie Slater, ida husi pioneiru The Culture Kitchen esplika: "Servisu koletivamente diferenti oinsa ita servisu normalmente iha uma. Sentidu arte politika sai forte bainhira konaba povu servisu hamutuk halo arte kompara fali ho nain ba servisu.'

Ba esperiensia multiple ba servisu hamutuk iha mapa fo projetu ba lidun kritiku. Artista Fitriani, fo pontu importannte: 'Iha projetu, ami servisu hamutuk, ami halo arte hamutuk, liu ne'e ami mai aprende problema ba ami nia maluk iha Timor-Leste no Australia. Sira mos mai atu komprende problema ne'ebé ami hasoru iha Indonesia. Hamutuk, ami espera atu komunika ami nia preokupasaun ba audiensia luan liu.'

Kolaborasaun entre Timor oan no Indonesia bele fo surpreza tamba Timor-Leste vota 80 % ba independensia hosi Indonesia. Krime ne'ebé Indonesia komite durante okupasaun tinan 24 dokumenta ho diak. Maibe artista Gembel ho lais fo sai katak komitmentu atu buka justisa ba sidadaun Indonesia, hodi hateten:'Laiha demokrasia iha Indonesia signifika laiha justisa iha Timor-Leste.' Ida repete dala barak entre artista Timor oan no Indonesia ne'ebé refere prosesu justisa ne'ebé buka hela ba krime komite hasoru humanidade durante ukun ordem foun. Grupu pro demokrasia barak hosi Indonesia suporta direitu ba ukun rasik iha Timor-Leste.

Agora, iha Timor-Leste ne'ebé independente, simu kultura progresivu hosi Indonesia, artista Timor oan fo bemvindu. Ida ne'e espika tamba sa Timor oan haree laiha problema atu adopta liafuan Indonesia hanesan koletiva. Artista rua hosi Taring Padi ne'ebé moris kleur iha Timor desde independensia dezenvolve media, inklui kua ai, imprime ba hena boot no liman badain hosi au no halo surat tahan

Knaar ikus ho sasukat metru 3.30 x 2.50, ho tema ho konesaun: direitu umanus, rekursu, meiu ambiente no hamutuk. Screen no imprime imajen iha ai nudar ida ne'e interesante tebtebes atu konta sira nia istoria rasik. Refujiadu ne'ebé ho difikuldade simu ho ro ho kilat boot kompletu; refujiadu hela iha lona UNHCR nia okos; labarik feto taka nia oin ho nia liman iha fatin konflitu Timor-Leste, Aceh, Poso, Sulawesi. Mapa seluk hatudu stensil ho figura umanu iha ne'ebé kiik liu hanesan sira monu iha pipa mina ne'ebé lokaliza iha tasi Timor. Hena boot ikus suku hosi kua ai halo koloridu simboliza bandeiras.

Mensajen mak esperansa ida, husu solusaun paz ba situasaun politika, ekonomia, konflitu sosial ne'ebé iha relasaun ho nasaun tolu. Artista Taring Padi, Doddi, fo konkluzaun kapas: 'Ami kontente iha ne'e maibe ami mos koalia seriu. Ami koalia konaba realidade sosial iha nasaun idaida no injustisa estadu iha ne'ebé povu bain-bain sai nudar vitima. Too ona sai nudar vitimaAmi rejeita atu sai vitima!'.

*) Agora kompleta hela PhD iha Independensia Timor-Leste no Juventude iha Australian National University (ANU). Artigu ne'e fo sai tiha ona iha insideindonesia.org no hakerek nain haruka ba kla'ak atu publika.

Labele Rona Banku Mundial, FMI no WTO

nuno rodriguez TCHAILORO
Molok baze de apoiu rahun iha tinan 1978, movimentu populares ho intereses popular forte tebtebes iha Timor-Leste. Indonesia harahun baze de apoiu, movimentu populares mos naksobu, ikus mai objetivu luta sai tiha deit duni militar Indonesia sai hosi Timor-Leste; movimentus populares mos too ohin loron la eziste.

Maski iha esperiensia kuaze hanesan, Mozambique hetan independensia iha tinan 1975. Movimentu populares barak mak rahun iha tinan 1980 mai leten no halo Mozambique rasik adopta sistema merkadu livre. Diferensia ho Timor-Leste, movimentus populares kontinua forte no luta ba interese popular.

Diretor ezekutivu Diamantino L Nhampossa hosi União Nacional de Camponeses (UNAC) hosi Mozambique fahe nia esperiensia durante semana ida iha Timor-Leste. Mozambique nudar nasaun sosialista ne'ebé transforma an ba nasaun kapitalista iha 1987, hanesan mos Timor-Leste, iha intervensaun esterna atu kria destabilidade ba politika interna Mozambique hodi kria milisia ho naran RENAMO.

Mozambique nudar nasaun ida ho luan 799.380 Km ho populasaun hamutuk miliaun 20, no hosi numeru ne'e, miliaun 15 mak moris hanesan kamponeza. Iha sistema politika rai ne'ebé relevante tebtebes atu garantia povu nia moris. Mozambique nudar nasaun ida ne'ebé iha ezemplu diak oinsa rezolve problema rai. "Movimentu libertasaun hosi 1964 too 1974 nudar libertasaun ba povu no mos libertasaun rai", dehan Diamantino ba kla'ak iha edifisiu Oxfam (11/4).

"Tamba luta hosi movimentu sosial iha Mozambique rai laos commodity ne'ebé bele fa'an no sosa. Rai iha funsaun sosial ba interese sosial", Diamantino hatutan. Ohin loron kamponeza kiik sira la dun preokupa ho rai tamba estadu rasik rekoñese: rai estadu, rai komunidade, rai lisaun, bainhira estadu iha investimentu ruma estadu tenki halo konsultasaun uluk ho komunidade no komunidade rasik iha direitu atu halo okupasaun. Mozambique rasik adopta politika rai hirak ne'e tamba hakarak luta ba interese povu mayoria no lakohi repete erro ne'ebé nasaun viziñu sira komete, tamba privatizasaun hamosu deit terus ba povu kiik sira.

Buat importante ne'ebé Diamantino fo sai mak oinsa kamponezes ka agrikultor sira mak tenki sai rasik autor ba sira nia luta, sira nia luta labele ema seluk mak reprezenta. "Iha Mozambique kamponeze mak hamrik hodi organiza no mobiliza an laos NGO," Diamantino hateten. Kamponeze sira bele halo advokasia laos deit iha sira nia distritu ka suku det maibe iha nivel nasional no internasional. Tuir UNAC nia esperiensia ida ne'e ema toos nain sira bele halo rasik, la presiza ema seluk atu kontinua hodi reprezenta povu nia interese.

Mozambique nudar nasaun sosialista ne'ebé komesa transforma nia an ba politika neo liberalismu iha tinan 1987. Maski ho prezensa banku mundial no WTO maibe sira setor importante hanesan agrikultura, Mozambique kontinua kontra ideia privatizasaun ne'ebé organizasaun internasional sira ne'e hakarak impoen.

Bainhira halo komparasaun konaba oinsa bele movimentu sosial ne'ebé forte iha Timor-Leste, Diamantino hateten: "Movimentu sosial tenki mosu hosi baze, hahu ho movimentu kiik no kontinua halo konsientizasaun". Tuir nia Timor iha poder potensial atu forma movimentu kamponeza iha ne'ebé forte tamba iha lingua ida ne'ebé populasaun komprende hotu, ida ne'e diferente iha Mozambique.

UNAC rasik nudar movimentu sosial ida ne'ebé forte tebes iha Mozambique. Movimentu ne'e ho membru hamutuk 67.000 no iha asosiasaun hamutuk 1250 iha Mozambique tomak. UNAC rasik hanesan mos HASATIL nudar redi agrikultura Timor-Leste sai mos membru redi internasional agrikultor sira La Via Campesina.

Tuir Program Manager Oxfam Australia Keryn Clark hateten ba kla'ak: "UNAC iha esperiensia oinsa mobiliza povu hosi baze no halo advokasia iha nivel as. Bainhira ami koalia ho ami partner katak iha Timor buat hanesan la eziste, koperativa, hasae produtividade. Too agora laiha organizasaun massa. Esperiensia Mozambique importante tebtebes ba Timor, dezafiu ne'ebé sira hasoru, susesu ne'ebé sira hetan. Sira aprende buat barak no halo salan barak mos."

Sekretariu Estadu ba Agrikultura no Peska Markus da Cruz iha Seminariu ne'ebé Hasatil organiza 11/4 hateten katak: "Esperiensia sira hanesan ne'e importante atu ita hotu aprende hamutuk, maibe Mozambique dook tebtebes."Diamantino hateten: "Atu halo Timor-Leste ba oin no hetan progresu labele rona Banku Mundial, Fundu Monetariu Internasional no World Trade Organizasaun". Organizasaun hirak ne'e reprezenta interese kompania boot nian laos povu nia interese.

Tesi ai Parapah kontra lei

agusthina XIMENES
Tesi ai Parapah ho kuantidade boot ne'e hahalok ida ne'ebe sei fo impaktu negativu ba ekolojiku Timor-Leste, tanba too ohin loron, faktus hatudu katak estragus iha area tasi ibun komesa seriu, husi tesi ai-parapah arbiru, soe foer lixu arbiru too estragus iha tasi laran hanesan kaer ikan ho soe bomba, no seluk tan.

Ralasiona ho aksaun negativu ba meiu ambiente Timor-Leste husi ema balun, foin dadaun liu ba, 10 Abril, ONG Haburas Foundation, halo nota kritika iha konferensia da imprensa, katak iha area Metinaru, ai-parapah hetan estragus boot husi aktividade ilegal ema balun. Tuir kalkulasaun husi Haburas Foundation, ai-parapah hirak nebe tesi ne’e halibur hamutuk liu tonelada 10.

Hahalok tesi ai-parapah arbiru husi entidade balun sei fo impaktu negativu ba komunidade Metinaru nebe hori uluk kedas moris no depende ba rikeza ekolojiku husi zona kosteira ne'e.
Meiu Ambiente jeralmente importante ba ita emar moris no buat horis seluk iha planeta ne’e. Tanba ne’e ita presiza kuidadu.

Maibe, to’o ohin loron, ema barak iha Timor-Leste, seidauk komprende didiak valor positivu husi meu ambiente. Tanba la komprende nomos la preokupa ho meiu ambiente, maka akontisimentu tesi ai arbiru, soe foer arbiru, no hahalok aat nebe fo impaktu negativu ba natureza akontese ba beibeik. Ita sei hakfodak hotu wainhira ninia impaktu hahu mosu.

Iha konferensia da imprensa ne’e hateten katak, ekipa Haburas Foundation observa no identifika ona katak, ai parapa ne'ebe ema tesi, ninia kuantidade boot tebes. Ai Parapa hirak nebe tesi ona ne’e tau hamutuk iha fatin 10 resin. Iha fatin 2 maka kuantidade liu tonelada 5. Aksaun tesi ai parapa ho kuantidade boot tebes ne’e tama ona ba kategoria nudar zona ida nebe iha futuru bele hetan ameasa ekolojiku boot.

Iha razaun hirak nebe mak Haburas Foundation foti katak, Ai-Parapah sira lakon dadauk nia funsaun nudar filtrasaun biolojiku nebe dadauk ne’e manten hela ekilibriu ba be husi tasi no husi foho iha area neba.

Impaktu seluk husi estragus ne’e maka sei kria degradasaun nebe sei fo ameasa boot ba biodiversidade kosteira zona nebe refere, hamenus kapasidade fiziku husi ai-parapah sira atu satan netik erosaun husi tasi ka efeitu husi laloran boot ruma nebe bele mosu iha futuru ka husi laloran boot ruma husi mudansa klimatika nebe dadauk ne’e mundu tomak hasoru.

Impaktu seluk nebe mos importante atu entidade sira hatene katak, estragus ai-parapa ne’e mos sei hamenus kapasidade ekolojiku husi zona mangrove ne’e ba elementu biolojiku nebe maka depende ba habitante mangrove.

Istorikamente, dadus nebe hateten katak, husi 1972-1999, Timor-Leste nia floresta hetan redusaun husi 1,1% tinan ida ka ho totalidade 24%. To'o dadauk ne'e ai-horis ka floresta iha Timor Leste hela deit 35% ka 0,5 milaun hektar deit ona (JICA Study Team, 2007). Ho nune'e maka husi prespektiva Haburas Foundation nian katak, "tesi ai Parapah ho kuantidade boot ne'e hahalok ida ne'ebe kontra lei no bele fo impaktu ekolojiku boot ba Timor Leste no mos impaktu ekolojiku ekonomiku no kultura ba membru komunidade Metinaru ne'ebe hori uluk kedas moris no depende ba rikeza ekolojiku husi zona kosteira ida ne'e".

Relasiona ho tesi ai-parapa iha Metinaru, jornalista kla’ak mos konsege dada lia ho Prezidente komisaun D, Brigida Coreia. Ba kla’ak, Brigida hateten, "karta kona ba problema tesi ai parapah ne'e, ami simu ona husi NGO Haburas Foundation, no tuir observasaun Haburas nian, sei fo impaktu negativu ba ambiente tasi nian.”

Deputada Brigida Coreia husi bankada CNRT ne’e mos hateten katak, Komisaun D Parlamentu Nasional nebe tau matan ba Agrikultura, Pescas, Florestas, Recursus Natureza no Ambiente, halo ona enkontru ho Ministru Agrikultura Floresta no Pescas, Mariano Sabino, koalia kona ba estragus ai-horis ne'ebe iha Timor laran".Karta husi ONG Haburas Foundation ne’e, mos rekomenda ba Komandante Polisia Distritu Dili, maibe wainhira kla'ak konfirma, katak karta ne’e sedauk too iha komandante Polisia Distritu Dili.

Folin Foos Sae Bebeik, Rona Ami Nia Halerik

nico zecoro SANTOS
Folin foos iha merkadu sae ba beibeik, povu kontinua halerik tamba laiha ona kbiit atu sosa foos. Barak ne'ebé hanoin katak ho governu foun sasan sei sai baratu. Oinsa povu bain-bain nia haree konaba folin foos?

"Foos ho nia apalidu folin sae, hanesan naran ida nebe sokata no sin ona iha povu nasaun nee nia tilun nomos ho apalidu ida nee, governu AMP hakarak atu sarani apalidu nee hanesan prezente boot ba povu kiik sira. Povo kiik sira nebe moris iha risku ekonomia minoria," tenik Sr. Avilha Borges. Realidade hatudu katak povu iha rai nebe luan atu uza hodi kuda ai han nebe bele fo valorizasaun boot ba nasaun nomos bele resposta rasik nesesidade povu hotu. Nomos bele halo esportasaun, sei la importa fali aihan mai hosi rai liur hanesan akontese dadauk nebe ita hotu haree, hatene no sente rasik nia fatores negativu nebe boot liu ba povu nia moris. Povu maka sei sai nafatin vitima ba bebeik.

Avilha Borges hatutan ba kla'ak iha ninia hela fatin Fatuhada: "Hau rasik la konkorda ho foos folin nebe sae makaas tamba ita hotu hatene katak povu kiik agora maioria laiha servisu. Sira nebe servisu nudar security, dasa rai, sira nia salariu nee la permite atu bele hola saida deit maka sira hakarak, hanesan iha ekonomia koalia katak kebutuhan itu bermacam-macam (nesesidade nee oinoin,red) portantu ema la presiza deit han foos maibe ema iha nesesidade seluktan hanesan uma, edukasaun, saude nebe diak, ou buat nebe sai hanesan nesesidade ba ema ida-idak ninian problema ekonomia iha moris loron-loron.

Sr. Avilha mos husu ba governu AMP atu labele hatoman an ho kondisaun nebe gosta importa ai-han mai husi rai liur. Lakohi hare ba ita nia produtu lokal nebe ita nia povo rasik iha. Povo iha rai barak, luan no buras maibe husik sai izoladu deit, antaun governu tenke toma kondisaun diak ba ita nia agrikultores sira, fo hanorin sira konaba oinsa kuda ai han ida nebe diak no tenke hare ida nee sai hanesan problema baziku laos problema bain-bain.

Sra. Laura Belo hanesan povo kiik ida nebe tur iha Bidau Lecidere hatutan ba kla'ak iha nia hela-fatin katak nia rasik la aseita ho foos nia folin nebe sae makas. Governu la haree ba kotuk katak ekonomia povo kiik nian maioria fraku. Oinsa ami bele sosa foos atu sustenta ami nia familia, satan ami laiha servisu. Depois ita halo komparasaun ho funsionariu ETTA sira simu osan no foos antaun ami nudar povu kiik ami hetan fali saida. Iha parte seluk, Sra. Laura Belo mos hatutan ba jornalista kla'ak iha ninia tur fatin Bidau Lesidere katak," Husu liuliu ba governu atu hatun foos nia folin no buka dalan oinsa atu povu kiik sira nee bele dada iis uituan. Tamba laos governu maka buka osan fo ba povu maibe povo rasik dezenraska tun sae hodi hetan netik dolar 1 ou 2 ba sosa foos. Povu ninia osan barak nebe mai husi nia riku soin maibe osan nebe sai hanesan povo ninian, sira gasta lahare ba kotuk katak loron ikus sei iha problema. Presiza duni atu governu tau matan ba buat hirak nee, no labele tan kastigu bebeik povu ho manobra politiku, iha kraik povu terus hela maibe sira toba, han, sae kareta diak. Sira karik lahatene buat nebe sira uza, ida nee povu ninian no sira haluha buat balun katak sira tur iha leten atu hare povo nebe terus laos kastigu fali povu.

"Ita dehan Fretilin ladiak mais uluk foos folin sei menus, agora AMP ukun sai at liutan. Governu hatun hasae fos ninia folin konforme sira nia hakarak. Nunka haree ba sira nia okos katak ema iha kraik nee ninia moris oinsa, ida nee maka demokrasia ka demokrasia nee ba imi deit karik"? hatutan Laura Belo.

Nudar Profesores, Filipe Mascarinhas mos tenik: "Kona ba foos folin nebe sae nee, tamba ita henesan nasaun ida nebe foin maka ukun an, ida nee konsekuensia ba ita atu bele simu. Maibe iha parte seluk governu tenke tau matan ba problema hirak nee. Laos tur deit, maibe tur iha leten para atu tau matan ba povu kiik sira nebe presiza tulun".

Matan Wen Horta Akompana Marxa ba Paz

almerio ALVAREZ, zevonia VIEIRA
Hanoin hetan loron 11 Fevereiru (11/F-red), imajinasaun ita nian la ba iha buat seluk. Prezidente da Republika, Jose Ramos Horta hetan tiru no kanek. Alfredo Reinado hamutuk ho ninia membru Leopoldinho mate kedas iha Prezidente da Republika ninia rezidensia.

Dili, 11/F nonok no kalma. Ema hotu hakarak buka tuir informasaun loloos konaba saida mak akontese ona ba Prezidente da Republika, Ramos Horta. Iha loron 11/F, liafuan dame no domin, teki-tekir lakon tiha deit, hanesan we boot husi foho mak lori ba iha tasi.

Akontesementu 11/F, dame, domin, no matan wen ne'ebe mak lakon, derrepente mosu fali espiritu bo'ot ida, oinsa Timor-oan hotu-hotu hamutuk atu kria estabilidade iha rai ida ne'e. "Hau fo hau nia agradese ba partidu Fretilin, tanba durante ne'e Fretilin halo kolaborasaun ida ke diak ho estadu atu kria estabilidade, tenik Prezidente Ramos Horta iha konferensia imprensa ne'ebe mak halao iha Aeroportu Internasional Prezidente Nicolao Lobato Komoro Dili.

Labarik kiik-oan, joven, ferik katuas sira, kaer bandeira RDTL hamrik no nakonu iha dalan-dalan; hahu husi Aeroportu Komoro to'o iha Uma Fukun, Parlamentu Nasional. Antuziasmu komunidade sira hodi simu Prezidente mos bo'ot.

Iha estrada, estudante universitaria, estudante husi eskola pre-primária, pre-Sekundaria, Sekundaria, komunidade, inklui ema estranjeiru, kaer spanduk ho kor oioin, kesi metin iha populasaun sira nia liman. Spanduk balun hakerek nune'e, bem vindo Prezidente da Republika. Spanduk seluk fali hakerek nune'e : "Ami povu Timor-Leste hakarak para Prezidente Ramos Horta asume fali ninia kargu nu'udar Prezidente."

Spanduk hamutuk 20 resin ne'e, bele dehan reprezenta apoiu povu Timor-Leste nian ba Prezidente da Republika atu assume fali ninia kargu nu'udar Xefi do Estado. "Hau nia laran kontenti, tanba Prezidente da Republika bele fila hikas mai Timor-Leste. Povu kiik-kia sira hadomi tebtebes Prezidente Ramos Horta," subliña Anabela Maria (35) ba kla'ak, iha Komoro Dili, wainhira akompaña Laureadu Nobel da Paz 1996 ne'e.

Buat ida ke úniku husi marxa ba paz ne'e mak militar no polisia hamutuk ho forsas estabilizasaun internasional tau siguransa máximu iha fatin hotu-hotu. Hahu husi Aeroporto Komoro tama to'o iha Uma Fukun Parlamento Nasional. "Antes atentadu 11/F, seguransa iha Dili laran metin hanesan ne'e durante oras 24 nia laran karik, ita nia Prezidente, Sr. Ramos Horta la hetan tiru husi Alfredo Reinado ho ninia grupu sira," katak Manuel Sarmento (46) ba kla'ak iha Palacio Governu nia oin, hafoin asiste marxa paz hodi simu Laureadu Nobel da Paz ne'e.

Maske Prezidente Ramos Horta fila hikas ona mai Timor-Leste, maibe iha problema barak ne'ebe sai nu'udar naha todan tula hela iha ninia kabas rasik. "Hau nia preukupasaun liu mak ne'e; iha oras ne'e daudaun iha mundo tomak hahan la iha. Husi Bangladéx to'o Haití, Indonezia, Filipina folin foz sae tebtebes. Sira ne'ebe mak uluk kiak, agora kiak tebtebes," esplika Ramos Horta, iha ninia diskursu iha Uma Fukun, Parlamentu Nasional Kinta-feira 17/04, foin lalais ne'e.
Prezidente da Republika mos foka maka'as, konaba ezistensia Gastão Salsinha ho ninia grupu sira ne'ebe mak durante ne'e sai alvu ba Komando Operasaun Konjunta "HALIBUR; liliu ba Estado Timor-Leste. "Hau husu ba nia (Gastão Salsinha-red) para entrega aan. Besik tinan rua liu tiha ona, nia la kohi rona hau nia liafuan. Lalika rona nafatin ema balun ne'ebe mak ba hatama foer no veneno iha imi nia tilun. Hakarak rona Prezidente Ramos Horta Nobel da Paz ou hakarak rona aventureiru balun ne'ebe hakarak sobu nasaun ne'e," esplika Prezidente da Republika, Ramos Horta nakonu ho sentimentu emosional no matan wen.

Ramos Horta mos husu ba Komando Operasaun Konjunta "HALIBUR" atu la bele oho Salsinha, maibe buka mieus halo nusa para Salsinha bele entrega aan. "Hau halo apelu ba Gastão Salsinha no nia ema sira. Labele dada nafatin nia ema ba mate. Ne'e duni hau husu ba Gastão Salsinha entrega kilat no entrega aan ba iha justisa," apelu Laureadu Nobel da Paz ne'e ba Salsinha ho ninia grupu sira ne'ebe mak to'o agora sei subar hela iha ai-laran.

Kuandu Gastao Salsinha entrega aan ba iha justisa, tribunal rasik bele hatene, se mak haruka Alfredo Reinado ho Salsinha atu halo atentadu iha 11/F ba iha Prezidente da Republika. Ho meius hanesan ne'e duni mak justisa bele lao. "Fatin ne'ebe nia (Gastão Salsinha-red) bele koalia mak ida deit. Tribunal. Laos tanba nia kulpadu ou inosentu. Ita la hatene. Tanba tribunal mak foti desizaun se mak inosentu no se mak kulpadu," afirma Prezidente Ramos Horta.

Prezidente Ramos Horta rekopera fila-fali ona husi kanek todan ne'ebe mak nia hetan wainhira Alfredo Reinado ho ninia grupu sira halo atentadu iha 11/F. Depois atentadu 11/F, Komando Operasaun Konjunta konsege kaer tiha ona autor atentadu, hanesan Susar ne'ebe entrega aan iha loron 2 Marsu. Ema hotu espera katak loron 11/F, la'os deit istoria nakukun ba País ida ne'e. Importante mak justisa tenki implementa halao ho loloos. Mensajen ne'ebe mak populasaun sira hato'o ba Prezidente Ramos Horta iha loron 17 Abril, ne'e mensajen marxa ba paz no justisa. Povu hakarak hatene loloos, se mak hatama "veneno" ba iha Alfredo Reinado no Salsinha atu halo atentadu ba iha Prezidente da Republika no Primeiru Ministru.