(KADI): Reformas Ka Dalan Ba Governasaun Anti Demokratiku? (Edisaun III)

BIKELI

Introdusaun

Akontesimentu 11 Fevereiru sai hanesan istoria boot ba rai ne'e. Ramos Horta ne'ebé seidauk halao nia pasta nudar Prezidenti Republika hanesan bain-bain, iha fulan ida nia laran raii kiik ne'e liu husi esperiensia politika ne'ebé interesante no karik uniku iha mundu tomak.

Prezidenti Republika ne'ebé kanek no ho vizita Prezidenti Parlamentu Nasional ba Portugal halo Vicente Guterres sai nudar Prezidenti Republika Interinu Esperiensia hamutuk ho Primeiru Ministru AMP ne'ebé kaer pasta Ministru Defeza no Seguransa deklara estadu de sitiu. Hafoin 48 horas ho proposta mai husi governu AMP, Prezidenti Parlamentu Nasional Fernando La Sama deklara prolongamentu ba loron sanulu, no ikus deklara tan ba fulan ida liu husi le nota iha block note deit, laos dokumentu formal estadu nian.

Artigu 89 husi konstituisaun RDTL hateten katak bainhira prezidenti republika hetan susar ruma, prezidenti republika interinu mak halao knaar nudar xefe estadu. Maibe, realidade hatudu oin seluk Primeiru Ministru husi partidu CNRT ne'ebé iha kadeira 18, hafoin Fretilin ho kadeiras 21 iha Parlamentu Nasional mak kaer ukun rai ne'e. Tamba sa?  Prezidenti Republika Interinu Fernando La Sama husi PD hetan deit kadeira 8 iha Parlamentu Nasional. Maski nudar Prezidenti Republika Interinu karik laos nia mak kontrola implementasaun estadu de sitiu ne'e.  Tan se mak halao serbisu barak liu mak Primeiru Ministru ne'ebé mos kaer pasta ministru ba defeza no seguransa hodi implementa artigu 25 konstituisaun RDTL kona estadu de sitiu no lei ne'ebé regula estadu de sitiu.

Estrutura Governu AMP: Se Lori Ba Governasaun Anti Demokratiku?

Ema barak komesa preokupa no hahu husu se estrutura governu AMP sei lori ita moris ba governasaun anti demokratiku?  Hahusuk ne'e komesa mosu iha diskusaun orsamentu jeral estadu 2008, bele haree husi hahalok hafoin deklarasaun estadu de sitiu hetan aprovasaun iha Parlamentu Nasional. Ita bele haree mos bainhira Primeiru Ministru mak ba halo revista ba forsas armada ne'ebé tuir lolos knaar prezidenti interinu nian.

Artigu 67 no 69 konstituisaun RDTL haklaken kona sistema semi presidensial ne'ebé kaer husi orgaun soberanu hat: Prezidenti Republika, Parlamentu Nasional, Governu no Tribunais), hafoin ita bele kumprende saida mak kompetensia governu ne'ebé forma husi Primeiru Ministru, Vise PM, ministru no sekretariu estadus sira. Konsellu Ministru rasik aprova tiha ona estrutura governu AMP no lei orsamentu jeral estadu ne'ebé aprova iha fulan Janeiru 2008.

Liu tiha fulan nen, Prezidente Republika Jose Ramos Horta indijita Jose Alexandre Gusmao (JAG) hanesan Premeiru Ministru husi Partidu CNRT hodi forma governu ne'ebé maka ohin loron hanaran AMP, ita nia realidade politika hahu muda. Ita balun simplesmente hateten deit mudansa ida nee akontese tan iha duni governu foun maka ukun.

Kestaun ne'ebé mak  PM JAG relasiona formasaun governu ho membrus governu barak tebes husi partidu hat ne'ebé la manan iha eleisaun parlamentar 2007. Maibe, hamosu hamosu deit aliansa membrus Parlamentu iha Parlamentu Nasional hodi deklara aliansa maioria parlamentar laos fasil.  Maibe, fasil ba PM JAG hari estrutura governu ida ne'ebé boot tebes hodi halo lideres partidu hat ne'e haksolok ho nia mak hamosu duni numeru ministrus hamutuk 13, Sekretarios Estadu ne'ebé dependente ba Primeiru Ministros inklui Vise Primeiro Ministru hamutuk ema nain hitu (7), Sekretarios de Estadu no Vise Ministru nebe depende ba Ministrus sira hamutuk; ema nain ruanulu (20). Total membrus governu hamutuk ema hat nulu resin rua (42) inklui Primeiro Ministro rasik nudar mos Ministro ba Defeza no Seguransa.

Analista politika balun hahu deskonfia Primeiru Ministru AMP nian hamosu estrutura boot laos atu serbi interese povu maibe atu serbi interese aliansa nian hodi kaer metin aliansa parlamentar atu labele nakfera. Primeiru Ministru AMP labele harii estrutura governu ida kiik hanesan uluk ne'ebé ema barak kritika eis Primeiro Ministro Alkatiri ho nia estrutura governu anterior. Realidade ohin loron governu AMP nian boot liu governu anterior; poder barak konsentra iha PM JAG.

Tuir Dekretu governu AMP nian konaba estrutura organika governu hatudu katak Primeiru Ministru JAG nudar mos ministru defeza no seguransa laos deit kria serbisu ba ema AMP nia hodi kaer metin aliansa nee, nia rasik kontrola direitamente pastas Sekretarios de Estado balun tuir dekretu governu konaba estrutura organika ne'ebé la hari iha Ministerios sira nia okos, maibe, dependente ba Primeiru Ministru.

Pastas Sekretarios Estado sira nebe dependente ba Primeiro Ministro hanesan; Sekretaria de Estado do Konselho do Ministros; Sekretaria de Estado Juventude e Desporto; Sekretaria de Estado dos Rekursus Naturais; Sekretaria Estado Politika energetika; Sekretaria Estado Formasaun Professional e Emprego; Sekretaria Estado Promosaun Egualdade. Pastas Sekretarias de Estado hirak iha leten se sira la hamriik iha Ministerios ida nia okos nunee sira responsabiliza sira nia serbisu diretamente ba Primeiru Ministru. Nudar mos Ministro Defeza Seguransa PM JAG mos responsabiliza Defesa (F-FDTL no PNTL)

Se ita haree Konstituisaun artigu 117 konaba kompetensia Primeiru Ministru nian hanesan Chefe governu nebe presidi Konsellu Ministrus hodi hakotu desizaun politikas barak konaba lalaok ezekutivu ba dezenvolvimentu rai nee, ita se nota iha substansia dekretu lei konaba estrutura governu AMP nian, hatudu poder kontrole barak liu iha Primeiru Ministru nia liman.

Ita sedauk hatene tansa maka Primeiru Ministru mos hakarak kaer metin Defesa no Seguransa, no pastas Sekretarias Estado liu-liu mos Sekretaria Estado nebe maka trata assuntu minarai nian barak maibe analistas politika balun mos hahu hare ona katak tendensia nee bele hatudu dalan ba governasaun anti demokratiku ho la fahe serbisu sira nee ba ministrus sira.

Se ita haree husi Orsamentu jeral Estadu 2008 hanesan konfirma deit katak ho estrutura organika AMP Primeiru Ministru kontrola pastas sira nee no mos kontrola osan Estado nian direita ka indereitamente hamutuk 86. 517.000 dollares amerikanu.

Kaer Defesa i Seguransa no kontrola mos Sekretaria Estado ba Rekursu Naturais hatudu katak osan ho forsa karik bele halo tentasaun ba kualker ema ida atu hamosu governasaun antidemokratiku iha ita nia rai laran.

Karik ita se lato'o iha ne'eba maibe indikasaun ita bele haree ona ho ameasas ne'ebé maka Primeiru Ministru halo ba jornalistas sira no apoiantes Alfreido Reinado nian hafoin sai nudar Primeiro Ministro AMP nian, no hahalok durante implementasaun estadu de sitiu hafoin atentadu 11 Fevereiro bele indika ona buat ruma ba povu Timor-Leste.