Grupu Haksesuk Kla'ak (Discussion Group)

Subscribe ba Kla'ak Online
Email:
Vizita grupu ne'e

24 April 2008

Kla'ak Semanal Edisaun 12 (10 Abril 2008)


HALIRI

Barak Mak Sukat Foz, Ida Mak Sikat Osan
Foz ho osan. Buat 2 nebe importante tebes ba ita ema nia moris, maski importansia nebe buat 2 ne'e lori sempre ho nia sasukat rasik. Katak, iha situasaun hamlaha, ema hotu presiza foz atu han. Atu hetan foz, ema balun presiza osan atu bele sosa foz. Ema han foz. La iha ema ida mak han osan. Iha ema fa'an foz atu buka osan no iha ema buka osan atu sosa foz.

Maski nune'e, buat 2 rua ne'e iha kbiit hanesan atu hamoris karakter "kanten" no "karak-ten" iha ema. Karakter sira nebe halo ema barak nia matan boot liu kabun hodi han haluha rai, no halo ema balun nia hakarak aas liu sira nia kbiit hodi buka meios oin-oin atu hariku-an to'o matan sai delek ho realidade sosial.

Krize politika 2006 nebe "produz" deslokadu barak iha rai-laran, foz sai nesesidade baziku ida nebe aas tebes. Tanba ne'e, husi kampu deslokadu to'o meza Parlamento, ema hotu haksesuk kona ba oin sa atu hetan foz hodi fahe ba deslokadu no funsionariu sira.

Iha aprezentasaun orsamentu jeral estado nian ba Parlamento, governu AMP aloka orsamentu boot atu sosa foz hodi tulun deslokadu no fahe ba funsionariu sira. Ita hotu akompanya oin sa governu AMP sukat foz ba deslokadu sira. Ba deslokadu sira, governu sukat tuir kilo, ba funsionariu sira governu fahe tuir karon.

Ita hotu mos hatene katak, foz sira nebe durante ne'e governu fahe ba deslokadu no funsionariu sira, la'os foz nebe governu sosa husi ita nia agrikultor sira, maibe importa husi rai-li'ur, hanesan China, Tailandia no Vietname.

Buat nebe povu kiik la hatene mak prosesu importasaun foz ne'e la'o. Povu la hatene governu fo osan povu nian ne'e ba se atu sosa foz husi rai-li'ur. Osan ne'e governu fo liu husi prosesu tenderizasaun ka fahe de'it ba kompanhia importador sira hanesan fahe foz ba deslokadu ho funsionariu sira?

Fahe foz ho fahe osan la hanesan. Foz, sukat tuir kilo, fahe tuir nesesidade. Osan, sura tuir kolen, selu tuir kbiit. Foz ema sukat, osan ema sikat. Foz ema barak mak sukat, osan ema ida ka rua mak sikat. Ema sukat foz, ita bele haree ho matan, maibe ema sikat osan, matan-dook sira mos la konsege hateke borus.

Husi dadalia nebe jornal ne'e halo, konklui katak governu AMP halo importasaun foz husi rai li'ur, la liu husi prosesu tender normal. Katak, governu AMP la loke tender ba kompanhia sira atu konkorre ba projecto aprovizionamentu (pengadaan, edit.) foz. Afinal, governu AMP hatudu de'it kompanhia ida nebe governu AMP fiar atu responsabiliza ba importasaun foz ho osan dollar miliaun 8.

Los duni no los tebes. Foz ema barak mak sukat rame-rame, osan ema ida mak sikat mesa-mesak. Iha ne'e, ita ida-idak iha sasukat atu buka hatene se mak hamlaha no se mak kan-ten. Ema hamlaha ba ai-han, han etu bele bosu. Maibe, ema kanten ba osan nunka hatene bosu. Kona ba osan, han barak liu tan, hamlaha liu tan. Hetan bebeik, buka bebeik.

Infelizmente, osan no foz nebe governu AMP fahe, ba kompanhia ka populasaun deslokadu, la natoon atu sustenta nesesidade populasaun deslokadu nian. Bainhira populasaun deslokadu sei presiza foz, governu AMP deside atu hapara distribuisaun foz ba deslokadu sira. Hein katak governu AMP mos sei la kontinua promove "single source tender" nudar justifikasaun ba sira nia koluzaun politika.

Reforma administrativa labele signifika de'it troka ema nebe ita la gosta, maibe tenke reflekte transparensia iha prosesu desizaun politika nebe relasiona ho interese publiku nian. Mos labele uza reforma administrativa atu justifika favoritizmu politiku. Periodu tempo no birokrasia nebe naruk labele sai razaun atu legaliza desizaun politika nebe la tuir regulamentu ka norma legal nebe vigora.

Governu ho orgaun soberanu seluk tenke informa ba povu katak, foz nebe sira hetan no osan nebe sira simu, tan sira nia direito duni atu hetan no simu. La'os tanba "acto de caridade" husi governu ka kompanhia nebe importa foz.

Ho nune'e, ukun-na'in sira nebe kaer pozisaun no kompanhia sira nebe hetan vantajem iha situasaun krize ne'e, bele proklama-an ho dignidade katak buat sira ne'e sira hetan la'os "acto de caridade" husi povu, maibe tan sira nia kapasidade duni no sira nia konsiensia atu serbi povu ne'e ho di'ak no honesto.

Vokabulariu:
sikat: sisip, selip; sasukat: takaran; kanten: rakus; karak-ten: pelit; delek: buta; matan boot liu kabun: rakus; acto de caridade: tindakan kemanusiaan; honesto: kejujuran

$8 Miloens ba Foos La Liu Tender, Tansa?

nuno rodriguez TCHAILORO, zevonia VIEIRA
Governu AMP deside ona fo osan foos hamutuk 8 miloens ba Germano Antonio de Jesus da Silva. Governu fo osan ho montante ne'e ba Oriental Food tanba konsidera kompania foos ne'e diak liu kompania sira seluk. Tanba sa osan 8 miloens la liu hosi tender?

Hahu kedas hosi governu anterior, liu hosi aprovasaun orsamentu jeral estadu, governu aloka osan ho numeru entre $ 6-8 miliaun hodi sosa foos ba armazen nasional ho politika atu responde nesesidade aihan iha tempu emerjensia. Hahu hosi orsamentu tranzisaun 2007 governu AMP hahu programa subsidiu alimentar hodi fahe foos ba funsionariu publiku sira. Iha tempu tranzisaun kompania hanesan Nabilan Food, People food, Oriental Food mak hetan konfiansa hodi hatama foos ho total orsamentu ba seguransa alimentar no subsidiu alimentar ho total orsamentu 6.088 miloens.

Tinan ne'e governu fo konfiansa ba Germano Antonio de Jesus da Silva liu hosi single source katak la liu prosesu tender hodi sosa fos ho total orsamentu $ 8 milioens ba tinan ne'e. Hosi osan ne'e sei fo uluk 4 miloens no iha fulan Agostu sei fo tan 4 miloens. Kla'ak rasik la hetan klarifikasaun ida ne'ebé los konaba osan 8 miloens ne'e tanba iha orsamentu jeral estadu iha deit osan 6 miloens ba aihan. Diretor Nasional Aprovizionamentu dehan katak osan ne'e mai hosi orsamentu tranzisaun ninian, maibe informasaun hosi Diretor Nasional ba Komersiu Domestika Epifanio Silva da Costa Faculto hateten katak laiha osan restu hosi orsamentu tranzisaun.

Orsamentu ne'ebé aloka ba aihan iha orsamentu jeral estadu 2006/2007 ne'ebé Ramos Horta xefia hamutuk $ 7.5 miliaun. Xanana Gusmão nudar Presidenti da Republika iha tempu ne'eba halo kritika iha TVTL katak osan $ 7.5 miloens kompania ida deit mak hetan, maibe realidade lae. Tuir eis Ministru Dezenvolvimentu Arcangio da Silva hateten katak single source halao deit ba osan ho montante $ 3.5 miloens ne'ebé fo ba kompania land mark. Montante seluk liu prosesu tender ne'ebé kompania Nabilan Food, Nadira, Sun rise no Tropikal mak manan.

Tanba sa mak ho total orsamentu $ 8 miloens fo deit ba kompania ida? Ministru Komersiu, Industria no Turismu Gill Alves hateten ba kla'ak: "Se ita tuir prosesu hanesan tenderizasaun normal, prosesu administrativu no prosesu tender ne'e rasik lori tempu bainhira maka ema foin ba sosan, prosesu ne'e bele lao fulan 1 ka 2, sasan seidauk mai, povu bele sofre." Ministru ne'e mos esplika katak molok deside kompania Oriental Food nudar kompania uniku ne'ebé hetan osan $ 8 miloens, nia rasik halo inisitiava hodi konvida kompania foos no too ikus kompania liu 10 mak tuir enkontru ba projetu hatama foos. Tuir Gil Alves too ikus hosi enkontru rua ne'ebé halo kompania ida deit mak brani atu hatama uluk fos 16 mil tonelada. "Problema ema lakohi, ami la indika ema ida, la hatudu ba A ka B. Ami husu se maka brani atu halo buat ne'e para ajuda estadu. Sistema ne'e terbuka."

Tuir Gil Alves, nia mos konvida Tropikal Food nudar importador foos prinsipal atu tuir enkontru ne'ebé nia inisia. Toni Lay nudar diretor Tropikal Food hateten ba kla'ak katak nia rasik la hatene konaba enkontru ne'ebé ministru refere tanba karik tempu ne'eba nia iha liur. Emprezariu Oscar Lima ho nia kompania foos Monteviado ne'ebé dala barak hatama foos no iha ligasaun diak ho kompania sira iha Vietnam hateten ba kla'ak: "Hau la konvidadu, ami nia kompania Monteviado la konvidadu Hanesan timor oan, hau lamenta, ita hotu-hotu iha direitu hanesan ba konkursu lakon ne'e hau la moras, maibe seidauk ba lakon uluk tiha ona ida ne'e mak fuan moras liu. Ami seidauk hetan fasilidade atu ba konkursu, ami lakon tiha ona."

Tuir lei aproviziomentu, iha dalan haat atu kompania utiliza orsamentu jeral estadu. Ida mak naran invitation to bid, request for quotation, single source no international tender. Governu hili dalan single source ka hatudu kompania ida deit atu ezekuta orsamentu estadu. Oriental Food manan liu hosi single source. Konaba deklarasaun Gill Alves ne'ebé hateten katak konvida kompania atu tuir enkontru, Francisco Borlaku hateten: "Ida ne'e single source, la presiza bolu ema mai tuir tender tanba situasaun emerjenti." Diretor ne'e mos fo ezemplu katak bain-hira estadu de sitiu no uza deit modelu tender, buat hotu sei la lao, mate hotu.

Tuir lei aprovizionamentu hateten katak ho osan liu 1 miliaun tenki iha koñesimentu hosi Primeiru Ministru. Francisco Borlaku hateten ba kla'ak katak diresaun aprovizionamentu mos halao tuir hela trend reforma. Tanba ne'e bainhira iha tender ruma ministeriu tutela mos partisipa. Gill Alves ne'ebé inisia enkontru ba kompania foos sira, iha enkontru ikus ne'ebé ministra finansas no primeiru ministru involve iha enkontru ne'e atu haree prosesu ne'e. Hosi enkontru ne'e governu deside katak Germano Antonio de Jesus da Silva mak iha kompetensia.

Gill Alves no Francisco Borlaku hateten ba kla'ak katak kompania Oriental Food iha deliver time ne'ebé diak liu kompara fila fali ho kompania sira seluk bainhira hatama foos iha orsamentu tranzisaun ninian.

Iha kontratu ne'ebé governu ho kompania asina hateten katak kompania ne'ebé deit mak liu loron 15 Dezembru 2007 ne'e sei multa $ 1000 loron-loron. Oriental Food ne'ebé hatama foos 2790 tonelada hatama tarde, maski nune'e penalidade ne'e la implementa. Tuir Gill Alves foos la tama tuir prazu tanba anin boot ne'ebé barku labele mai ka konsidera nudar force majeur.

Kla'ak rasik husu ba diretor aprovizionamentu katak la fo multa ba kompania ne'e kontra lei. Francisco Borlaku rasik hateten: "Lei tenki lao hanesan, maibe tempu balun ne'ebe ita tenki halo policy fleksibilidade, perdaun, eduka nia atu ikus labele halo tan. Lei mos hateten katak nia diak ita bele fo perdaun. Importante mak sasan tenki tama, maibe sei kedua ketiga sei mosu nafatin, penalidade sei mosu nafatin."

Orsamentu ba foos ba iha tempu tranzisaun ne'ebé fo kompania hanesan Oriental Food, Nabilan Food no People Food la liu hosi prosesu tender. Maski governu rasik hateten katak halao duni tender. Tuir kla'ak nia intervista ho Gina Corte Real ne'ebé uluk kaer pasta nudar Diretor Komersiu Industria no Turismu hateten katak ministeriu komesa hahu fahe foos ba funsionariu publiku iha 30 Outobru 2007 no tender ba fos rasik foin halao iha 9 Novembru 2007.

"Kuandu fofoun kontratu ba iha Germano ho sira seluk, hau ema ida ne'ebe hasai protesta kontra Gil Alves no Francisco Borlaku. Hau hateten katak prosesu tender nakonu ho manipulasaun. Ema nunka hatene konaba prosesu tender", Emprezariu Rui Castro hateten.

Toni Lay rasik konfesa katak laos fasil atu hatama foos iha tempu agora. Oscar Lima rasik mos hateten katak iha tempu orsamentu tranzisaun mak nia kompania la faan fali nia foos ho tonelada 5000 ba Frans BTK, kompania ne'e sei lakon didiak.

Maski governu konsidera Oriental Food nudar kompania ne'ebé iha delivery time diak liu maibe realidade hatudu katak kompania ne'e mos hatama foos tarde iha tempu orsamentu tranzisaun. Kuandu iha kompania barak ne'ebé hatama fos ba governu sei iha posibilidade ida seluk tarde, ida seluk bele hatama lais, maibe kompania ida deit mak hetan $ miloens mak tarde, se mak hatama fos?

Governu Interven Folin Foos Iha Merkadu Maibe Folin Kontinua Sae

nuno rodriguez TCHAILORO, zevonia VIEIRA
Governu uluk no governu AMP halo politika intervensaun ba folin foos iha merkadu. Politika intervensaun governu uluk konsege normaliza folin foos durante krize foos iha inisiu tinan 2007. Tinan ne'e, Governu AMP rasik mos halo intervensaun ba folin foos iha merkadu, folin seidauk sai normal maibe kontinua sae ba nafatin. Tansa maski ho subsidiu hosi estadu, foos governu ne'ebé faan iha merkadu folin as tebes?

En jeral folin foos iha mundu sae dala rua. Folin foos agora iha merkadu $ 17-19 kada 35 kilo. Tuir Ministru Turismu, Komersiu no Industria Gill Alves governu agora fo subsidiu 55 % ba foos. Realidade hatudu katak maski ho subsidiu folin foos kontinua sae nafatin. Antonio Casimero, povu bain-bain ne'ebé hela iha Bidau Lecidere hateten ba kla'ak: "Agora ami povu moris araska ho folin fos ne'ebé sae makas. Fos globus ne'ebé uluk ho folin $10.00 agora sae to'o $19."

Atu labele iha krize foos dala ida tan, ministru rasik ba vizita Vietnam iha fulan Marsu nia rohan atu asina akordu entre governu Timor-Leste no Vietnam. Akordu ne'ebé asina katak tinan-tinan Timor-Leste sei sosa 100.000 tonelada hosi Vietnam.

Fos ne'ebé governu hatama mai Timor-Leste ho kualidade 15 % broken. Loja barak mak sei kontinua faan fos ne'ebé governu hatama. "Ita labele fiar uluk lai katak fo ho kilo 35 ho fos governu ne'ebé distributor sira faan, iha karon hakerek 35 kilo makbe realidade mak nia todan mak 29, 30 no 33 kilo deit. Agora dadaun iha manipulasaun iha merkadu", emprezariu Rui Castro hateten ba kla'ak.

Tuir Rui Castro hateten katak laos deit manipulasaun iha kilo ne'ebé la hanesan ho ida ne'ebé hakerek iha karon maibe mos folin tenki tuir kualidade fos ne'ebé iha. Iha manipulasaun dala rua. Hatan ba kualidade ho fos governu iha merkadu, Gil Alves hateten ba kla'ak: "Hau bele dehan katak 25 % at ne'e barak mai husi uluk ninian (stock lama), hau bele dehan antes governu foun buat ne'e tama ona.

Foos uluk ne'ebé governu anterior hatama tuir lolos folin bele baratu liu. Toni Lay hosi kompania Tropical ne'ebe sai importador foos besik tinan 6 ona esplika ba kla'ak katak nia kompania sei rai hela nia foos iha armazen tanba governu kontinua fa'an fos liu hosi distribudor sira iha merkadu. Tuir nia hateten katak governu nia fos agora baratu liu nia kompania nia folin tanba fos ne'ebé governu fa'an ne'e fos uluk nian. Toni Lay mos hateten katak diferensia folin entre governu nia ne'ebé hetan subsidiu no selu la tasa bainhira hatama liu dolar ida deit.

Tuir lolos ho subsidiu foos hosi governu bele halao folin bele tuun liu maibe realidade oinseluk. Arcangio dos Santos, eis ministru dezenvolvimentu esplika nia esperiensia oinsa normaliza folin iha merkadu bainhira krize foos: "Ita aplika international price, folin iha internasional no iha ne'e hanesan tanba ne'e subsidiu. Eis ministru ne'ebé ohin loron servisu ba GTZ, organizasaun hosi Alemaña hateten oinsa uluk governu fa'an fos liu hosi ponto da venda iha suku-suku no konsege normaliza folin iha merkadu.

Arcangio dos Santos koalia mos konaba kualidade foos nian. "Governu tenki defini presu tuir kualidade bele 35 kilo maibe 10 % no 15 % ne'e la hanesan."

Toni Lay ne'ebé ohin loron nia foos iha armazen hela tanba foos governu sei kontinua iha merkadu hateten: "Ita la klaru, se kontinua faan fos ka lae, estadu faan, ami labele."

Diretor Nasional ba Komersiu Domestika Epifanio Silva da Costa Faculto hateten ba kla'ak: "Iha relasaun ho fos iha ita nia rain antau governu hasai fos ne'e hodi bele halo intervensaun ba iha merkadu maibe ho hanoin katak fos ne'ebe husi governu nian labele hamate fali inisiativa ita nia maluk importador sira atu sira bele importa nafatin fos mai Timor Leste"

Eis Ministru Dezenvolvimentu Arcangio da Silva ba kla'ak hateten: "Intervensaun merkadu tenki iha depende ba nesesidade. Intervensaun labele permanente, se permanente ita bele foti papel setor privadu ninian. Tenki iha periodu limitadu, kuandu estabelese folin ona, governu tenki retira. Saida mak hau hare intervensaun permanente. Governu halo negosiu."

LIA MENON

Hau ema timor oan ida. Hau contente atu lee Klaak. Buat nebe interesante liu mak artigo nebe koalia kona ba amululik ida ho inicial AL halo violasaun seksual iha Timor.

Hau la fo sala ba ema ida maibe hau hakarak deit atu dehan katak ita houtu hakarak moris nudar ema nebe livre. Ema balun dehan katak ema Timor tauk atu koalia hasouru amlulik sira. Hau husu ba hau nia an raisk tansa hau tauk koalia hasouru amlulik ida? Hau nia resposta mak hau ladauk livre. Hau la dehan katak hau livre atu koalia hasouru ema ida. Hau livre atu koalia buat nebe bele hadiak liu tan hau nia relasaun ho hau nia maluk sira. Relasaun diak hari deit iha lia los. Nee duni, ita livre atu koalia lia los! Se hau koalia lia los tan sa hau tauk? Hau ema sarani Timor oan ida nebe fiar Jesus nia moris hias, manan ona mate e ho nia hau sei tauk buat ida!
Mario Costa [mrcosta17(a)yahoo.com]

VOX POP

ANTONIO CASIMERO
Dasa rai, Bidau Lesidere
Agora ami povu moris araska ho folin fos ne'ebé sae makas. Fos globus ne'ebé uluk ho folin $10.00 agora sae to'o $19.00. Dala ruma ami iha osan $20.00 dolar, sosa tiha fos osan restu hela $1 dolar, ami hola deit mina buat seluk ami labele sosa tan, ami atu moris oin sa? Hau husu ba governu atu ajuda ami ho hahan ruma ka ou kalen ruma atu halo ami nia uma tanba ami povu kiik ne ami atu halo saida se folin foos ne karun nafatin.

Se folin fos hatun hanesan uluk, hau sinti bele uituan mais agora folin fos karun, ami ema kiak labele sosa kotu. Funsionariu sira fulan ida simu foos uituan. Sasan mos uluk ema lelan hotu, Uluk ami dasa rai, ami sei bele hola saku ida. Agora dasa rai ema fo $ 5 ka 6 hau simu deit, naran uma laran labele hamlaha. (nico ZECORO, elcano ZERAY)

DAVID JHON
Patraun toko DILIMART
Fos folin sae, hau sinti iha impaktu ba komsumedoris sira tanba barak mak la hatene informasaun nasaun liur nia no balun hanoin ami pengusaha sira mak naran hasae presu fos. Folin karun tanba cuaca no iklim iha nasaun importir sira, nasaun barak hentan banjir hanesan Pakistan, India, Bangladesh, Indonesia halo fos folin sae tanba panen fos menus. Buat hotu bazeia ba demand no supply.

Konsumidores kuandu atu hola foos ida nee depende ba ema idaidak ninia pendapatan, tanba kuandu fos nia folin sae ema hola mos menus nomos fos ninia folin menus antaun ema hola mos barak, ida nee nia impaktu boot liu ba ema ne'ebé ninia ekonomia fraku kuandu nia laiha pemasukan (income, red) husi parte ekonomia daya beli (kbiit atu sosa, red) ba foos mos menus. Ida ne’e fo impaktu boot liu ba ema ne'ebé ekonomia fraku no nia labele hola foos tanba parte ekonomia fraku hanesan klase sosial, menengah (media, red) too ba okos, depois ema ne'ebé bele atu hola foos maka hanesan sira nebe ninia ekonomia diak; klase leten. (nico ZECORO, elcano ZERAY)

GASPAR DE JESUS BARRELA
Fatuhada
Ami povu kiik nee susar tanba fos folin sae. Uluk sai refujiadu no fila mai uma mos susar nafatin, atu hola foos uituan ba han mos labele tanba karun.

Uluk sai husi refujiadu governu haruka ami fila mai uma maibe servisu laiha. Hau husu ba boot sira atu hatun folin foos uituan atu ami bele dada is. Ami husik kampu refujiadu sasan ema lelan hotu, uma taka ho lona, foos karun liu. Labele hasae foos tuir sira nia hakarak. Governu tenki haree konaba ne'e.

Uluk ami sosa kilo deit, agora sosa kilu 2-3 ba tein mos sosa la kotu. Ami kiik bele mate hamlaha. Governu kuandu haree ona ba ida nee antaun ami povu sei la hamlaha, maibe too agora fos nia folin ami dada is mos labele. (nico ZECORO, elcano ZERAY)

Francisco C Soares: "Ida ne'e Single Source"

DADALIA

Maski iha bainaka no servisu barak Diretor Nasional Aprovizionamentu Francisco C. Soares simu jornalista kla'ak Nuno Rodriguez Tchailoro no Zevonia Vieira hodi intervista iha loron 2/4. Iha nia servisu fatin Francisco Soares koalia konaba prosesu aprovizionamentu, liuliu relasaun ho $ 8 miloens ne'ebé fo ba kompania Oriental Food.

Aprovizionamentu nia prosesu oinsa?
Tuir dekretu ida uluk, 500000 mai kraik hau mak deside, 500000 ba 1000000 ministra mak deside, no 1000000 ba leten primeiru ministru. Maibe ami loke luan tan, bainhira halo desizaun ami sei la halo mesak ona. Projetu edukasaun nian, ajensia edukasaun nian tenki iha oin husu mos sira nia referensia, depois husu mos sira nia istoria tinan 5 ikus ne'e, hola desizaun hamutuk, laos procurement mesak, ne desizaun koletivu. Ida ne'e hatudu katak governu tau nia an hanesan osan nain, administrator no legalidade. Departementu tutela ne'e hanesan projetu nain no setor privadu hanesan eze-kutor. Tolu sei hamutuk atu lao ba oin. Hahu ho estesaun hotu, pagamentu hotu.

Kona ba karta protesta ne'ebé forum emprezariu hatoo konaba fos ne'ebé la liu tender?
Desizaun ne'e foti iha razoens barak, tanba sa mak foti. Primeiru, istoria tranzisaun mai hatudu katak nia deliver time tepat kompara ho kompania sira seluk. esperiensia ne'e hatudu katak konfiansa, governu fo konfiansa ba ne'e. Segundu tanba iha konfiansa hosi departementu tutela. Kompania ne'e diak, projetu ne'e sira nian, tanba sira los, no tuir aprovisionamentu mos katak kompania ne'e nia deliver time tepat. Kompara ho sira seluk naruk tebtebtes.

Uluk kompania ne'e mos hatama tarde liu tiha 15 dezembru. Liu tiha loron hira, kompania hetan perdaun tanba la liu tempu naruk. Fleksibel, governu bele deside katak laiha buat ida tanba entre lima ne'e nia mak primeira ne;ebe tama uluk. Ita bele fo perdaun.

Ida ne'e la kontra lei?
Diak, lei tenki lao hanesan, maibe tempu balun ne'ebe ita tenki halo policy fleksibilidade, perdaun, eduka nia atu ikus labele halo tan. Lei mos hateten katak nia diak ita bele fo perdaun. Importante mak sasan tenki tama, maibe sei kedua ketiga sei mosu nafatin, penalidade sei mosu nafatin.

Buat ne'e la liu tender?
Lae, tender ne'e lei mos koalia buat barak no loke dalan. Ida mak naran ITB, invitation to bid, request for quotation ne;e katak simu tender, hau bele hetan kompania haat lima hau avalia ida ne'ebe diak, hau bele fo. Ida fali mak single source no international tender.

Foos nian ne'e saida?
Ida ne'e single source

Labele presiza bolu ema atu mai tuir tender?
La presiza, tanba ida ne'e situasaun ne'ebe emerjente. Ita presiza duni espesifiku ba ne'e , presiza duni konfiansa ne'ebe iha, atu lao tuir nia dalan, hau bele halo desizaun. Lei forsa mai hau atu halo desizaun. Hau hanoin ema barak sei la aseita, tanba sa? por ezemplu hanesan estadu de sitiu, sei lei mak taka dalan katak modelu tender deit mak ita uza, buat hotu sei la lao. Mate hotu. Tanba ne'e lei ne'e loke hotu buat ne'e. Sasan tenki tama tuir nia espesifikasaun no on time. Lei ne'e fo autoridade ba governu atu foti desizaun.

Prosesu single source ne'e oinsa?
Momentu ne'e ami halo diskusaun entre departementu finansa ho departementu tutela. Ami fo hatene katak imi nia situasaun mak hanesan ne'e, imi komprova mai ami katak labele. Balun bisnis nain, fos nain maibe deliver time to fulan 5. Ne'e komprova mai hau katak ita nia fiar ne'e ba ida ne'ebe los. Hau hatene o pemain tuan, maibe pemain foun bele diak liu.

Ita hatene Germano Antonio de Jesus da Silva nudar ema importante iha CNRT, single source tanba iha relasaun ho politika?
Imi kumprende katak laiha politika. Konfiansa mosu tanba deliver time no kualidade. Sira pemain tuan uluk tuir, kualidade okey maibe deliver time mak problema.

Entaun diretor no ministra tur hamutuk ho deside no la presiza bolu kompania sira?
La presiza tanba ida ne'e single source ne'e.

Osan 8 miliaun mai hosi ne'ebé tanba oje iha deit osan 6 miloens?
Osan seguransa alimentar ne'e mai hosi tranizasaun nian.

Entaun la los katak buat ne'e la transparante?
Tanba ne'e preokupasaun aprovisionamentu nian atu halo publisidade atu ema komprende. Ema hanoin katak single source buat at.lae, lei preve. Por ezemplu estadu de sitiu, tender, lojika khan lae? Se liu tender presiza tempu fulan ida, ne mate. Hau ukun nain salan, hau laiha kapasidade atu foti desizaun tanba ema mate barak. Hau tenki foti desizaun, lei preve buat ne'e los. Importante mak sasan tenki tuir espesifikasaun, ema tenki ser diak , governu labele lakon.Los duni ema balun dehan la transparante, maibe sim, sasan too, kualidade tuir dalan. Tender diak, sasan iha lapangan mana? Iha fleksibilidade, ita ukun ida ne'ebé diak ita foti. Ba hau importante mak orsamentu lao ho diak, publiku hotu-hotu rasakan. Tentu desvantajen iha, maibe pasiensia mas lei mos preve, ne'e legal.

Hodi Naran Estado de Sitio, Oho Populasaun Sivil, Hamaus Salsinha

efrem dos ANJOS
Opersaun konjunta kontinua lao iha distrito Weste, inisiativa prinsipal husi operasaun ne'e atu buka tuir grupu rebeldes ne'ebe ho armas sanulu resin hat. Operasaun psikologika ne'e sedauk kaer Salsinha maibe hamate povu sivil ida. Ba operasaun ne'e komandu konjunta koloka ona forsa husi F-FDTL ho PNTL hamutuk ema 1041, no gasta ona osan hamutuk $ 450.000 dolar.

Numeru forsa ne'ebe halo operasaun boot liu dala sanulu husi grupo Gastão Salsinha, tuir identifikasaun husi komando konjunta membrus ne'ebe hola parte hanesan grupu Gastao Salsinha iha ailaran mak hanesan Agapito Madeira, Januario Pabu, Julio Guterres, jose Gomes, Joao Martins, Antonino Maia, Marselo Caitano, Jose da Costa, Gilberto, Ijido. Grupu rebeldes sira ne'e iha armas sanulu resin hat (kilat 14), AK 33.

Iha sorumutuk ho joventude sira iha sub distritu Maubesi ne'ebe partisipa iha paskoa joven, 5/4/08, Tanente Kolonel Filomeno Paixao hateten katak operasaun psikologika ho objetivu promove voluntariu ba rebeldes sira atu entrega an hodi lao ba prosesu justisa. "hanesan imi hotu hatene operasaun durante ne'e ita halao barak desde dia 14/2 halo operasaun speremental iha Kamea, pois halo haleun Dili, ba halo fali iha Lekidoe, Remesio, mai to'o besik Aileu pois de ida ne'e ita halo Liquisa nian, sae ba Bobonaro, Balibo, e agora ita nia konsentrasaun fokus hotu ba Ermera", Operasaun ne'ebe halao iha Distritu Ermera fahe tuir kompania hat: Zona A iha Hatolia ho Vila Maria, Zona B iha Lauana ho Fatu Berliku, Zona C Lur ba, Aikudus, Marobo, Zona D iha Liquisa. E mos iha kompania sira husi UIR, Task Force, no PM, ne'ebe halo operasaun iha Dili."

Aporveita prezensa joven barak ne'ebe mai husi distritu sanulu resin tolu no hetan partisipasaun husi Bispo dioseze Dili dom Alberto Ricardo, Padre ho madre sira, komandu opersaun kunjunta relata atividade opersaun ne'ebe sira halao iha teretoriu Timor-Leste, no afirma katak operasoens psikologika importante tebtebes ba iha komandu konjunta, na medida aprosimasaun ba forsa rebelde, aprosimasaun ida ne'ebe labele tiru, buka deit halo nusa konvense tun mai (intrega an ba autoridade). Alende ida ne'e aprosimasaun komandu konjunta mos kria kondisaun atu halo nusa bele manan konfiansa husi populasaun, petisionariu.

Paixao salenta liu tan katak, opersaun ne'e sei esforsu makas atu labele iha kilat musan ida mak tarutu. Maibe buat ne'ebe nia kolia iha leten, iha terenu koalia oin seluk, hanoin atu hamaus rebeldes no evita kilat musan tarutu, maibe parte seluk bala musan premeiru durante operasaun ne'e lao hamete kedas ema sivil ida hosi suku Rairobo, sub distritu Atabae, akontesementu tiru ba matebian Clementino Maupelo iha loron sabadu 5 de Abril 2008, informasaun ne'ebe kla'ak hetan katak akontesementu ne'e akontese wainhira ema ne'ebe halo atentadu atu ta'a forsa ida i depois forsa seluk responde ho kilat musan, iha parte seluk Leonitu Martins oan husi matebian ne'ebe hetan tiru husi forsa opersaun konjunta hateten katak esplikasaun ne'ebe sira dehan nia aman ta mosila ne'e la hatudu evedensia.

Operasaun konjunta ne'ebe kesi an ba estadu de sitiu foin mak halao fulan rua hamate ona ema sivil, la hatene se operasaun ne'e kontinua no estadu desitiu ne'e lao nafatin ema hira tan mak sei sai alvu "sala lirik". Esforsu makas husi komandu konjunta atu manan konfiansa husi populasaun no petisionariu maibe realidade ameasa ba populasaun existi iha terenu. Atetude membrus operasaun halibur iha terenu hetan reasaun makas husi membrus AMP ne'ebe uluk fo votus a favor atu hanaruk estadu de sitiu inkluis operasaun konjunta. Fernando Gusmao membru parlamento nasional husi AMP nian, ne'ebe hetan ameasa tiru husi membrus opersaun konjunta, ho lian makas iha parlamentu nasional reazen kontra atetude membrus operasaun konjunta ne'ebe halo hasoru nia wainhira halo viajen fila mai Dili iha loron sabdu 5/4.

Relasiona ho operasaun konjunta no hanaruk bebeik estadu de sitiu, antigu Primeiru Ministro Dr. Mari Alkatiri liu husi konfrensia imprensa ne'ebe halao iha nia residensia 7/4, husu estadu atu labele uza krimi hasoru Salsinha ho ninia grupu sira. "Hau hakarak hatete filafali, labele tiru mate ema ida. Lalika aproveita fali estadu de sitio para dehan atu oho ema. Salsinha nia forsa ne'e la vale buat ida. Nia forsa kiik. Sei Salsinha seidauk entrega-an mak politika mak sala laos tamba nia forsa ita laiha forsa. Se politika mak sala, ita rezolve uluk problema politika. Lalika tuir fali ema hodi oho ema. Lalika hakarak halai lalais atu kaer Salsinha antes Prezedenti da Republika fila husi Australia," afirma Mari Alkatiri.

Gastus Ba Operasaun Konjunta
Tuir dadus ne'ebe komandu konjunta fo sai katak, ba operasaun nee gasta ona osan barak. Isplika Paixao, osan hanesan imi hare, $ 427.000 kwaze 5 miliar osan Indonesia, situasaun obriga ita gasta osan ne'e, ita hotu hanoin katak grupo rebeldes tun lalais operasaun ne'e bele para, atu nune osan ne'e bele kanaliza fali ba servisu sosiais, ba ema kiak ou populasaun.

Osan ne'ebe gasta ba komandu konjunta osan boot, 10.000 dólar ba hahan lorloron ba forsa total 1041, Konbustivel $ 450,000 por dia, munisoes granada ne'ebe sira kaer se sira kaer hotu sira lori 300 munisoens, sira ne'ebe lansa granada lori granada 8, se sira tiru hotu dala ida folin $62,400, felizmente laiha buat ida tarutu. Equipamentu militar seluk hanesan kantil ita evaluia ba $ 6000 dolar, i material sekretariadu hamutuk $. 20.000 dolar.

Kolokasaun Forsa ba operasaun
Militares no polisia ne'ebe koloka iha terenu no nomeru ativu ne'ebe dadauk ne'e autorizadu atu halao opersaun hamutuk ema rihun rua atus rua resin rua (2202), husi F-FDTL hamutuk ema 686, PNTL 1500, sivil 16. Maibe foin uza deit metade 1041, F-FDTL 498, PNTL 527 sivil 16.

Alokasaun iha tereno, Iha komandu konjunto nia fatin 89, (FFDTL 40, PNTL 49). Tun ba iha tereno FFDTL 354, Polisia 209, iha postu sira koloka iha Dili hamutuk F-FDTL 41, PNTL 252, iha pos siguransa ba nai ulun sira F-FDTL 24, Polisia 17, PM iha Dili 43.

Atu suporta opersaun ne'e lao ho diak iha parte komunikasaun nian, Primeiro Ministro Xanana Gusmao foin dadauk hola emerjensia husi Surabaya, antena repetedores monta kuaze Timor laran tomak, falta Lospalos, Larigutu ho Oekuse, "e tanba ne'e ohin loron ami komesa bele kontaktu radio HT ne'e ba iha fatin hotu kuaze Timor Laran. Nia impaktu mak saida diminui pulsa, portante osan ne'e poupa fali iha radio komunikasaun". Katak Filomeno Paixao.

Hare husi numeru ne'ebe iha hatudu katak opersaun hasoru Gastao Salsinha hatun ho forsa maximu, maibe perguntas boot ida ne'ebe mosu, tan sa besik ona fulan rua no tempu determina ba dia 22 hanesan loron untimo, salsinha sedauk kaer. Se la kaer entaun estadu persiza atu gasta tan populasaun nia osan husi $450,000 ba beibeik.

Venezuela Hanaruk Solidariedade ho Ema Kiak Iha Europa

VENEZUELA

Kompania nasional mina Venezuela PDVSA hanaruk akordu ho sidade balun iha Europa atu distribui mina baratu to areas ne'ebé kiak, Lenin Medina hosi Ministeriu Negosiu Estranjeiru hateten iha konferensia eskerda Europa iha Paris Marsu 29. Enkontru ne'e partisipa hosi reprezentante partidu eskerda no uniaun komersiu hosi nasaun 12 atu hodi diskuti projetu konkretu hanesan jornal JungeWelt hosi Alemaña hakerek iha 31 Marsu. Enkontru solidariedade eskerda iha Europa ba Venezuela sei halao iha Juñu iha Berlin. Molok ne'e ativista sira deside "Ami nia objetivu mak fo suporta luan liu ba Venezuela", Gordon Hutchison hateten ba Sentru Informasaun Britanika Venezuela.

Traduz hosi Green Left Weekly issu # 746 Abril 2008

Alfabetizasaun fo progresu

BOLIVIA

Tuir reportazen Prensa Latina 20 de Marsu, Bolivia agradese aniversariu ba tinan 2 kampaña nasional ba alfabetizasaun ne'ebé too agora hanorin 77 % populasaun analfabetu atu sani no hakerek, uza programa Cubanu "Los, Hau Bele". Bainhira komesa iha tinan 2006, programa ne'e garante asesu ba edukasaun ba ema adultu ida-ida ho tinan 15 ba leten no Bolivia espeta atu deklara livre hosi analfabetizmu iha Novembru 2008. Bolivia espera sei sai nasaun ba dala tolu livre hosi analfabetizmu iha Amerika Latin depois Cuba (1961) no Venezuela (2005).

Traduz husi Greenleftweekly

23 April 2008

ExxonMobil Lakon iha Tribunal Londres, Jigante Mina Selu Multa

James Suggett
Juiz Paul Walker deklara iha Londres katak ExxonMobil husu atu hapara osan biliaun 12 Dolares Amerikanu hosi riku soin kompania estadu Venezuela PDVSA tenki dada sai fila fali.

Desizaun ne'e nudar derota prinsipal ba kompania mina boot liu iha mundu ExxonMobil, ne'ebé manan atu hapara temporariu ba aset iha loron 7 fulan Fevereiru iha disputa ho PDVSA konaba nasionalizasaun ba iha Orinoco Rivel Belt project, hatene nudar Cerro Negro iha Venezuela.

"Ami bele hateten katak ami manan funu balun, vitoria seluk ba ami nia nasaun, ba ami nia governu, no importante liu katak ne'e vitoria seluk ba ami nia nasaun", Ministru Enerjia Rafael Ramirez deklara relasiona ho desizaun ne'e.

Embaxador Venezuela iha Londres, Samuel Moncada, bolu desizaun "inisiu hosi abuzu Exxon Mobil nia rohan". Moncada mos hateten katak nia nasaun "kontente" tribunal Britanika rejeita atu utiliza nudar instrumentu ba Exxon hodi impoen nia an iha senariu internasional hasoru Venezuela".

"Buat importante ba ami nia nasaun mak kampaña, asaltu bosok no kaos ne'ebé sira koko atu instala ho ansiedade iha ami nia nasaun no sira koko atu hateten katak industria ami nia nasaun at tiha ona, ida ne'e la konta, tanba ne'e bosok….nudar parte, dala ida tan, manipulasaun ne'e katak sira halo hasoru ami nia povu", Ramizrez hateten iha intervista iha estasaun governu Venezuela VTV.

Advogadu ExxonMobil Otton-Goulder, dada an atu fo komentariu ba desizaun.

Juiz Walker, ne'ebé adia desizaun ne'e ba dala rua no kazu dura semana ida hahu Fevereiru 28, sei fo esplikasaun ba nia desizaun iha loron tuir mai.

PDVSA argumenta katak tribunal Londres laiha juridisaun legal ba aset ne'ebé kompania nasional ninian ne'ebé la opera iha Britanika. ExxonMobil argumenta kontrariu, no manan tiha ona iha ordem tribunal New York hodi hapara PDVSA nia aset hamutuk miliaun 315 dolar Amerikanu.

Nudar rezultadu hosi kazu ne'e, Exxon sei selu osan legal ba PDVSA ho montante $766,000. Mos, PDSVA sei hetan kompenzasaun ba estragus balun, hanesan devaluasaun bonds, hasae kustu imprestimu no inabilidade atu investe iha refinaria durante hapara aset, tuir advogadu PDVSA George Pollack.

Iha tempu hanesan, PDVSA sei hetan kontrola masimu ba nia aset iha Britanika, maibe hapara aset ExxonMobil hetan iha Dutch Antilles, Holland no New York sei kontinua hosi agora.

"Hau sinti ema Venezuela hotu sinti orgullu", Ramirez proklama, hateten katak governu sei kontinua defende "prinsipiu soberania" nasaun hasoru agresaun estranjeira.

Nia mos hateten katak PDVSA sei halo buat hotu atu hamos imazen Venezuela hasoru asaun Exxon. Ramirez bolu esforsu Exxon "terorismu judisiariu" iha Fevereiru tanba sira sai halo arbitrasaun iha International Center for Settlement of Investment Disputes (ICSID).

"Ita halakon ExxonMobil", Ramirez anunsia, hodi hateten katak desizaun mak 100% favorese Venezuela, alegasaun ba Exxon sei la konta", maibe hateten katak sei hein too juiz esplika tomak desizaun molok fo komentariu liu tan, tuir reportazen notisia ABN.

Ohin, ExxonMobil no PDVSA sei fila ba prosesu abritrasaun ICSID iha ne'ebé sira husik tiha ona, Ramirez esplika.

Tuir nasionalizasaun rezerva mina iha Orinoco River Belt iha Maiu 2007, husi governu Venezuela katak estadu sei hetan 60 % iha projetu mina. Nia nasionaliza mos iha relasaun ho kompania balun, inklui ENI Italia, ne'ebé hetan akordu miliaun $ 700 ba kompensazaun fulan kotuk.

Exxon, maski nune'e, rejeita kompezasaun Venezuela no oferese $ 750 biliaun ne'ebé fo sai 41.6 % iha projetu "Cerro Negro". Oferta ne'e bazeia ba valores ne'ebé Exxon Mobil fo sai tuir PDVSA iha tempu nasionalizasaun, PDVSA husu, maibe ExxonMobil buka lukru ne'bé projeta hosi projetu arbitrasaun mak iha.

Exxon husu atu selu fila fali ho masimu $ biliaun 5 atu negosia antes aset biliaun 12 hapara, ne'ebé Ramirez fo sai ba Asembleia Nasional Venezuela iha Fevereiru. Disparidade iha kompenzasaun hetan akuzasaun katak esforsu Exxon Mobile nudar parte hosi "funu ekonomiku" hasoru Venezuela.

Hahu nasionalizasaun, estadu partisipa iha Orinoco River Belt sae hosi 39% to 78%, no Venezuela kontinua produtor boot liu iha Amerika Latina ho kuaze sorin balaun hosi nia produsaun esporta ba Estadus Unidus.

Laiha sinal katak Venezuela termina nia relasaun bisnis ho Exxon Mobil iha Fevereiru 12, maski PDVSA sei respeita kontratu ho refinariau Chalmette ne'ebé ExxonMobil mak nain.

PDVSA no Mobil sai parseiru bisnis iha tinan 1997, molok Mobil hamutuk ho Exxon. Durante periode 1990, koñesidu nudar era Petroleum Opening, iha tinan 1976 nasionalizasaun mina Venezuela gradualmente sai fraku no PDVSA garanti autonomia, konverte kompania ba buat ne'ebé Ramirez bolu Trojan Horse ba kapital internasional.

Ho kontrariu, administarasun Prezidenti Hugo Chavez promove buat ne'ebé bolu "soberania petroliferu". Atu aumenta nasionalizasaun hosi kontrola estranjeiru ba projetu produsaun mina, politika ne'e inklui aloka osan $ biliaun 30 hosi lukru mina PDVSA ba Fundu Dezenvolvimentu Nasional (FONDEN) entre 2004 no 2007. Fundu ne'e investe iha projetu infrastrutura, espansaun ba sistema tratamentu saude Barrio Adentro, hamos meiu ambiente no edukasaun hamutuk programa sira seluk.

Komunidade Suai La Gosta Governu AMP

celina HANJAM
Distritu Suai, rai ida ne'ebe bokur no iha rai aas (daratan tinggi-red), maibe to'o tempu udan ho anin boot, komunidade ne'ebe maioria agrikultor no peskadores sempre hetan problema.

Semana kotuk liu ba, jornalista kla'ak halao viajen durante besik semana ida iha Suai. Maske do'ok husi kapital Dili, maibe saida mak akontese iha Dili, komunidade sira ne'ebe hela iha Distritu Kovalima mos bele hatene no rona kedas, kuandu iha akontesementu ruma.

Jornalista kla'ak koko hakbesik aan ba sira iha diskusaun ne'ebe ema lubun ida husi aldeia Camnasa, Lolowa, Nainare, Holbolu, Leogore no Raiketan. Sira halibur aan iha aldeia Holbolu hodi partisipa treinamentu sobre partisipasaun no media nebe fasilita husi NGO internasional Oxfam.

To'o tempu deskansa, ema balun dada malu ba tur iha uma mahon ida. Balu dada tabaku. Balu tur konta istoria komik. Iha grupu ne'e, katuas ida naran Apolonario koalia ho lian maka'as husu perguntas ba kla'ak: "hei alin, saida mak akontese iha Dili dau-daun ne'e." Jornalista kla'ak seidauk hatan perguntas ne'e, perguntas seluk fali hato'o husi ema ida ho naran koñesidu, Dato (xefi aldeia-red) Jacinto husi Aldeia Lohorai. Nia hatan nune'e: "Nusa mak ema boot sira iha Dili koalia deit konaba estado de sitio, maibe la koalia sobre problema ami nian iha baze hanesan ponte ne'ebe aat, menus aihan." Jacinto husu ba lideransa AMP sira iha Dili para labele koalia deit konaba estadu de stio ba interese politika AMP nian, maibe haree mos problema dezenvolvimentu ne'ebe la lao iha distritu."

Mouzinho husi aldeia Camnasa, mos husu ba governu AMP atu la bele koalia deit konaba politika. "Matenek nain sira iha parlamentu no governu dau-daun ne'e preukupa maka politika deit", tenik Mouzinho husi aldeia Camnasa ho lian sériu.

Pedro, kondutor OXFAM nian mos hatutan liu tan katak iha tempu kampaña ba eleisaun parlamentar, Xanana Gusmão promete katak kuandu nia mak kaer ukun, problema iha Timor laran sei rezolve hotu. Maibe iha realidade, Xanana Gusmão hatudu ninia inkapasidade. "Maun boot Xanana mak uluk promete iha kampaña ba elisaun dehan hau sei rezolve problema iha rai laran. Diak liu ita hein deit," konta Pedro.

Eliza de Jesus husi aldeia Nainare mos lakohi lakon fo ninia sujetaun ba governu AMP atu tun ba iha areia rurais hodi esplika kona-ba estado de sitio. "Se hanesan ne'e, sira tenki mai iha baze hodi esplika saida maka governu halo ona durante situasaun estado de sitio no sobre problema ne'ebe akontese iha Dili," dehan Eliza.

Eliza laran triste tebes, wainhira governu AMP preukupa deit ho problema politika. "Ami husu ba governu AMP Atu haree mos povu sira iha baze liliu problema menus aihan, sintina la iha, ponte barak maka aat. Ami mos susar atu ba fila liman iha merkadu Kovalima," afirma Eliza ba kla'ak.

Realidade ne'ebe jornalista kla'ak observa iha distritu Kovalima katak husi suku ida ba suku seluk, transporte ba komunidade susar tebes. "Povu sira atu mai iha suku, ponte barak mak aat. Hau hare'e ema husi Oxfam, malae UN, kareta Concern mak sempre tama diak hela deit. Maibe kareta seluk labele tama," hatutan Eliza.

Eliza hatutan liu tan katak, tuir lolos komunidade sira nia produtu ne'e bele ba faan iha merkadu Suai, maibe tanba la iha transporte, entaun produtu lokal povu sira nian sai aat no ikus mai fo ba fahi mak han," esplika Eliza ho laran triste.

Jornalista kla'ak tenta husu ba komunidade sira, konaba saida mak sira rona durante governu implementa estado de sitio. Xefi aldeia Jacinto hateten katak durante ne'e komunidade sira rona deit informasaun husi radio ne'ebe hateten katak dau-daun ne'e forsa husi operasaun konjunta "HALIBUR" buka hela Salsinha ho ninia grupu sira. Depois ami mos rona katak iha tempu estado de sitio ne'e ami labele sai husi uma iha oras 10.00 kalan to'o fali tuku 5.00 dadersan," esplika Jacinto.

Informasaun sira seluk ne'ebe mak xefi aldeia husi Lohorai ne'e rona katak estado de sitio ne'e aplika hahu husi Distrito suai to'o Distrito Ermera. "Hau haree Mario Carrascalão mak koalia maka'as los iha televisaun. Nia dehan Timor ne'e hanesan fahe ba rua fali ona," katak Jacinto ba kla'ak.

Komunidade sira iha distritu Kovalima triste liu, wainhira autoridade lokal hanesan Administrador Distritu la halo sosializasaun ba iha komunidade sira ne'ebe hela iha area rurais konaba implementasaun estado de sitio. Nomos proposta nebe ami fo ba sira sobre ami nia problema iha suku to'o agora seidauk responde husi Governu. Karik sira sei fo hela periodade ba estadu de sitio?

Akara: "Governu AMP la respeita instituisaun estadu"

Simu karta notifikasaun hanesan supreza boot no hakfodak tanba tempu agora governu AMP liu husi Terras no Propriedades halo notifikasaun ba organizasaun ida atu sai husi sira nia hela fatin. NGO Luta hamutuk konsidera hanesan hamosu ona marjinaliza entre sosiadade ho instituisaun estadu nian.

Uma hanesan fatin mahun ba ema hotu, hodi bele halo aktividades ho diak. Iha tempu udan ka manas ema hotu presija hamahan an iha uma laran. Maibe realidade ne'ebe akontese iha Timor Leste oin seluk, balun tenki hases an husi uma tanba iha desizaun husi ulun boot sira.

Farol hanesan fatin elite, estrategia no dook husi problema, NGO barak maka nia edifisiu iha parte Farol tanba razaun bele servisu ho hakmatek, dook husi problema.

NGO sira ne'e maka hanesan Luta hamutuk, Haburas, Hasatil, Fokupers no seluk-seluk tan. Maibe Organizasun Non Govermentais hakfodak wainhira teki-teki simu notifikasaun husi Terras no propriedades, ne'ebe fo prazu loron 30 ba uma estadu ne'ebe hetan ona notifikasaun iha parte Farol.

Direktur Terras no Propriedes, Antonio Verdial de Sousa hateten, "Terras no Propriedades fo prazu loron 30 ba uma estadu no tenki dezokupadu tanba sira okupa ilegal".

Antonia hatutan, "uma ne'ebe iha parte Farol tenki hamamuk lalais tanba membrus governu AMP atu uza. Durante ne'e nain ulun balun sei hela iha kampu dezlokadu. Programa dezokupadu uma ne'e husi parte Ministeriu Justisa ne'ebe fo mandatu global halo notifikasaun ba maluk sira ne'ebe maka hela iha uma estadu parte ne'ebe refere".

Wainhira jornalista kla'ak dada lia ho koordenador programa NGO Luta hamutuk Mericio Akara, iha nia edifisiu Farol Dili, haktuir katak, "sira hetan notifikasaun husi Terras no Propriedades iha loron 31/03 atu dezokupadu uma ne'ebe sira halo edifisio Luta hamutuk".

Akara hatutan, "wainhira simu karta notifikasaun hanesan supreza boot no hakfodak tanba tempu agora governu AMP liu husi Terras no Propriedades halo notifikasaun ba organizasaun ida atu sai husi sira nia hela fatin. Luta hamutuk konsidera hanesan hamosu ona marjinaliza entre sosiadade ho instituisaun estadu nian".

Mericio mos deklara tan, "iha karta notifikasaun hateten deit okupante ilegal no presiza sai husi fatin. Aliende mos liafuan okupante legal ne'e tuir lolos ne'e la los, tanba iha kolega barak hetan karta notifikasaun hanesan, Permatil, Haburas, Etadeb. E kuaze NGO iha area ne'e (Farol) barak mak hetan notifikasaun. Tamba Terras e Propriedes hateten katak, okupante ilegal, ne'e ba ami hanesan aneh. Tamba barak mak iha kontratu no barak mak iha prosesu laran atu hetan kontratu entaun banhira dehan okupante ilegal signifika, sira la respeita ita nian instituisaun estadu nian. Tamba uluk instituisaun ida mak hasai kontratu ida. Kuandu akontese duni entaun aumenta tan refuziadus iha rai laran".

"Tamba ne'e mak sira sei halo rekomendasaun ba Ministra Justica Lucia Lobato nune'e mos liu husi adviser Primeiru Ministru ho sosiedade atu koalia ho Xefe governu tanba derepenti dun matak ami katak okupante illegal. Maibe ne'e la rezolve lalais iha tempu badak nia laran sei hamosu tan refuziadus. Se lae Terras e Propriedes tenki responsabiliza tamba nia mak sobu fali estadu nian," tenik Mericio Akara.

Tuir obeservasaun husi jornalista kla'ak katak durante ne'e hanesan ONG balun iha parte Farol, fo kritika maka'as ba governu AMP durante ukun iha rai ida ne'e. Ho razaun ne'e maka governu AMP hakarak hasai organizasaun sira ne'e husi fatin ne'e? atu nune'e organizasaun non govermentais sira la bele halo kritika maka'as ba governu AMP?

Ema hotu bele halo nia interpretasaun oin-oin ba kazu ida ne'e.

AMP: Wellcome to Orsamentu Carry Over no Deklarasaun Riku soin? (V)

BIKELI
Wellcome to Orsamentu Carry Over no deklarasaun riku soin membrus governu nian hanesan lia fuan dala uluk Bikeli nian ba governu de faktu AMP. ‘Carry over', ne'e hatudu husi relatoriu ezekusaun orsamentu periodu tranzitoriu nian nebe ho total osan aprova iha Parlamento Nasional, governu AMP gasta lahotu iha periodu fiskal nia laran maibe sai hanesan obrigasaun atu gasta hotu maske periodu fiskal liu tiha ona iha 31 Dezembru 2007.

Lia fuan Carry Over uluk sai hanesan kansaun PM José Alexandre Gusmão (JAG) hodi kritika governu Fretilin tan la ezekuta hotu osan estadu nian iha kapital dezenvolvimentu iha tinan fiskal nia laran, ohin loron mosu fali iha governu AMP.

Ohin loron governu AMP ukun liu tiha ona fulan 9, politika nain balun iha AMP nian laran rasik haklaken katak seidauk iha mudansa substansial iha rai ne'e ho ukun governu AMP nian. Povu moris hanesan moris iha ai-tarak laran, iha tauk, laiha korajem atu koalia karik tan estadu de sitio no emerjensia, jovens maioria seidauk hetan serbisu, sa'asan folin derepente sae a'as mukit no kiak karik aumenta, justisa lao neneik, dezlokadus sei barak nafatin, petisionarius problema seidauk rezolve no ema barak baku sira nian rein tos karik tan vota sala iha eleisaun Parlamentar tinan liu ba.

Ezemplu promesas balun hatudu ho kazu petisionarius sira, nebe uluk PM JAG deklara iha 23 Marsu 2006 kona ba desizaun Komando F-FDTL hasai sira husi F-FDTL hanesan desi-zaun injustu ida, ohin loron konsentra iha fatin Ai-tarak Laran ho indikasaun klaru - sei la fila hikas ba F-FDTL. Durante kampaña ulun boot Partidu balun nebe mak ohin loron kaer ukun mos promete atu lori petisionarius sira fila hikas ba F-FDTL hanesan PM JAG, ulun boot nebe mak promete mos ohin loron hateten ba petisionarius atu prense deit formulariu hodi hili opsaun sai ema sivil ho tulun osan Estadu hamutuk 5 millaun USD iha Orsamentu Jeral Estadu 2008.

Se ita hare ba promesas partidus politikus nebe mak forma AMP iha kampaña ho realidade ohin loron, karik ita barak komesa hatene no dalaruma ita sai hirus ho hateten katak politik nain AMP nian mesak koalia hodi lohi deit povu. Politika karik hanesan ne'e duni 'uza buat los sai bosok hodi ukun'. Dalaruma lalos maibe ita hotu mak presiza matan moris hodi lafasil monu deit ba promesas husi politik nain AMP nian.

Hare relatoriu ezekusaun osan estadu ba periodu tranzitoriu (Juñu - Dezembru 2007) nebe governu AMP foin mak manda ba Parlamento Nasional iha loron 31 Marsu 2008 fulan tolu liu periodu ezekusaun orsamentu 2007, husi 116,409 000 milloens, 104,87 milloens ka 90,1 % mak ezekuta tiha ona.

Faktus real hatudu katak, husi 90,1%, husi total hetan ezekusaun ona osan nebe mak gasta lolos (tuir relatoriu ne'e rasik hateten katak) hamutuk 64,336,035 milloes ka 55% porsentu deit. Restu hamutuk 40,535,035 milloes sei hela hanesan obrigasaun nebe presiza selu atu hotu tan kompromete ona - hanesan osan Carry Over.

Husi total Carry Over rasik total hamutuk, 22,721,318 milloes iha items bens e serbisus, kapital menor 4,597,664 millaun, kapital dezenvolvimentu 9,848,245 millaun no pagamentus ba transferensias ho total 3,367,808 mak sai hanesan orsamentu carry over.

Relatoriu ne'e mos hatudu katak Primeiru Ministru rasik laiha kapasidade atu ezekuta hotu osan nebe mak aloka ba nia gabinete. Husi total 7,737 milloens dollares amerikanu iha Gabinete Primeiru Ministru tuir ralatoriu ezeku-saun ne'e PM JAG gasta deit 4,594 millaun, 2,054 millaun sai hanesan obrigasaun osan nebe kompromete tiha atu selu ka sai hanesan carry over. Nudar Ministru Defeza no Seguransa nebe hetan alokasaun 11,537 millaun - tuir relatoriu ezekusaun ne'e hatudu katak, nia gasta deit 5,819 millaun no 3,838 sai hanesan obrigasaun ka carry over.

Kritikas nebe PM JAG mak fo sai ba governu Fretilin tan orsamentu carry over iha orsamentu 2006-2007 iha items kapital dezenvolvimentu sai hanesan fali instrumentu salvasaun ba governu AMP nian hodi hateten katak sira halo ona buat ruma. Salvasaun ne'e ita hare husi membrus governu AMP balun nebe halo inaugurasaun ba projetus kapital dezenvolvimentu husik hela hanesan carry over husi governu Fretilin.

Se ita fiar deit mak numeru tuir relatoriu ezekusaun orsamentu tranzitoriu ita sei lahatene oinsa los osan ne'e gasta no ba aktividades saida los. Karik aktividades sira ne'e sai hanesan segredu ba povu timor oan tomak hanesan riku soin membrus governu nebe mak uluk PM JAG hateten atu deklara too ohin loron sei sai segredu hela deit.

Molok relatoriu ne'e hatama ba Parlamento Nasional, iha fulan sia (9) nia laran, ita lahare projetus estadu nian fo sai liu hosi jornal no media lokal sira, hodi emprezarius sira bele hetan oportunidade atu partisipa ba tender projectus sira ne'e. Ita nudar sidadaun Timor-Leste nian mos larona kontratus publikus fo sai iha jornal, se prosessu gasta orsamentu tranzitoriu lao hanesan ne'e, ita bele deskunfia katak governu la aplika dekretu lei no 10/2005 kona ba rejime juridiku aprovisionamentu ka tender (RJA), la tuir Decretu lei no 11/2005 kona infrasaun administrativas ba RJA no kona ba rejime juridiku ba kontratus publikus inklui dekretu lei no 12/2005 kona ba rejime juridiku ba kontratus publikus.

Atu hatene klean liu kona ba sasan hirak ne'e karik presiza duni halo auditoria externa independente ida hodi investiga lolos gastu nebe governu AMP nian halo ba orsamentu periodu tranzitoriu 2007.

Ita seidauk hatene oinsa governu PM JAG gasta osan pagamentus transferensias nian hamutuk 12, 114 000 milloens nebe gasta 8,362,884 milloens no obrigasaun hanesan Carry Over hamutuk 3,367,808 milloes. Se osan pagamentus transferensias ezekuta duni tuir Dekretu governu no 3/2007 (29 Agostu) kona ba subvensaun publikas no komisaun sira. Pagamentus transferensias sai hanesan items ida fasil atu ezekuta, hanesan atu fahe deit ba povu, dalaruma fahe sala tan! Nune'e, se gastu ne'e lahalo tuir dekretu, governu ida ne'e bele hamosu nepotismu, koluzaun no korupsaun.

Ho tauk ba osan povu nia gasta arbiru, ita presiza duni auditoria externa hodi konfirma numerus sira nebe aprezenta iha relatoriu ne'e. Dalaruma ita mos rona katak emprezarius nebe mak hetan kontratu husi governu AMP ba projetus publikus nian hatudu katak iha ligasaun forte ho Partidu iha AMP nia laran no karik mos familias membrus governu balun involve hetan kontratus hirak ne'e. Se hanesan ne'e, governu ida ne'e labele tauk deklara sira nia riku soin ho aseita auditoria externa ba osan nebe mak gasta tiha ona iha orsamentu periodu tranzitoriu nian.
Primeiru Ministru, JAG hafoin hetan no-mea'asaun atu sai Xefe governu haklaken lia fuan transparensia ho hahu hateten katak, nia governu no membrus governu sira sei deklara sira nia riku soin ba povu tomak, se mak nauk deit 0,50 USD se hasai husi nia kargo politiku hanesan membru governu. Too ohin loron ita seidauk rona membru governu ida deklara sira nian riku soin, karik PM JAG hein nia membrus sira nia bolsu nakonu ho osan mak foin deklara sira nia riku soin. Ho lia Mambai nian hateten katak, keta halo AMP atu sai governu All Money to Pocket - AMP (osan tomak sena ba bolsu).

Membrus Parlamento Nasional barak konti-nua husu bainhira los mak membrus governu AMP nian, inklui Primeiru-Ministru no Vise Pri-meiru Ministru, deklara sira nia riku soin? Too ohin loron seidauk hetan resposta husi governu AMP nian.

Deklarasaun riku soin governu AMP bele sai hanesan ezemplu boot ba transparensia husi governu AMP nebe se halao karik, se tuir duni lei numero 7/2007 (25 Jullu) kona ba Estatuto ba Titulares sira ba Orgaun Soberano nebe iha kapitulu I koalia kona-ba rejistu inte-reses riku soin husi orgaun soberano sira. Iha regulamentasaun ba lei ne'e tuir dekretu go-vernu no 2/2007 (1 Agostu) kona ba rejistu intereses ba orgaun soberano sira, laos deit ba Primeiru Ministru no membrus governu sira maibe Prezidente da Republika, Prezidente Tri-bunal Supremu no Justisa mos tenki deklara sira nia riku soin.

Atu konklui, relatoriu ne'e ita lahare pare-ser mai husi auditoriu externa ida nebe bele hateten katak, numerus nebe maka apre-zenta iha relatoriu nian laran adekuadu ona no laiha indikasaun ba kollusaun, korupsaun no nepotismu. Relatoriu ne'e mos hatudu deit numerus, ita lahatene osan nebe mak gasta ona iha benefisiu ba povu kiak sira iha rai nia laran. Ho membrus governu sira la deklara sira nia riku soin alem osan ne lagasta hotu, sira nebe mak gasta karik, gasta arbiru deit halo ita deskunfia katak KKN moris tiha ona no se buras tan iha governu AMP nia laran. Maske governu ne'e foin hamriik fulan 9 nia laran, ita hein katak governu ida ne'e se la sai governu All Money to Pocket (AMP).

Lokalizasaun: transforma Elitisme Ekonomia Kapitalisme

Antero Benedito da Silva*
Se ita liga ba paradigma dezenvolvementu, globalizasaun hanesan penetrasaun kontinua husi paradigma modernisme hanesan blue print (model unika) ba sosiedade hotu iha mundu. Maibe, globalizasaun kontinua kria injustisa sosial. Globalizasaun korporasaun globalkompanhia transnasionais (TNCs) sobu nasaun sira, manipula no dita politika governu demokratikus nasaun sul sira no la preukupa komunidade lokais sira nia moris. Kiak iha mundu kontinua aumenta, no meoambinte hetan sofre ba beibeik. Globalizasaun sai tiha ona forsa neo-kolonial ida neebe tau ameasa ba nasaun post-kolonial sira. Kondisaun ida nee kria resistensia foun neebe makaas husi movementu sosial mundu tomak iha nasaun sul no norte sira. Movementu sosial sira espekula katak lokalizasaun mak sai alternativu ba problema ida nee. Iha artigu ho titulu "deglobalizasaun" publika iha klaak loron 02 Abril 2008, ita koalia kona proposta Dr. Walden Belo no kritika Eis-Presidenti Republika Portugal Mario Soares kona krise neo-liberal, dala ida nee ita koalia lokalizasaun husi matenek nain Michael Albert ho nia kolega sira.

Michael Albert propoin pontu balun, bainhira ita koalia kona globalizasaun alternativu; primeiru, fo atensaun uluk ba trabalhadores sira, meo-ambiente, kultura no direitus umanos. Segundu, demokratizasaun instituisaun-instituisaun iha nivel hothotu husi lokal too global, inkluindu Banku Mundial, IMF, WTO no ONU. Terseiru, halo desizaun tenki besik ba ema sira neebe sei kona impatu desizaun sira nee. Kuartu, halo justisa no fahe riku soin no poder iha lokal no global; Kintu, konversi ekonomia global ba meo-ambiente; Sestu, kria moris diak liu husi responde ba nesesidade umanidade no meo-ambiente. Ualo, halo proteksaun ba ema moris, neebe makaas no ekonomia mundial neebe naksobu dadaun katak nasaun sira preciza proteza sira nia ekonomia nasional atu bele iha kbiit hodi ses-an husi krise ekonomia global no proteza sira nia sidadaun sira (cf.Albert, M,2000).

Konseitu alternativu sira seluk mak mai husi Colin Hines, autor libru ho titulu "Lokalizasaun: Manifesto Global." Tuir Hines, katak komunidade lokal bele manejia riku soin lokal justa liu tan entre sira rasik. Se mak sira presiza buat ruma maibe la esiste iha sira nia komunidade, liu husi merkadu lokal sira bele halo interkambiu ho komunidade sira seluk. Maibe kolektividade sai faktor sabe-fundamental, atu evita elitisme ekonomia. Vandana Shiva haktuir katak Organizasaun baze Amerika ida naran International Forum on Globalization suporta idea ida katak mundu presiza reduz-hamenus poder iha nivel global ba lokal, iha neebe esiste ona kultura organizasaun komunidade-komunidade lokal. Iha Meksiku tinan 2000 movementu sosial-sosiedade sivil sira halo kritika katak dezenvolvementu neebe tau todan liu ba kresimentu ekonomika (pertumbuhan ekonomi) sei falta objetivu-objetivu sosial;GNP ba moris diak ema minoria halo terus no hamosu sofrementu ema maioria, estragu meo-ambiente no riku soin komunal komunidade lokal nian. Mekadu libre uza tiha ona estadu-nasional hodi promove sira nia interese-katak interese nasaun korporatismu no kompanhia internasionais sira hodi povu nia naran. Lokalizasaun tanba nee tenki sai alternativu ba povu lokal atu kontinua moris no esiste no politikamente demokratika (Cf.Esteva, 2001).

Iha tempu hanesan, protagonistas Teoria Post Development sira koalia radikal liu tan. Matenek nain sira hanesan Escobar, Sachs no Crus hateten katak underdevelopment (terbelakang), nesesidades no siensia hotu nee kontrusaun Euro-Amerika sira nian neebe aplika deit ba kontekstu balun katak limitadu ba espasiu. Ita presiza halo inovasaun ba aproximasaun alternativu, teoria no terminolojia pratika sira. Povu nia matenek indigenas, importansia poder no kultura sai aspeitus fundamentais sira. Ba matenek nain sira leten nee, epoka developmentalisme nee hotu ona, mundu la presiza sira ona. Teoria post-development hare katak matenek orijinal (indigenas) mak superior liu, la aseita konseitu pobreza, no la aseita dependensia; sira nia kritika makaas no halo ema barak tilun manas, no fo influensia makaas ba movementu sosiais sira. Iha tinan 2001, Movemento Sem Terras iha Brazil inisia movementu internasional ida hanaran Forum Sosial Mundial (World Social Forum) iha Porto Alegre Brazil, kontinua ba iha India no espalha ba kontinente hotu. Forum Sosial Mundial tau alternativu ba Forum Ekonomia Mundial neebe sai protagonista ida seluk ba pobreza estrutural iha nasaun sul sira, ema no nasaun sira neebe halibur iha Forum Ekonomia Mundial bele kategoria ba hardline capitalists, kapitalistas garis keras.

Ideas alternativu, maske fo inspirasaun, sei nafatin deit abstratu, bainhira ita la rekonese katak komunidade lokais sira mak nain ba rikursus lokal, existe estruturas populares-indigenas neebe demokratiku, kria mekanismu distribuisaun rikursus, no halo tentativas transformasaun sosial oioin atu aseguru komunidade lokal neebe umano, justa no sustentabel. Agora, ita husu pergunta. Nasaun nia knaar mak saida? Grupu auto-sufisiensia ekonomia sira nee sei mosu ho inisiativu povu rasik duni, sosiedade sivil/grupu organizados sira ho governu presisa kaer knaar balun?
*) Estudante MBS iha Kooperativu no Sosial Enterprise, Universidade Kolejio Cork, Irlandia

Knar Kultura Timor ba Prosesu Hari'i Nasaun

Oinsa Lideransa Nasional?
(Kontinuasaun husi edisaun 11)

Jose 'Josh' Trindade*

Relasiona ho ideias Uma Lulik nasional, se ida ne'e mak iha, Ita nia Lider Nasional nebe eleitu liu husi elesaun, tengke inagura tuir tradisaun Timor nian iha Uma Lulik nasional nai okos. Lider eleitu hanesan Prezidente ka Premeiru Ministru sei halulik, atu nune'e ita nudar povu bele fiar no laran metin ba sira wainhira sira ukun. Iha prosesu halulik lider nasional, ne'e hanesan tradisaun Timor nian. Hanesan ita hatene katak, wainhira ita hili ema baibain ida mak atu sai ukun nain, entau Liurai nebe kaer poder hodi ukun, sei tau liman ba nia leten, atu nune'e ema hotu bele simu, respeitu no rona nia nudar ukun nain ida.

Nune'e wainhira ita iha prezidente eleitu, ita bele husu reprezentante Liurai antigu ida husi rai-ulun, ida husi rai-klaran, no ida husi rai-ikun hodi mai fo poder ka tau liman ba prezidente hodi ukun rai, povu no nasaun ida ne'e. Prosesu ida ne'e mos simboliza prinsipiu demokrasia hanesan dehan "poder husi povu, mak povu no ba povu". Problema tanba, iha ema barak ladun respeitu lider nasional sira.

Dezafiu ba Kultura Timor
Ideias nebe hau temi ona iha leten, hanesan buat ida karik balu dehan furak tebtebes. Maibe ideias sira ne'e sei hanesan mehi ida. Ita nia kultura agora hetan dezafiu barak tebtebes.

Dezafiu sira ne'e mak hanesan tuir mai ne'e:

  • Matenek nain Timor oan ladun hatene ou koko atu buka hatene kona ba kultura no tradisaun Timor nian. Ita hatene katak matenek nain Timor oan sira, maioria eskola iha rai liur. Sira aprende buat barak iha rai liur, maibe oportunidade ba sira atu aprende ka istuda kona ba Timor laiha. Nune'e mos, ita nia katuas sira nebe sei kaer metin kultura no tradisaun ita nia, espera katak, se ita Timor oan ba ona eskola no edukadu, la presiza hatene kona ba kultura no tradisaun. Hanoin ida nebe ke sala tebtebes. Timor oan balun nebe matenek mos dala ruma hateten katak, kultura no tradisaun Timor nian hanesan bahasa karik dehan "Kuno/Ketinggalan zaman/terbelakang".
  • Ita Nia Governu ladun fo valor ka rekuiñese kultura no tradisaun Timor nian nebe diak ba prosesu hari'i nasaun - istadu, prose hametin unidade, ka prosesu hari'i dame no hakmatek. Ita hare katak, Governu uluk tau parte kultura hamutuk ho Ministeriu edukasaun, no atensaun ba Kultura minimu tebtebes. Foin Governu agora iha Sekretariu Estadu ida ba asuntu Kultura. Hau nia pergunta mak ne'e, "tan sa ita fo atensaun barak liu ba direitu Feto no Labarik duke atensaun ba ita nia kultura"? Se ita ladun hatene ita nia kultura nia hun ka abut, oin sa ita bele mete projeitu sira nebe ita implementa ne'e los ka lae?
  • Atakes Eksternal. Tuir hau nia hare, desde Portuguesa sira mai iha Timor to'o agora, Kultura Timor hetan atakes makaas husi liur. Portuguese nia tempu sira halo modifikasaun barak iha kultura Timor nian, liu-liu iha estrutura poder tradisional. Ida ne'e kria konfuzaun bo'ot ida ba ema sira nebe hakarak buka atu hatene Kultura Timor. Indonesia nia tempu, governu Indonesia bandu Timor oan sira labele halo seramonia ka ritual tradisional. Iha balun mos intepreta katak, tradisaun Timor ne'e hanesan.
  • Involvementu Ema estranjeiru iha prosesu dezenvolvimentu iha Timor mos ladun fo valor no vantajen ba dezenvolvimentu Kultura Timor nian. Kolega estranjeiru sira ladun iha kuiñesimentu nebe diak kona ba kultura Timor nian. Tanba ne'e sira uza prinsipiu demokrasia no direitus humanus hodi mete buat hotu. Dala ruma, tanba falta kuiñesimentu nebe diak ba Kultura Timor nian, sira koalia katak Kultura mak ladiak. Iha zantar ho kolega Internasional ida, nia hateten ba hau katak, nia hatene kultura Timor mak hanesan "ema Timor kaben ho nia Prima/Primu no baku sira nia fen lorloron".

Dezafiu bo'ot ida mak ba Joven sira agora no jerasaun foun main. Ohin hau temi ona iha leten katak, kultura hanesan buat ida nebe ema tenki aprende. Ema ida laos moris mai hatene kedas ninia kultura. Maibe nia tenki aprende. Izemplu, kultura hanesan lingua, ema ida-idak tenki aprende kona ba lingua. Se lae, ita lahatene. Maibe, tempu agora, iha prosesu hari nasaun, laiha programa konkreta ida husi governu ka NGO sira hodi hanorin Joven kona ba Kultura Timor. Balu hateten katak, kultura no tradisaun Timor ladun iha influensa ona Joven sira nebe moris iha Dili. Los duni, maibe se ita la hanoin no fo izemplu ba sira, entaun bainhira mak sira bele aprende?

Ohin Loron ita selebra loron direitus humanus. Direitu Kultura hanesan parte ida husi direitu humanus. Tuir hau nia observasaun iha prosesu hari'i nasaun durante Tinan 7 nia laran husi 2000 - 2007, TIMOR OAN LAKON DIREITU BA KULTURA. Laiha oportunidade atu buka hatene, haburas no dezenvolve ninia kultura rasik. Buat hotu-hotu Timor oan importa husi rai liur. Ita importa komesa husi Supermi, ayam potong, lider, estrutura, sistema, ideias no kultura husi rai liur mak mai.

Wainhira mak bele dezenvolve no kaer nasaun ne'e rasik, se ita importa buat hotu-hotu?

*) Hakerek nain, Analizador ba Kultura Timor.

(Artigo Nia Rohan)

Naldo Rei Hakerek Livru, Publika Iha Australia

Angie Bexley

Titulu: Resistance: A Childhood Fighting for East Timor
Autor: Naldo Rei
Imprimidor: St Lucia Queensland, Univesity Of Queensland Press
Total pajina: 338

Naldo Rei nia istoria moris nudar testimuña ba sakrifisiu ne'ebé Timor-Leste hasoru durante luta kontra militar Indonesia ba Independensia. Ida ne'e nudar literariu ba dala rua hosi autor Timor oan ne'ebé publika iha Ingles iha periodu liutiha okupasaun. Ba dala uluk mak The Crossing, knaar furak iha diaspora ne'ebé Luis Cardoso hakerek. Cardoso nudar parte hosi membru ne'ebé relativamente previleju, joven ho orientasaun lusofonu moris iha administrasaun kolonia Portugez no eduka iha seminariu Katoliku. (Nia kontemporaniu inklui numeru futuru lider politika, entre sira mak eis lider rezistensia no Primeiru Ministru atual Xanana Gusmão). Cardoso hetan bolsu estudu atu estuda iha Lisboa molok invazaun Indonesia ba Timor-Leste iha tinan 1975. Situasaun ne'e halo nia labele fila ba Timor durante tinan 24 nia laran. Knaar rua ne'e refleta jerasaun ho esperiensia diferente no trajetoria pesoal.

Moris iha 1975, Rei nudar labarik okupasaun. Nia livru fo naroman ba esperiensia no jerasaun jovem ne'ebé sosializa iha kultura rezistensia no segredu. Liu husi nia lensa pesoal ne'ebé hodi nia hosi Timor-Leste ne'ebé Indonesia okupa liu hosi Jakarta no exiliu iha Australia no fila ba Timor-Leste ne'ebé independente - ami mai atu komprende oinsa esperiensia formativu rutiniza iha violensia ne'ebé fo impaktu ba politizasaun jerasaun ne'e. Ami aprende hosi efeitu devastasaun funu no dezlokasaun strutura familia: oinsa otas labarik nia radikaliza no haree ho besik no oinsa nesesidade no ambisaun nudar jovem lakon iha luta nia laran.

Rei nia moris uluk marka ho post invazasaun ne'ebé khaotiku no rihun ba rihun ema sai refujiadu iha foho atu hadook an hosi forsa Indonesia; sira nia hakoi tuir mai no subjesaun ba tekniku kontrola ne'ebé intensu no intimidasaun. Momentu ne'ebé determina nia moris mak bainhira forsa Indonesia oho nia aman. Eventu kritiku "muda hau, labarik nurak sai nudar soldadu no luta nain rezistensia. Justisa ba hau nia aman no hau nia rai, no hirus ba opresaun ne'ebé ami hasoru konstantamente, halakan ho ahi iha hau nia kabun" (276). Hosi pontu ne'eba, nia identidade nudar rezistensia ida firme kedas.

Rei rekruta ba movimentu klandestina nudar mensajeiru espesial, papel ne'ebé presiza joga moris iha risku laran ba moris duplu. Tenki iha loyalidade ne'ebé labele kestiona iha autoritariu no korente hirarkia komando, iha ne'ebé labarik nurak ne'e tuir hela deit. Militar Indonesia kaer, interoga no tortura nia beibeik. Esperiensia traumatiku serve deit atu reforsa tan nia patriotismu, no nia hetan reputasaun nudar "ema ne'ebé nunka tohar". Nia sakrifisiu boot tebtebes, konsekuensia atu sobreviver ba asaltu fiziku no psikolojiku nudar forma depersonalizasaun no distansia emosional.

Lakon suporta familia no tulun hosi kedas otas nurak, nia hetan komunidade no domin fraternu entre nia kamarada sira iha redi rezistensia. Liu hosi moris intensu tebtebes, hyper-maskulinu no hyper-mundu vijilante no kontra insurjensia no hanoin, Rei ema ne'ebé interesante ho karisma flokoriku no mistiku ba rezistensia prinsipal - no nia aman nudar figura ida nia servisu atu proteje. Heroiku, no dala ruma romantiza, imajen hosi tipu gereileiru uluk sai nudar sentru ba identidade Rei: nia hakiak nia fuuk naruk atu aserta ba diferensia ho forsa Indonesia.

Kultura rezistensia forma nia relasaun ho feto. Kode konduta ne'ebé forte hodi hases an hosi sasan romantiku, maski nune'e autor ho moe-moe inziste katak nia laiha interese no enerjia ba sasan sira hanesan ne'e, nia klaramente la interese ba atensaun feto foin sae sira, mos la preokupa ho nia imajen rasik nudar esotiku. Nia memoria ba nia aman ne'ebé militar Indonesia oho forma nia patriotismu, nia konesaun ba inan hakiak ne'ebé fo emosaun besik ne'ebé nia laiha. Tematikamente, feminiza espasu ba protesaun ba feto hirak ne'e ne'ebé reprezenta, fo dalan ba kontra kultura superior maskulinu, no parsialmente troka hodi nega nia an rasik ba komitmentu ba luta ninian.

Halai ba estranjeiru, lori mudansa ba Rei nia moral no sensu ba nia an rasik. Iha nia halai ba Jakarta, nia moris hosi suporta ativista pro-demokrasia Indonesia no grupu solidariedade hosi ne'ebé nia servisu besik: ida ne'e fundamentalmente muda nia dezafiu ba asumsaun hasoru Indonesia hanesan inimigu. Maski ho nia terus no frustasaun nia sofre iha ne'eba, nia kontinua involve iha ativismu estratetejiku ba mundu. Relokasaun ba mundu, ho kontrariu, esperiensia nudar la hakbiit. Nia luta ho soke kultural, difikuldade osan, difikuldade lingua no sensu ba ema ne'ebé husik let.

Bainhira libertasaun mai, Rei fila ba Timor-Leste atu dokumenta selebrasaun independensia. Liutiha hetan tiha liberdade iha tempu inisiu, iha lakon koletivu ba momentum no fokus. Lakon sira nia papel sentral iha urbana bazeia ba intifada, jerasaun Rei hasoru dezafiu, oinsa atu rekonsilia ho pasadu no rekonstrui sira nia an rasik hanesan sujeitu ba post kolonial. Nia livru no testamuña ba sira nia terus. Ne'e fo kestaun fundamental konaba papel poder patriarkal iha konstrusaun ba kultura luta nain. Reflete ba legalidade nia rezistensia iha tempu kiik ona, nia hakerek "labarik tenki labele sai soldadu…Hau sinti hau lakon hau nia tempu labarik no sei nunka hetan fila fali" (278).

Hakerek ho diak, narativu Rei nudar konsiensia rasik no sentimentu no laiha kualidade liriku no laran diak, humor ne'ebé hatun hanesan The Crossing hosi Cardoso. Maibe nia istoria nudar kontribuisaun importante ba literatura Timor ne'ebé foin moris ne'ebé fo inspirasaun sira seluk atu hakerek sira nia rasik.

*) Angie Bexley hosi Department of Anthropology, Research School of Pacific and Asian Studies, The Australian National University. Artigu ne'e hakerek nain haruka ba kla'ak atu publika

Lori Kareta Estadu ba Interese Privadu, Governu Halo Korupsaun!

almerio ALVAREZ
Membru governu AMP balun halo korupsaun. Korupsaun ne'e la'os deit foti povu nia osan. Maibe mos lori kareta estadu nian hodi ba pasiar, hodi fali ba interese familia nian ka ba haris tasi iha loron sabadu, dominggu, no loron feriadu.

Iha loron sabadu ka dominggu, kuandu ita ba iha areia branca, Kristu Rei nian, ita haree kareta no motor barak mak paradu iha ne'eba. Kareta no motor hirak ne'e balun uza nomeru matrikula privadu, maibe kareta ka motor balun mas hakerek ho numeru matrikula governu nian.

Iha dekretu lei, hateten katak autoridade governu nian balun bele uza kareta estadu nian iha loron sabadu, dominggu, ka loron feriadu atu halao servisu estadu nian. Maibe kuandu kareta estadu nian ne'e ba para fali iha tasi ibun, hodi familia ba pasiar iha foho, ida ne'e la'os halao servisu estadu nian.

Provedor Adjunto, Dr. Amândio de Sá Benevides, ne'ebe kla'ak halao entrevista iha edifisiu Provedoria Direitus Humanus e Justisa (PDHJ), Sesta-feira 4/04 hateten katak funsionariu ka autoridade publiku ne'ebe mak uza komputadores, uma, kareta atu fasilita sira nia funsionamentu. "Maibe ita mos haree katak iha mos korpu membru governu balun ne'ebe mak uza fali kareta governu nian laos atu halao servisu estadu nian," esplika Amândio ba kla'ak iha ninia eskritoriu, Kaikoli.

Amândio hatutan liu tan katak iha mos dekretu lei ida konaba uzu veikulu estadu nian atu se mak bele uza, se mak labele uza, no se mak iha direitu atu uza. dekretu lei ne'e mos hateten katak iha autoridades balun mak lei fo autoriza ba sira atu uza kareta ho matrikula governu nian; laos deit iha tempu segunda to'o sesta-feira. Maibe sira bele uza iha loron Sabadu no Dominggu. "Hanesan Primeiru Ministru ka Ministru sira ne'e la iha lei ida hateten katak sira servisu deit iha loron Segunda to'o Sesta-feira. Maibe sira bele servisu nafatin iha tempu feriadu hanesan Sabadu no Dominggu. Lei preve ona katak, sira bele uza kareta sira ne'e iha loron Sabadu no dominggu atu halo servisu. Ne'e mak lei hateten katak Direitor sira bele uza kareta iha loron Sabadu no Dominggu atu halo servisu. Se karik sira uza la halo servisu, ne'e labele," afirma Amândio.

PDHJ komesa loke sira nia servisu iha areia boa governasaun hahu iha 2006. "Iha tempu krizi, ami komesa loke ona ami nia odan matan atu halo monitorizasaun laos deit uzu kareta. Maibe kombustives mos. Ami mos kestiona ba membru governu balun ne'ebe uza fali kareta governu nian atu tula ai ka ba para fali iha praia (tasi-red) ne'eba. Ami haruka mos karta ofisial ida ba Ministeriu Transportes no Terrestres atu identifika kareta governu nian hamutuk hira no kareta hira mak ema uza iha loron Sabadu no Dominggu. Kareta hira mak mai husi doadores sira, kareta hira mak governu sosa. Maiz infelizmente, ami la hetan dadus ne'ebe korektu," katak Amândio.

Maske nune'e, PDHJ hato'o nafatin rekomendasaun ba governu atu governu liu husi Primeiru Ministru ho Ministru sira tau matan hodi haree uzu kareta estadu nian ne'e. Ami mos identifika, ema hasai tiha numeru matrikula polisia nian, balun uza ba halao servisu privadu nian. Ida ne'e la diak," tenik nia. Konaba kazu uzu kareta estadu, PDHJ mos hato'o ona rekomendasaun ba Procuradoria Geral da Republica (PGR) atu halo investigasun klean no halo sansaun ruma ba ema sira ne'ebe mak uza kareta la tuir regras no la tuir dekretu lei ne'ebe mak iha.

Tanba ida ne'e mak importante liu mak tuir Amândio katak governu tenki barani foti medidas atual; liliu Ministru sira ou direitor jeral ka Sekretaris Permanente sira tenki tau matan atu kontrola sasan estadu nian. "Laos deit kareta, maibe telemovel, komputadores, makina filmazen nian ne'ebe dala ruma ema laos uza ba nesesidade estadu nian, maibe ba fali interese privadu. Tan ne'e mak knar PDHJ nian mak atu fiskaliza buat sira ne'e. Ami rekomenda ba governu no estadu atu tau matan no hadia buat sira ne'e," tenik nia.

Provedor Adjunto PDHJ ne'e mos klarifika liu tan katak, tuir lolos PDHJ iha programa barak hakarak atu halo monitorizasaun ba iha area boa governasaun nian, maibe iha 2008, PDHJ husu orsamentu atu aumenta orsamentu, maibe Parlamentu Nasional la aseita. "Ne'ebe ami uza nafatin osan ne'ebe mak ami hetan iha tinan kotuk liu ba. Ida ne'e hatudu katak volume servisu nian ne'e nafatin. Labele aumenta. Ami hein katak volume servisu nian ne'e bele aumenta. Aumenta para identifika diak liu boa governasaun nian, maibe labele halo buat barak tanba orsamentu limitadu," hatutan Amândio.

Iha parte seluk, deputadu husi bankada CNRT, Hugo Aderito ne'ebe kla'ak entrevista iha Segun-dafeira foin lalais ne'e iha Uma Fukun Parlamentu Nasional deklara katak se deit mak kaer servisu estadu nian, tantu direitor, Ministru, ou Primeiru Ministru, nia tenki hakruk ba lei ne'ebe mak regula tiha ona konaba maneira uzu propriedade estadu nian. "Kuandu to'o agora mak funsionariu sira sei uza nafatin kareta estadu nian iha loron sabadu, dominggu, ka loron feriadu, ida ne'e indixiplina," afirma Aderito.

Eiz Direitor diariu Timor Post ne'e mos konfesa katak husi nia parte nia mos hatene katak iha duni ema balun; hanesan direitor ka Ministru balun uza kareta estadu nian tau fali nomeru matrikula kareta privadu nian. "Hau senti buat sira hanesan ne'e labele akontese. Ministeriu Estatal bele haree mos buat sira ne'e no mos tenki halo sosializa maka'as dekretu lei konaba uzu propriedade estadu nian ne'e," hatutan nia.

Aderito haklaken liu tan katak iha autoridade governu nian balun ne'ebe hatene dekretu lei ne'e. Maibe sira rasik mak hakarak kontra duni. Konaba uzu propriedade estadu nian, Aderito Hugo sei koalia direitamente ho ministeriu ne'ebe kompetente atu bele haree oinsa implementasaun dekretu lei ne'e.

Maske nune'e, Aderito Hugo haree direitor, ministru, ka Primeiru Ministru ne'ebe uza kareta estadu nian ba halo fali aktividade ka interese privadu ne'e nu'udar hahalok korupsaun. "Kuandu ita uza ona kareta governu nian laos iha tempu servisu, ida ne'e parte ida korupsaun ona. Hau rona katak ema uza kareta no jerigen ba enxe kazolina hodi naran estadu nian, ida ne'e mos korupsaun. Tanba osan ne'ebe mak sira uza ne'e, osan ida ne'e povu nian. Ami parlamentu aprova osan, laos governu atu uza naran-naran hanesan ne'e. Ami aprova osan para governu bele servi publiku ninia interese," afirma deputadu husi bankada CNRT ne'e.

Kritika husi komunidade ne'ebe husu ba membru governu sira la bele uza kareta estadu nian iha loron sabadu no dominggu laos deit mai husi PDHJ no membru Parlamentu Nasional. Estudante husi universidade Timor Lorosa'e, Valenti Amaral, (25) husi Departementu Siensia Sosial ba kla'ak iha UNTL, Kuarta-feira foin lalais ne'e deklara membru governu balun ne'ebe mak uzu kareta ho nomeru matrikula governu nian, ne'e halo ona korupsaun ba sasan estadu nian. "Hau husu ba governu, tenki kria mekanizmu no hola medidas ba autoridade estadu nian ne'ebe mak lori kareta estadu ba interese privadu," tenik Valenti.

Valenti konfesa katak nia haree iha autoridade balun ne'ebe mak lori fali kareta estadu nian iha loron sabadu no dominggu tula nia familia ba haris tasi iha Liquisa ka iha area branca, Kristu Rei nian ne'e. "Balun falin, hau haree, sira nia oan ka sira nia familia mak hodi fali kareta estadu nian ba iha tasi ibun no pasiar," konfesa Valenti ne'ebe husu mos ba polisia atu kaer ema ne'ebe mak lori kareta estadu nian ba halao fali interese privadu.

Mari Alkatiri: "Governu La Implementa KII, Ditadura Komesa Tama Ona"

Assistente Sekretariu do Estado husi Estadus Unidus ba Azia no Pasifik (Asia dan Pasifik), Christopher R. Hill, halao sorumutu ho Sekretariu Jeral Fretilin, Mari Alkatiri iha ninia rezidensia, iha tersa-feira foin lalais ne'e, iha soru mutu durante minutu 15 nia laran ne'e, Mari Alkatiri no Christopher Hill koalia sobre situasaun aktual rai laran nian. "Sira hakarak hatene lolos no halo analiza ba situasaun aktual rai ne'e," katak Mari Alkatiri ba jornalista sira iha konferensia ba imprensa.

Assistenti Sekretariu do Estadu husi Estadus Unidus ne'e kontente tanba partidu Fretilin nu'udar partidu opozisaun de faktu la aproveita krize ne'e hodi halo asaltu ba poder. "Fretilin hatudu maturidade tanba nia hanesan partidu ida ke iha opozisaun no partidu úniku ida ke apoiou ba operasaun komandu konjunta," hatutan eiz Primeiru Ministru ne'e.

Mari Alkatiri esplika liu tan katak Fretilin hakarak estado Timor-Leste ne'e tenki metin nafatin. Fretilin nia hakarak mak krizi 2006 ne'e labele akontese tan. Fretilin sei iha pasensia nafatin tanba hakarak ita iha nasaun ne'e sai nasaun demokratiku no ita nia estadu ne'e atu respeitu lei.
Wainhira jornalista sira husu konaba oinsa ninia hanoin konaba operasaun konjunta atu kaer Gastão Salsinha, Mari Alkatiri hateten katak Salsinha ne'e elementus kiik ida iha problema boot nia laran. "Hau hateten momos kedas katak, se mak halai tuir Salsinha, sira mak uluk uza Salsinha. La'os F-FDTL maibe hau dehan governu. Hau dehan Prezedenti da Republika Interenu. Sira mak uza Salsinha, e sira mak uluk uza Alfredo Reinaldo Alves no petisionariu sira. Maske nune'e Fretilin sei la aproveita situasaun ne'e para atu halo fali difikuldade ba estadu hodi rezolve problema. Fretilin sei fo apoiu tomak ba estadu atu rezlve problema," hatutan nia.

Maske nune'e Mari Alkatiri husu estadu atu labele uza krimi hasoru Salsinha ho ninia grupu sira. "Hau hakarak hatete filafali, labele tiru mate ema ida. Lalika aproveita fali estadu de sitio para dehan atu oho ema. Salsinha nia forsa ne'e la vale buat ida. Nia fosra kiik. Sei Salsinha seidauk entrega-an mak politika mak sala laos tamba nia forca ita laiha forca. Se politika mak sala, ita rezolve uluk problema politika. Lalika tuir fali ema hodi oho ema. Lalika hakarak halai lalais atu kaer Salsinha antes Prezedenti da Republika fila husi Australia," afirma Mari Alkatiri.

Fretilin mos haree katak kuandu governu hanaruk bebeik estado de sitio, governu komesa atu halo daudaun ona ditadura."Tanba ita haree governu komesa hatauk ona ema. Ida ne'e loke ona odamatan ba ditadura nian," esplika Mari Alkatiri ne'ebe mos ejiji nafatin eleisaun antisipada kuandu governu AMP rahun hotu ona. "Hau la iha duvidas katak eleisaun antisipada sei akontese. Balun dehan fali hau mehi. Sira ne'ebe mak lakohi para iha eleisaun antisipada, sira mak mehi, Kuandu AMP hakohi-aan ona, eleisaun antisipada bele realiza," afirma Mari Alkatiri ne'ebe husu mos ba governu AMP atu respeita desizaun orgaun maximu hanesan Parlamentu Nasional ne'ebe fo sai rezolusaun KII atu halo investigasaun ba kazu atentadu 11/2 ba iha Prezidente da Republika Ramos Horta. "Kuandu governu la implementa rezolusaun KII, ne'e hatudu momos katak ditadura komesa tama ona iha ita nia rain. Tanba governu kontra ona lei," tenik Mari Alkatiri.

Manduku Venenozu Reprezenta "Domin" Forsa INTERFET

zeloy VIEIRA, almerio ALVAREZ
Problema manduku "interfet" nebe oras ne'e sai preokupasaun nasional, halo ita atu kestiona objetivu prezensa forsa INTERFET nebe Australia lidera iha Timor tinan 1999. Mai atu salva povu timor, maibe husik hela manduku venenozu. Hahalok ne'e halo ita hanoin fali muzika Indonesia "Madu dan Racun" nebe Aribowo populariza iha tinan 80 nia laran. Forsa INTERFET lori "banin-ben (domin, red.)" iha liman kuana, no "veneno (buat aat, red.)" iha liman karuk. Kazu manduku "interfet" hanorin lisaun di'ak ida ba ita katak tulun husi ema seluk la sempre reprezenta "grasa (rahmat, red.)" nebe monu husi lalehan, maibe bele mos signifika "desgrasa (kesengsaraan, red.)" inferno nian.

Timor-Leste nasaun ida nebe bele dehan "nunka" ses husi problema. Povu Timor-Leste sempre moris iha abu-abu konflitu sosial politika, problema ekonomia to'o problema meio-ambiente. Ba problema konflitu sosial-politika, ekonomia la fasil atu rezolve maibe la taka dalan atu problema ne'e bele rezolve. Maibe bainhira meio-ambiente hetan estragus boot, susar atu rekupera fali. Ema barak fiar ona realidade ida ne’e.

Ita sente triste, tanba to'o ohin loron, realidade hatudu mai ita katak ema uituan de'it mak preokupa ho problema meio-ambiente. Preokupasaun ne'e mos, so mosu bainhira ameasa hahu fo risku boot. Iha tinan hirak nia laran, faktu barak hatudu ona katak, ameasa no degradasaun ambiental ne'e nudar kauza husi aktividade ema nian, hanesan tesi ai arbiru iha fatin barak, neglijensia (kelalaian, red.) no inkonsiensia umana seluk kona ba importansia meio-ambiente ba ema nia moris. Tan ne'e, mekanismu legal estado nian atu kontrola meio-ambiente mos sai fraku tebes.

Bainhira problema ambiental iha rai ne'e seidauk rezolve ho di'ak, faktus foun hahu mosu. Manduku venenozu nebe populasaun sira sarani ho naran manduku "interfet", hahu fo ameasa boot ba agrikultor sira no balada fuik rai na'in (lokal, red). Manduku "interfet" nebe siensista sira bolu bufo marinus ne'e venenozu tebes no bele hamate ema ka animal nebe konsume nia na'an. Tuir observasaun nebe hala'o husi ONG Haburas Foundation, no publika ona iha VERDE edisaun Fevereiru 2008, katak populasi manduku "interfet" nebe iha lian ingles bolu cane toad, ne'e sa'e maka'as ona iha Timor. Ida ne'e tanba manduku venenozu ne'e, inan ida bele produz tolun husi 20.000-33.000. Publikasaun balun nebe hakerek kona ba bufo marinus ne'e, numeru tolun husi inan ida bele to'o 60.000.

Kuaze tinan 8 ona manduku venenozu ne'e moris iha Timor-Leste, no durante ne'e, la iha atensaun husi ukun-na'in nebe kompetente atu halo prevensaun ba manduku aat ne'e nia populasi. Bazeia ba kalkulasaun teoretiku husi numeru tolun nebe manduku inan ida produz, ita la hakfodak ho realidade katak numeru manduku venenozu ne'e sa'e maka'as husi tinan ba tinan.
Tanba sa mak bufo marinus ne'e konyesidu ho manduku "interfet?" Prezensa manduku venenozu iha Timor-Leste tuir informasaun nebe kla'ak foti bazeia ba peskiza Haburas Foundation no sasin na'in sira nebe publika iha VERDE, hatudu evidensia forte katak, Bufo Marinus ne'e forsa Autraliano sira mak lori mai bainhira hola parte iha forsas multinasional ka International Forces for East Timor (INTERFET) nebe fo siguransa ba Timor-Leste iha tinan 1999. Tanba manduku ne'e la'os animal nativu Timor-Leste, maibe animal espesies foun iha rai ne'e. Populasaun iha area rurais sarani de'it ho manduku "interfet" tuir de'it manduku ne'e nia istoria mai iha timor.

INTERFET hakotu ona nia misaun iha tinan hirak liu ba, maibe Bufo Marinus nebe sai nafatin "rekordasaun" venenozu husi forsa australianu sira. Bufo Marinus hahu fo ameasa boot ba nasaun kiik ne'e hahu husi parte fronteira no ikus mai "espansaun" manduku venenozu ho nia habitante nebe sa'e maka'as sei naklekar iha teritoriu tomak. Informasaun nebe kla'ak hetan husi ONG Haburas Foundation katak, manduku venenozu ne'e mos hahu tama ona kapital Dili.
Tanba ameasa husi manduku venenozu ne'e hahu seriu, debate kona ba ameasa manduku ne'e mos hahu tama ona iha Parlamento Nasional (PN). Deptado José Teixeira, husi bankada Fretilin, ba dahuluk levanta kazu ne'e iha plenaria PN. Deputadus sira preukupadu, ikus mai komisaun D Parlamento Nasional deside hala'o audiensia ho ONG Haburas Foundation kona ba manduku venenozu ne'e.

Deputado Joaquim dos Santos, husi bankada Fretilin nebe mos nudar membru Komisaun D Parlamento Nasional, konsidera ameasa manduku "interfet" ne'e nudar kauza nasional ida. "Ne'e kauza nasional ida, tan manduku venenozu ne'e bele hamate ema no balada nebe konsome manduku ne'e nia na'an," Joaquim afirma ba kla'ak, tersa-feira (08/04) foin lalais ne'e, iha Parlamento Nasional. Tuir Joaquim, Komisaun D hola ona pozisaun no sei bolu Sekretariu Estadu kompetenti husi governu AMP, atu mai esplika ba Parlamento Nasional kona medidas atu kombate manduku venenozu ne'e. "Medidas ne'e tenke hola lalais, tan manduku ne'e bele estraga ita nia sistema ekolojika," tenik Joaquim.

Ameasa manduku venenozu ne'e, la'os Timor-Leste de'it mak infrenta. Tuir Directot ONG Haburas Foundation, Demétrio do Amaral de Carvalho, katak Australia, nasaun nebe "eksporta" manduku venenozu ne'e mai Timor-Leste, mos oras ne'e enfrenta hela problema husi manduku venenozu ne'e. Bainhira kla'ak dadalia ho nia iha nia servisu fatin, tersa-feira (08/04), Demétrio haktuir katak iha 2006-2007, governu Australia investe osan dolar miliaun 8 atu kombate manduku cane toad ne'e. Maski nune'e, to'o ohin loron, manduku venenozu ne'e sei sai problema seriu iha Australia.

Agora, pergunta boot ba ita, oin sa Estado Timor-Leste nia esforsu atu kombate manduku venenozu ne'e? Infelizmente, to'o agora ministeriu nebe kompetente seidauk iha hanoin ida atu rezolve problema ne'e. "Tuir loloos ne'e, governu, liu-liu ministeriu agrikultura mak sai entidade prinsipal atu hola medidas hodi halo intervensaun ruma ba kazu manduku venenozu ne'e," Demetrio Amaral afirma. Maibe, tuir Demétrio, nia rasik seidauk hare reasaun ruma husi governu. "Hau moe tebtebes ba departementu ida nebe maka servisu ba agrikultura, tan la iha konyesimentu kona ba ameasa seriu hasoru ekolojia timor nian," Demetrio Amaral esplika.

Manduku "interfet" sai tiha ona problema seriu nebe presiza entidade hotu nia kontribuisaun atu oin sa kombate manduku venenozu ne'e. Maibe responsabilidade boot liu mak ba ema sira nebe lori manduku venenozu ne'e mai timor. Ba kestaun ida ne'e, Deputado Joaquim dos Santos no Direktur Haburas Foundation, Demetrio Amaral iha opiniaun nebe hanesan. Katak responsabilidade ne'e tau nafatin ba se de'it mak hatama manduku ne'e mai Timor-Leste. "Se de'it, individu ka kolektivu, husi estadu nebe de'it maka hatama manduku ne'e mai Timor, ne'e krimi," Joaquim hateten.

Joaquim hatutan katak, bainhira prosesu ne'e konsidera krimi, estadu Timor-Leste iha obrigasaun atu halo protesaun ba povu TL. Proteje nia sistema ekolojia, hodi halo fiskalizasaun ida klean atu buka hatene se maka lori manduku ne'e mai iha timor no tenke lori ema ne'e ba tribunal.

Iha parte seluk, Demetrio hateten katak, Organizasoens Nasoens Unidas (ONU) labele ses husi problema ne'e. ONU mos tenke responsabiliza. Se manduku ne'e tama mai husi Australia, politikamente parlamentu bele ko'alia dadauk ona ba ONU, tanba iha 1999-2000 ONU mak sai hanesan autoridade administrativa iha timor. Tanba periudu zero quarantine ne'e la'os sala governu timor nian, maibe sala ne'e autoridade administrativa UNTAET.

Demetrio esplika liu tan ba kla'ak katak, bainhira iha audiensia ho Komisaun D, nia husu atu parlamentu rekere ba ONU nia postu operasaun. Tanba sira tau ona kondisoens ida naran Environmental recover cost husi sira nia operasaun iha timor, inklui kustu ida atu rekupera ka kombate cane toad nebe mak tama mai durante iha sira nia misaun iha timor. Ba Australia, Demetrio hateten, presiza haree evidensia forte hodi halo prosesu legal iha futuru. "Agora dadauk buka informasaun depois iha futuru, karik iha dadus natoon, ita bele hodi povu timor nia naran halo hanesan class action hasoru Australia.