Susar: "Hau Tun Husi Ai-laran Atu Kontribui Paz no Estabilidade"

agustinha XIMENES

Ema iha Timor laran tomak hatene se mak naran Susar. Amario da Costa alias Susar nudar Ajenti Policia Nasional Timor-Leste (PNTL), ne'ebe halao nia kna'ar iha Vila hodi fo protesaun ba povu no nasaun liu husi estabilizasaun lei no orden ne'ebe konsagra tiha ona iha Konstituisaun Republika Demokratika de Timor Leste.

Durante iha ai-laran, Susar sai nu'udar ema espesial ba Alfredo Reinado. Iha akontesementu 11/2 ne'ebe konsege halo Presidente Ramos Horta hetan kanek, Susar rasik deklara katak nia rasik involve iha atakes 11/2 ba Presidente Ramos Horta. Akontesementu atakes ba membru F-FDTL iha Fatuk Ahi, 23 de Maiu 2006,  akontesementu hadau kilat PNTL nian iha Tunu Bibi no tiruteus hasoru FSI iha Same, Susar mos involve iha laran.

Estadu liu husi Prokurador Geral da Republika, Longuinhos Monteiro informa ba kla'ak iha 3 de Marsu hateten katak Ministeriu Publiko hasai mandatu kapturasaun ba tribunal ba Susar. Tribunal mos hasai tiha ona mandatu ne'ebe refere. Ho karta kapturasaun ne'e mak operasaun konjunta ne'ebe dereitamente halao husi F-FDTL ho PNTL iha parte Oeste.

Iha Sabadu (01/03) kalan Susar rasik entrega-an iha Turiskai lori ho kilat AK 33, FNC, no karegador sia ho 299 amunisoens. Depois entrega aan ba komandu operasaun konjunta iha /2/03 Susar halao konferensia ba imprensa hateten katak nia rasik hakarak entrega aan, tanba hakarak kontribui ba estabilidade no paz. Porta voz komando operasaun konjunta, Tenete Kolonel Filomeno Paixão fo obrigadu ba Susar tanba Susar rasik dereitamente hatudu dignidade ne'ebe diak hodi tuir dalan justisa. "Dalan pozitivu ne'ebe Susar foti hanesan kestaun importante. Tamba atu aseleira prosesu justisa iha rai laran durante tinan rua nia laran, inklui mos kazu 11 de Fevereiru. Tanba ne'e, Longuinhos rasik husu ba Salsinha atu halo tuir buat nebe Susar rasik hatudu ona," tenik Prokurado Geral, Longuinhos ba kla'ak iha ninia eskritoria Kaikoli Dili.

Justisa ba Susar halao iha hearing prelemenaria iha Segunda-feira 03/03 no Tersa-feira 04/03. Tribunal hamonu pena detensaun preventiva durante tinan ida nia laran. Prokurador Internasional, Felismino Cardozo informa ba jornalista sira katak, Tribunal fo medida de Coação atu tama iha prizaun preventiva tinan ida. "Tanba durante Susar sai nu'udar membru matebian Alfredo Reinado involve iha kazu ne'en hanesan, halo atentadu ba Xefi do Estadu, Ramos Horta. Ne'e halo krime hasoru seguranca estadu. Involve iha kazu 23 de Maio, kazu Same, Kazu Tunu Bibi no kazu 11 de Fevereiru. Entaun juiz kondena ho artigu 338, 53, 340 ho 140 kodiku penal," afirma Felismino.

Konaba pena detensaun ba Susar, advogadu Susar, Jose Pedro Camões hateten katak Susar rasik konkorda ho desizaun husi tribunal tanba nia rasik hato'o iha tribunal involve dereitamnte ba atuasaun hirak ne'e. Nune'e mos prizaun preventiva nu'udar pasu importante atu hein prosesu ne'ebe tuir mai hodi hein nia maluk sira ne'ebe mak durante tinan rua nia laran sai membru Alfredo. Susar, rasik simu pena detensaun preventiva tinan ida. "Hau tun mai iha Dili atu povu ne'e bele moris iha estabilidade no paz nia laran," deklara Susar iha konferensia ba imprensa ne'ebe halao iha Memorial Hall iha 02/03 liu ba.