Grupu Haksesuk Kla'ak (Discussion Group)

Subscribe ba Kla'ak Online
Email:
Vizita grupu ne'e

08 April 2008

Kla'ak Semanal Edisaun 10 (25 Marsu 2008)


INDISE

Estado de Sitio, Poder de Garganta - Bainhira governu atu prolonga tan estado de sitio, bankada opozisaun hanesan Fretilin, PUN, no UNDERTIM kestionakontiudu husi estado de sitio ne'e rasik no ninia vantazen ba povu ki'ik-ki'ak sira.

Fretilin: "Estado de Sitio no Emerjensia Hatudu Inkapasidade Governu AMP" - Estadu de sitio prolongga ba loron 30 no kria tan estadu de emerjensia. Bankada Fretilin hato'o deklarasaun katak ejijensia atu dekreta estadu de sitio no emerjensia, hatudu deit inkapasidade governu AMP atu ukun iha situasaun normal.

HALIRI: Surpresa Politica ou Supressão Politica? - Xanana Gusmao, nudar politiku, nunka kole atu hamosu surpreza politika. Iha 2006, bainhira sei nudar Prezidente Republika, nia kehe "ahi-kla'ak loromonu-lorosa'e" nebe Salsinha ho nia grupo tau iha sira nia petisaun sai "ahi-lakan" liu husi nia "Mensagem ba Nasaun." "Ahi-lakan" nebe teki-tekir halo sidade Dili sai "ahi-latun," karik lakohi dehan "ahi-kdesan."

Deskonfia Governu AMP Involve Iha Atentadu 11/2 - Bankada Fretilin iha Uma Fukun Parlamentu Nasional, Kuarta-feira 26/03 halao koferensia ba imprensa konaba rezolusaun Komisaun Inkeritu Internasional (KII) ba atentadu 11/2.

POLISIA-POVU Hanesan Fali Inimigo - Violensia ne'ebe elementus forsa PNTL no F-FDTL sira halo ba populasaun. Marcio Gonsalves hanesan vitima ida ne'ebe hetan hahalok violensia husi membru operasaun konjunta.

Timotio de Deus, Direitor JSMP: "Estado de Sitio la Defini Klaru iha Konstituisaun" - Diretor Judisial System Monitoring Programme (JSMP), Timotio de Deus (28), preukupa ho implementasaun estado de sitio no estado de emerjensia ne'ebe halo populasaun balun hetan baku no ameasas husi forsa.

Mário Viegas Carrascalão: "...Estado de Sitio no Estado de Emergência la Proteje Povu Nia Moris..." - Deputado husi bankada Partido Social Democrata, PSD, Eng. Mário Viegas Carrascalão konsidera proposta governu nian ne'e (prolongamentu estadu de sitio) nudar violasaun direitos humanos povu Timor-Leste nian.

Che Guevara: "Hasta La Vitoria Siempre" - Che Guevara nudar eroi ne'ebé koñesidu laos deit iha mundu maibe mos iha Timor-Leste; laiha eroi internasional ne'ebé naran boot liu Che Guevara.

Sistema Asuransi Saúde Estadus Unidus Hamate Kliente - Michael Moore, film maker koñesidu hosi Estadus Unidus produz filme dokumenter ne'ebé investiga sistema tratamentu saúde Estadus Unidus.

Haburas Foundation Harii Sentru Treinamentu Ambiental Iha Hera - Haburas Foundation liu tiha tinan barak ona halo sira nia atividade hodi proteze meu ambiente.

Planu Estadus Unidus Hafahe Amerika Latina Frustradu - Lao hosi anin ne'ebé simu liutiha invazasun Kolombia iha loron 1 fulan Marsu ba Ekuador-rezultadu masakre ...

Opiniaun: Globalizasaun sai Ameasa ba Estadu Nasional - Tinan hirak liu ba Dr. Geogre Aditjondro halo visita mai Timor-Leste, no hakerek artigu ida ho titulu "Timor-Leste sai husi okupasaun Indonesia, tama fali ba Kapitalismu Global."

Opiniaun: Knar Kultura ba Nasaun Foun Timor Leste - Ho kultura ita bele haree diferensia entre grupu humanu ida ho seluk. Kultura mos haketak ita ema ho animal.

Istoria Colimau 2000 - Grupo adorasaun ne'e mosu iha Same Oela Luhu Manufahi, husi mestri ida naran Martinho Vidal nebe Milisia oho iha 1999 iha Hera-Metinaro, haktuir Ozorio Leque.

Lei Komunikasaun Sosial Atu Salva Se? - Iha futuru, jornalista sira atu lao tuir dalan ne'ebe? Hakarak iha lei ida ne'ebe responde nesesidade jornalista nian ka lae?

Francisco Xavier : "Abandona partidu no povu, ida ne'e dezastre ba partidu" - Problema ne'ebe akontese iha Partidu ASDT laran, halo povu ASDT ijiji ba presidente ASDT, hodi hasai secretario jeral ASDT Gil Alves husi partidu ASDT.

EDTL Sosa Jerador Foun Bebeik, Eletrisidade Mate Bebeik - Elektrisidade nebe lakan-mate bebeik durante ne'e, halo governu AMP sai alvu publiku nia kritika no lamentasaun.

Lia Menon
Hau gosta tebes jornal kla’ak tan lia fuan mesak todan, berita diak nian. You are the best. Nana, Ai-tarak Laran 7374xxx

Redasaun: Obrigadu

Hau hakarak fo parabens boot ba kla’ak, tanba hakerek ho matenek, barani no Tetum diak. Kabere, Dili 7312xxx

Redasaun: Obrigadu

Hau apresia ho imi nia edisaun ikus. Parabens
Hakarak sei hello ba kolega Nuno no Tome Geronimo teman lama
Abraso
Celso, Timor Post_Lisboa@hotmail.com

Redasaun: Obrigadu

Hadia
Ami hosi redasaun husu deskulpa ba sani nain sira tamba informasaun iha edisaun 9 ho titulu Bandidu no Gusmão, iha artigu ne'e nia okos hakerek knaar Tom Hyland ninian; Tom Hyland ne'ebé hakerek artigu ne'e laos reprezentante Republika Irlanda ba Timor-Leste no hanorin Inglesh iha ministeriu negosiu estranjeiru, maibe Tom Hyland nudar jornalista The Age, Australia. Hodi nune'e ami halao tiha ona koresaun. Ami mos husu deskulpa ba Tom Hyland iha Timor-Leste no Tom Hyland iha Australia. Obrigadu.

Estado de Sitio, Poder de Garganta

Tomada de posse husi Prezidente Ramos Horta ba
Governu AMP nebe lidera husi Xanana Gusmao iha
Palacio de Nobre

almerio ALVAREZ, zevonia VIEIRA
Tinan 1922, iha Italia demokrasia bele dehan katak demokrasia falladu. Benito Mussolini tama iha Roma ho farda militar fasista nian. Iha dekada tuir mai, Adolf Hitler mos tuir Benito Mussolino ninia ain fatin ho ideolojia fasista. Iha tinan 1933, Adolf Hitler sai nudar Kanselar Alemaña. Hahu husi ne'e, nia komesa la rekoñese sistema parlamentaria. Hitler hahu forma milisias hodi teror ema sira nebe mak durante iha ninia moris ne'e haree nudar ninia inimigu.

Adolf Hilter foti teoria Treitschke nian konaba "mane nebe boot" iha istoria. Nia mos foti filozofia Nietzche konaba oppermensch ida ne'e mak determina destinu ema seluk ninia vida. Ba povu Alemaña tomak no ema hotu iha mundu tomak, tenki tuir de'it sa ida mak Adolf Hitler hanoin no desidi ona. "Hau, Adolf Hitler, hau mak na'in husi istoria, hau mak matan husi istoria, hau mak liman ba istoria, no hau mak espiritu istoria nian."

Durante iha ninia moris tomak, Hitler nunka rekoñese ninia sala. Nia, Adolf Hitler mak ema perfeitu. Naran Hitler ba Nazista sira nudar simbolu no lema (semboyan-red) ba ema Alemaun sira. Naran ida ne'e mak Nazista sira hakerek iha fatin barbarak iha Alemaña tomak.

Realidade nebe mak Mussolini no Hilter implementa iha tempu sira ukun, la'os piada ka atu dezafia fali governasaun AMP. Iha Mussolini no Hitler nia ukun, poder la'os ona iha povu nia liman, maibe iha Mussolini no Hitler nia liman. Mussolini no Hitler loko aan no foti aan. Povu, la iha valor iha sira nia oin. Desizaun hotu-hotu mai husi ema ida naran Mussolini no Hitler ne'e.

Bainhira governu atu prolonga tan estado de sitio, bankada opozisaun hanesan Fretilin, PUN, no UNDERTIM kestiona kontiudu husi estado de sitio ne'e rasik no ninia vantazen ba povu ki'ik-ki'ak sira. Polémika atu prolonga tan estado de sitio, la'os de'it mai husi bankada opozisaun, maibe povu ai-leba, sosiedade civil, jurista, no akademiku mos kestiona estado de sitio ne'e rasik.

"Iha Konstituisaun RDTL tuir hau nia hatene katak estado Timor-Leste bele implementa estado de sitio, bainhira hetan atakes no perigu ruma husi nasaun seluk mai Timor-Leste nebe ho intensaun hakarak okupa nasaun Timor-Leste. Ho atakes mai husi rai liur ne'e, Prezidente da Republika halo konsultasaun ho orgaun sira nebe kompetente hanesan Konsellu Seguransa atu bele aplika estado de sitio iha Timor-Leste," katak Diretor Judisial System Monitoring Programme (JSMP), Timotio de Deus (28) ba kla'ak iha ninia servisu fatin, Kolmera Segunda-feira foin lalais ne'e. Kuandu ameasa ruma mai husi rai liur, Timotio hatutan liu tan katak estado bele implementa estado de sitio atu normaliza fali situasaun hodi nune'e orgaun publiku bele hala'o sira nia aktividade hanesan baibain.

Implementasaun estado de sítio ka estado de emerjensia, la'os de'it jurista sira mak kestiona, maibe membru Parlamentu Nasional sira nebe sai nudar tilun, matan, no ibun ba sidadaun Timor-Leste mos kestiona implementasaun estado de sitio ne'e. "Iha kondisoens hanesan ne'e, implementasaun estado de sitio no estado de emerjensia, governu la ukun, maibe governu manda," afirma Xefi Bankada Fretilin, Francisco Branco iha ninia deklarasaun politika nebe fo sai iha Kinta-feira 20/03 liu ba iha Uma Fukun, Parlamentu Nasional. Francisco Branco hatutan liu tan katak implementasaun estadu de sitio ka estado de emerjensia ne'e mos fo impaktu negativu ba povu ki'ik sira nia moris, liliu iha parte ekonomia no mos viola ona direitus umanus.

Razaun nebe Xefi bankada Fretilin ne'e deklara sai bele dehan razaun ida ke fundamental no lojiku. Kuandu ita haree direitamente realidade sa ida mak akontese iha terenu, la'os populasaun oituan de'it mak hetan konsekuensia husi implementasaun estado de sitio. Maibe populasaun baibain nebe mak la'os halo atentado ba Prezidente Republika no Primeiru Ministru mos hetan tortura, baku, no ameasa husi forsas operasaun konjunta halibur F-FDTL no PNTL. Tanba ne'e mak Xefi bankada Fretilin ne'e iha razaun duni halo deklarasaun politika ba militantes no simpatezantes partidu Fretilin atu halo vijilansia nafatin ba realidade nebe lao daudaun iha rai laran.

Xefi bankada UNDERTIM, Cornelio Gama, ho naran kodiku L7 mos vota kontra implementasaun estado de sitio ba periudu da ruak nian. "Hau vota kontra tanba estado de sitio aplika iha Loromonu no estadu emerjensia aplika iha Lorosa'e," tenik L7 ba kla'ak iha Uma Fukun Parlamentu Nasional, Segunda-feira foin lalais ne'e. Tuir L7 ninia interpretasaun katak ho kondisoens hanesan ne'e bele hamosu filafali problema Lorosae-Loromonu nebe akontese iha 2006 liu ba. "Ho razaun ida ne'e mak hau la konkorda no vota kontra," afirma Prezidente partidu UNDERTIM ne'e.

Prezidente Partidu Unidade Nasional (PUN), Fernanda Borges mos kestiona desizaun governu atu hanaruk tan estado de sitio. "Kuandu ita uza implementa bebeik estado de sitio, bele monu iha rezime totalitariu ida," deklara Fernanda Borges iha ninia deklarasaun politika, bainhira rona argumentu no desizaun governu AMP atu hanaruk tan estado de sitio ba loron 30 tan. Ho razaun ida ne'e mak bankada PUN husu ba Gastão Salsinha no ninia grupu sira atu entrega aan ba justisa. "Ami apela ba ita boot sira, entrega aan ba justisa, tanba justisa mak nudar kroat ba imi," apela Fernanda Borges ba Salsinha ho ninia grupu sira.

Prezidente Partido Social Democrata (PSD), Mário Viegas Carrascalão nebe mak durante ne'e defende maka'as programa governu AMP, mos bainhira governu husu Parlamentu Nasional atu hanaruk tan estado de sitio, Mário mos vota kontra. "Iha realidade estado de sitio no emerjensia la proteje povu nia vida. Povu barak maka sente katak komplikadu ho sira nia moris no viola ona dereitus umanus no garantia sidadaun Timor-Leste," konfesa Mário Carrascalão ba kla'ak iha Uma Fukun Parlamentu Nasional foin lalais ne'e.

Perguntas boot ida mak, implementasaun estado de sitio no estado de emerjensia husi governu AMP ne'e onestu duni atu salva povu husi opresaun nia laran ou estado de sitio ne'e nudar garganta de poder ida? La'os governu AMP mak iha direitu de'it atu responde perguntas ida ne'e, maibe publiku mos iha direitu boot liu atu hatan perguntas ne'e. Tanba povu ki'ik-ki'ak sira mak na'in ba nasaun Timor-Leste ne'e.

Fretilin : "Estado de Sitio no Emerjensia Hatudu Inkapasidade Governu AMP"

zevonia VIEIRA
Estadu de sitio prolongga ba loron 30 no kria tan estadu de emerjensia. Bankada Fretilin hato'o deklarasaun katak ejijensia atu dekreta estadu de sitio no emerjensia, hatudu deit inkapasidade governu AMP atu ukun iha situasaun normal.

Trajedia 11/2 to'o agora sei halo povu Timor-Leste konfuzaun. To'o agora Salsinha ho nia grupu balun sedauk entrega an, maske operasaun konjuta ne'ebe diriji husi F-FDTL no PNTL seidauk suksesu. Perguntas boot ba povu sira tansa maka Salsinha sedauk bele entrega an?

Estadu de sitio ne'ebe kria husi 48 oras, loron 10, loron 30 no agora iha loron 20/3 prolongga tan estadu de sitio iha parte loromonu no kria estadu de emerjensia iha lorosae, hahu iha loron 20/3 iha Parlamentu Nasional.

Bankada Fretilin ne'ebe hetan kadera mayoria ho total 21 iha Uma Fukun Parlamentu Nasional kuaze kontra no abstein tanba tuir bankada Fretilin nia hanoin katak, "estadu de sitio ka emerjensia fo impaktu negativu ba povu ki'ik sira nia moris liuliu iha parte ekonomia no mos viola ona direitus humanus hodi moris livre".

Ho razaun hirak ne'e mak Vice Prezidente bankada Fretilin, Francisco Miranda Branco hato'o kestaun ne'e liu husi deklarasaun katak bankada Fretilin depois haree besik ba impaktu ne'ebe oras ne'e lori ba povu ki'ik no kiak iha baze no rona mos reazen barak husi sosiadade.

"Konsekuensia husi dekretu estadu de sitio ne'ebe halakon dadaun direitus bazikus sidadaun barak nian, maske situasaun de poder ida ne'e, lori hakmatek ba ema balun," katak Branco. Bankada Fretilin ne'e hatutan liu tan katak Timor-Leste la presija dekreta estadu de sitio ne'ebe hahu husi 48 oras, loron 10, loron 30. Tuir lolos se governu haree ida ne'e presija duni tanba situasaun estadu ninian husu dala ida loron 30. Se la sala estadu de sitio ka emerjensia ne'ebe naruk hanesan ne'e, karik la iha presediensia iha mundo tomak.

Bankada Fretilin fo apoiu deit ba iha operasaun konjuta F-FDTL no PNTL. Branco hateten: "ami apoiu atu halao nafatin ba operasaun konjuta ne'e tanba Timor-Leste hetan iha tempu kotuk esperiensia rua operasaun militar, ida maka operasaun ba Atsabe no Hatulia tinan 2003. Seluk fali mak operasaun iha Manufahi 2006. Iha tempu ne'eba estadu Timor-Leste la presija dekreta estadu de sitio ka emerjensia, hodi halao operasuan militar".

Branco hateten husi partidu Fretilin mos rejista, iha tempu ne'eba governu husi Dr. Mari Alkatiri, liu tiha operasaun Atsabe no Hatulia, halao governasaun aberta iha Atsabe no la presija dekreta estadu de sitio ka emerjensia. Governasaun aberta ne'e hetan sussesu no ajuda servisu seguransa nian.

Iha deklarasaun Fretilin nian ne'e, Branco haforsa liu tan katak ezijensia atu dekreta kontinuidade estadu de sitio no estadu de emerjensia ne'e bele hatudu deit inkapasidade governu AMP atu ukun iha situasaun ida normal. Tanba ne'e maka halo opsaun hodi halakon direitus bazikus sidadaun sira nian, liu husi estadu de sitio ka estadu de emerjensia. "ida ne'e prejudika dadaun ona sidadsaun ki'ik sira nia moris lorloron. Ukun iha kondisaun ida ne'e, bele loke dalan halakon estadu de direitu iha Timor-Leste no harii fali estadu ne'ebe sidadaun sira lakon sira nia direitu," tenik nia.

Branco hatutan katak governu AMP ukun iha kondisaun hanesan ne'e hatudu katak governu la ukun maibe governu komanda no situasaun ida ne'e halo ita hanoin fila fali ba tempu rezistensia ne'ebe buat hotu iha komandu ida deit nia okos.

Bankada Fretilin mos hato'o nia preokupasaun katak oras ne'e dadaun mosu ona tauk iha sidadaun sira nia le'et kona ba asaun operasaun polisia intelejensia ninian, hanesan Premeiru Minsitru atual, Xanana Gusmao rasik hateten situasaun ida ne'e hanesan iha tinan 24 nia laran, tempu okupasaun Indonesia.

Tuir observasaun bankada Fretilin nian katak oras ne'e povu moris iha estadu ida ne'ebe la iha primado de lei. "Ita iha estadu ida ne'ebe, ema ukun goza, laos deit imunidade maibe mos impunidade. Ami hakarak hato'o ami nia preukupasaun atu uma fukun parlamentu nasional ne'e labele sai hanesan cavalo mandadu deit, hodi tau karimbu ba desizaun hotu ne'ebe mai. Ezeptu ba deputadus balun no mos opozisaun Fretilin. Situasaun ne'e bele lori ita nia estadu lao lalais los ba ditadura.

Tuir bankada Fretilin nia haree ba kondisaun ne'ebe nasaun hasoru oras ne'e, la iha ameasa boot ba ordem Konstituisional demokratika.

Ho razaun ne'e, bankada Fretilin hato'o nia deklarasaun katak labele fo apoiu deklarasaun ba prolonggasaun estadu de emerjensia muito menus, ba estadu de sitio iha ita nia nasaun. "Maibe ami hakarak iha ne'e fo nafatin, apoiu tomak ba operasaun konjuta F-FDTL/PNTL hodi halao opersaun," tenik nia.

Bankada Fretilin husu ba povu tomak, liuliu ba militantes no simpatizantes Fretilin atu tulun komando konjuta F-FDTL/PNTL atu halao nia operasaun ho susesu. La haluha bankada Fretilin mos husu ba Salsinha atu voluntariamente entrega aan bna iha justisa liu husi forsa seguransa. "Operasaun ne'ebe lori estadu RDTL ninian desizaun tanba nudar ema moris deit mak bele fo kontribuisaun boot ba lia los no justisa iha Timor Leste," dehan Branco.

Entretantu jornalista kla'ak mos dada lia ho Prezidente partidu UNDERTIM, Cornelio Gama, alias L7. Bankada UNDERTIM votu kontra, wainhira governu husu ba parlamentu nasional atu hanaruk tan estado de sitio no estado de emerjensia. "Hau vota kontra tanba estadu de sitio aplika iha Loromonu no estadu emerjensia aplika iha Lorosae," afirma L7.

L7 hatutan liu tan katak ida ne'e sei bele hamosu fila fali problema Lorosae-Loromonu. L7 hatutan liu tan katak diak liu kria nafatin estadu de sitio iha Timor tomak, hodi nune'e governu bele rezolve problema ho diak. "Tanba povu balun sei hela iha lona okos no justisa maka sedauk lao ho diak," dehan L7.

HALIRI: Surpresa Politica ou Supressão Politica?

Até que em fim! Desizaun ne'e sai duni. Infelizmente, desizaun ne'e la tuir espektativa publiku nian, maibe tuir receio ema barak nian. Receio ema barak nian katak governu AMP sei prolonga tan periudo Estado de Sitio.

Xanana Gusmao, nudar politiku, nunka kole atu hamosu surpreza politika. Iha 2006, bainhira sei nudar Prezidente Republika, nia kehe "ahi-kla'ak loromonu-lorosa'e" nebe Salsinha ho nia grupo tau iha sira nia petisaun sai "ahi-lakan" liu husi nia "Mensagem ba Nasaun." "Ahi-lakan" nebe teki-tekir halo sidade Dili sai "ahi-latun," karik lakohi dehan "ahi-kdesan."

Agora nudar Primeiro Ministro, Xanana Gusmao kontinua halo surpreza. Hafoin, hamosu Estado de Sitio durante fulan ida, ho governu AMP nebe nia ukun, hamosu situasaun politika rua nebe perpetua nafatin problema loromonu-lorosa'e nebe oras ne'e ema Timor ta'uk atu ko'alia.

Situasaun rua nebe, konsiente ka inkonsientemente, governu AMP hamosu hodi hafahe Timor-Leste mak Estado de Sitio ba loromonu, Estado de Emergencia ba lorosa'e. Hein katak, interpretasaun ida ne'e sala.

Interpretasaun kona ba politika governu AMP ne'e bele sala, maibe inisiativa atu halo interpretasaun la'os buat ida nebe sala iha konstituisaun no lei nia oin. Karik ita nia konstituisaun halo difinisaun klaru kona ba diferensa Estado de Sitio ho Estado de Emergencia, biban sei la iha atu halo interpretasaun. Tan konstituisaun la difini, loke biban ba ema ka grupo ida-idak atu halo interpretasaun tuir nia tendensia ideolojika no tuir nia interese politiku. Hanesan foin lalais, hafoin eleisaun jeral, ita interpreta artigo 106 Konstituisaun RDTL.

Bainhira publiku sei konfuzu kona ba insidente 11/2 no sei kestiona hela aktuasaun forsa seguransa nian iha periodu Estado de Sitio, Governu AMP hamosu tan konfuzaun seluk kona ba Estado de Emergencia. Bainhira ema no politiku sira ejiji atu governu muda Estado de Sitio ba Estado de Emergencia, governu AMP nia resposta mak simu pedasuk sorin, maibe mos oferese fali tomak ida: kria duni Estado de Emergencia tuir ejijensia publiku, maibe mantem nafatin Estado de Sitio.

Ida ne'e bele dehan, nudar implementasaun kontrariu husi hahalok kultural ema timor nian "han isin, sikat ruin." Hahalok governu AMP nian ne'e "han isin mesa-mesak, fahe ruin ba ema tomak." Karik implementasaun Estado de Sitio no Estado de Emergencia ne'e, hamosu vantajem politika ruma, vantajem ne'e serve liu atu sustenta no haboot governu AMP nia ukun, do que atu fo proteksaun ba povu Timor-Leste nia moris.

Tan ne'e, la iha duvida bainhira proposta governu AMP nian atu prolonga periudu Estado de Sitio no hamosu Estado de Emergencia, hetan reaksaun kontra, la'os de'it husi Fretilin nebe nudar rival AMP nian, maibe mos husi deputado AMP rasik.

Deputado Parlamento Nasional, Mario Viegas Carrascalão, husi PSD, fo nia votu kontra iha Parlamentu ba proposta AMP nian atu prolonga periudu Estado de Sitio. Tuir Carrascalão, atu Estado de Sitio ka Estado de Emergencia, la proteje povu nia moris, maski mosu ho objectivu atu hadi'a proteksaun ba moris povu nian.

Ho lensa ka binokulu politiku oinoin, ita la konsegue hare hetan pontu ka linha sa ida mak halo Estado de Sitio ho Estado de Emergencia ne'e la hanesan. Karik ho mikroskopiu politiku AMP nian mak bele hare hetan.

Politikamente, situasaun rua ne'e signifika buat ida de'it: konsentrasaun de poder iha governu no militar nia liman. Karik ho liafuan seluk, ita bele dehan perpetuasaun de poder autoritariu.

Maski mosu ho naran la hanesan, kondisaun nebe uza atu justifika situasaun rua ne'e hanesan de'it. Rekolhimentu obrigatoriu ho oras hanesan, labele iha reuniaun no manifestasaun politika. Sa tan, manifestasaun hasoru governu. Surpresa politica ou supressão politica?

Populasaun barak mak sai vitima ona ba surpreza politika ukun-na'in sira nian. Surpreza politika ho karakter atu halo supressão politica, liu husi meios politicos nebe persuasivo. Meios politicos nebe obriga povu atu neneik-neneik, sai apatiku ho mal administrasaun governu no mal funcionamento estado nian.

Receio kona abuzu de poder durante periudu Estado de Sitio no Estado de Emergencia hanesan fulan ida liu ba sei kontinua. Tan to'o agora la iha mekanismu legal ida atu kontrola no fo sangsaun ba abuzu de poder no autoridade sira ne'e. Husu deskulpa bebeik, la'os mekanismu politiku, sa tan legal atu assume responsabilidade. Deskulpa dala barak liu sai tiha ona reasaun espontanea nebe hamoris inisiativa atu halo sala bebeik.

Se loron ruma mosu duni poder ditadura ida iha rai ne'e, ita hotu tenke hatan ba pergunta ne'e: Ne'e tanba ukun-na'in sira mak kanten demais atu ukun ka ita povu mak obediente exagerado. Obediente exagerado aat liu ta'uk ten demais.

Deskonfia Governu AMP Involve Iha Atentadu 11/2

almerio ALVAREZ, zevonia VIEIRA
Bankada Fretilin iha Uma Fukun Parlamentu Nasional, Kuarta-feira 26/03 halao koferensia ba imprensa konaba rezolusaun Komisaun Inkeritu Internasional (KII) ba atentadu 11/2. Primeiru Ministru Xanana Gusmão hateten katak sei lori lai ba Konsellu Ministru hodi halo diskute. A final rezolusaun KII ne'e Parlamentu Nasional aprova tiha ona iha fulan ida liu ba. Karik governu AMP tauk, tanba rezultadu husi KII ne'e bele mos deskobre sai se los mak involve iha atentadu 11/2.

"Ami kestiona deklarasaun Primeiru Ministru Xanana Gusmão iha plenaria Parlamentu Nasional konaba implementasaun ba rezolusaun KII ne'ebe Parlamentu Nasional aprova tiha ona. Liu husi rezolusaun No. 9/2 maioria deputadu aprova rezolusaun KII. Primeiru Ministru Xanana Gusmão hateten mos katak KII so bele sai deit hanesan komplementu ba investigasaun ne'ebe oras ne'e daudaun halao hela husi FBI ho Polisia Federal Australia," katak Francisco Miranda Branco ba jornalista sira iha konferensia imprensa ne'ebe halao husi Fretilin iha sala bankada Fretilin nian Parlamentu Nasional Kuarta-feira 26/03 liu ba. Tuir Miranda katak, argumentu husi Primeiru Ministru Xanana Gusmão nian ne'e falta seriadade husi governu.

Membru Fretilin seluk hanesan Estanislau da Conceição Aleixo Maria da Silva mos kestiona deklarasaun Primeiru Ministru Xanana Gusmão nian konaba rezolusaun KII atu halo investigasaun klean konaba atentadu 11/2 ba iha Prezidente Ramos Horta. "Ida ne'e hatudu katak orgaun soberano ne'ebe aprova tiha ona rezolusaun KII husu ba governu atu implementa KII ba akontesementu 11/2. To'o agora ami seidauk haree governu ninia inisiativa rasik hateke ba ninia uma laran, hateke ba governu rasik konaba responsabilidade governu nian ne'e atu responsabiliza atentadu 11/2," hateten eiz Primeiru Ministru ne'e iha konferensia imprensa.

Justifikasaun ne'ebe hato'o husi Primeiru Ministru, Xanana Gusmão iha Parlamentu Nasional tuir Estanislau la konvense ezijensia Parlamentu Nasional. "La konvense tanba investigasaun ne'ebe agora halo husi Federal Bureau Internasional (FBI) no Australian Federal Police (AFP) ne'e espesial ba iha investigasaun kriminal. "Ami husu ne'e para atu halo investigasaun ba aspeitu hotu-hotu para haree mos kauza ne'ebe determina ba akontesementu 11/2. Ho nune'e publiku bele hatene lolos saida mak akontese iha 11/2. Para halo apuramentu de responsabilidade. Responsabilidade Nasoens Unidas nian ne'e to'o iha ne'ebe. Responsabilidade FSI nian ne'e to'o iha ne'ebe. Responsabilidade governu nian ne'e to'o iha ne'ebe," afirma Estanislao.

Estanislau haktuir katak, iha rai seluk mak akontesementu boot ida hanesan ne'e (atentadu ba Prezidente no Primeiru Ministru-red), sekretariu estado de defeza no sekretariu estado seguransa, demisaun kedas. "Maibe to'o agora ami seidauk haree medidas governu nian konaba ida ne'e. Ita nia povu hakarak hatene lolos saida mak akontese iha 11/2," hatutan Estanislau. Tanba ida ne'e mak Parlamentu Nasional nu'udar reprezentante povu nian, eziji governu atu implementa rezolusaun KII. "Ami hakarak hatene lolos tansa mak ate agora la implementa KII.

Justifikasaun ne'ebe mak PM, Xanana Gusmão foti, la konvense ami. Ne'e duni ami hakarak hato'o ami nia preukupasaun boot ida ba iha governu atu esklarese," hatutan Estanislau.
Preukupasaun atu halo investigasaun ba iha atentado 11/2 ba Prezidente da Republika ne'e laos deit mai husi partidu opozisaun no membru Parlamentu Nasional tomak. Tuir Estanislau katak Nasoens Unidas mos aseita atu harii KII. "Maibe to'o agora governu seidauk halo pasus para atu implementa KII ne'e," dehan nia.

Krizi 2006, ema hotu-hotu eziji para bolu KII mai iha Timor-Leste hodi halao investigasaun. "Ita hatene katak iha 2006 depois krizi mosu, halo kedas komisaun ona. Ema hotu-hotu konkorda KII iha 2006. Altura ne'e balun la iha governu, hotu-hotu konkorda. Agora nusa mak la halo tan komisaun ne'e. Tantu perguntas boot ida mak tansa mak fulan ida ona, maibe governu la kohi implementa KII," esplika Estanislau.

Kuandu reflete didiak krizi 2006 no atentado 11/2 ba iha Prezidente da Republika no Primeiru Ministru, bele dehan kazu boot liu ne'e mak atentadu 2008. Tanba iha atentadu atu halakon Prezidente da Republika nia vida. "Portante ida ne'e hakarak atu hatudu katak ita la iha koherensia. Ida ne'e mos hatudu katak ita hakarak bosok malu," afirma Estanislau iha konferensia imprensa ne'e.

Primeiru Ministru, Xanana Gusmão iha 25/03 ba Parlamentu Nasional mos hato'o ninia argumentu katak daudaun ne'e governu seidauk bok KII no sei falun metin rezolusaun KII husi Parlamentu Nasional ne'e, tanba kuandu krizi mosu iha 2006, KII ne'e la forte. Tanba ne'e mak Primeiru Ministru, Xanana Gusmão realsa katak governu estuda didiak lai rezolusaun ne'e. Fo lai oportunidade ba iha FBI ho AFP halo lai investigasaun. "Kuandu rezultadu husi FBI no AFP ne'e mak la fo rezultadu ida ke la forte, depois mak ita bolu KII," tenik Xanana Gusmão.

Responde konaba argumentu Primeiru Ministru nian, Francisco Miranda Branco iha konferensia imprensa ne'e hateten katak KII iha 2006 ne'e loke ona akuzasaun ida boot no sai iha media internasional konaba masakre iha Rai Kotu. Ida ne'e buat ida ke Timor-Leste presiza duni nakloke ba mundo atu halo investigasaun. Maibe ikus mai mundo tomak dizmete katak la iha masakre. Rezultadu husi KII ne'e, PM Mari Alkatiri ba tiha ona tribunal depois suspende, tanba la iha provas. Hanesan mos Ministro Interior, Rogerio Lobato. Sira seluk la ba tanba iha diskriminasaun iha implementasaun rekomendasaun sira ne'ebe husi KII hato'o ba iha Ministeriu Publiku," katak Branco hodi hatan argumentu Primeiru Ministru Xanana Gusmão nian katak KII iha 2006 ne'e la forte.

Komentariu konaba KII 2006 nian, Branco nia kolega, Jose Manuel husu Primeiru Ministru Xanana Gusmão atu lee didiak lai KII 2006. "Lee tiha didiak lai ba mak foin halo komparasaun ba ami nia ezijensia ba KII 2008 hodi investiga atentadu 11/2 ba Prezidente Jose Ramos Horta.
Perguntas boot ida husi publiku mak kuandu governu AMP la implementa KII 2008 ne'e parese iha buat ruma ke la lao los ona. "Hau deskonfia planu halo atentadu ba iha Prezidente Jose Manuel Ramos Horta iha 11/2 ne'e planu mai husi ema balun iha governu AMP nia laran karik," esplika Sergio Soares, ba kla'ak iha Balide Kuarta-feira foin lalais ne'e.

POLISIA-POVU Hanesan Fali Inimigo

nico ZECORO
Operasaun konjunta hanesan pakote ida husi estadu de sitiu ne'ebe agora dadauk nakfilak an sai estadu emerzensia, pontu balun hetan antusiasmu husi populasaun parte balun iha mos lamentasaun tanba violensia ne'ebe elementus forsa PNTL no F-FDTL sira halo ba populasaun. Marcio Gonsalves hanesan vitima ida ne'ebe hetan hahalok violensia husi membru operasaun konjunta.

Asaun brutal ne'ebe sai hanesan modelu operasaun hanesan ona kostume ne'ebe militar sira uza lori atua situasaun, kostume tanba lia fuan diskulpa ne'ebe hato’o husi komandante operasaun konjunta liu husi Televizaun no jornal la afeita ba membru sira iha terenu, tamba ohin husu diskulpa aban sira repete nafatin asaun violensia iha terenu.

Marcio Gonsalves, populasuan suku Bemori ne'ebe hetan violensia husi membrus operasaun iha loron 11/3 tuku 9 kalan, ba kla'ak nia isplika katak akontesimentu nebe akontese ba nia hanesan hahalok la manusiawi no halakon nia direitu nudar sidadaun, no Marcio rasik la kontenti.

Nia esplika kronolojia akontesementu ne'e ba jornalista kla'ak, hanesan situasaun ne'ebe nia hasoru, "wainhira ami hamrik hela iha ami nia odamatan oin, hau ho kolega nain tolu, ami koalia halimar derepente patrulha mai no sira hakilar, imi hatene estadu de sitiu ka lae? No ami hatan dehan ami hatene, entaun nusa imi latama? ami hatan ba sira katak ami atu tama agora ona no ami husu tan deskulpa ba sira (membrus operasaun konjunta).

Hotu tiha, ami lao tama ba uma laran. Sira tun mai hateten, imi tuir lolos tenke hatudu exemplo diak. Ami tama agora. Dala ida tan ami husu deskulpa. Depois wainhira ami tama tiha ba uma laran, kareta, komu iha liur entaun sira bolu fali, kareta ne'e se nian? Ami hatan, ami nian. Sira dehan entaun mai foti tiha, hau foin atu sae kareta ne'e maka nia tuku hau nia ulun dala ida depois sama hau nia ain hau mos la halo buat ida hau tama deit ba kareta.

Hau lahatene derepenti sira mosu deit mai nomos ami sei esplika ba sira dehan oras seidauk to'o tamba ne'e ami hamrik iha ami nia uma oin. Hau lahatene ho rajaun saida, sira mai tebe deit hau. Komu hau mos la halo buat ida entaun sira ba deit ona".

Tuir Marcio nia esplikasaun ba kla’ak, kareta tolu no ema barak mak iha laran, polisia task forse ida mak te'ebe Marcio. Sira baku ho liman no Marcio rasik la konsege lori ba kurtivu. Polisia sira ne'e la esplika ba nia konaba razaun saida mak baku, se tempu estadu de sitio sedauk to'o.

Ba assuntu ne'e, Marcio aprezenta ona keixa ba Primeiro Ministro Xanana Gusmao, no hanesan sidadaun nia sente triste. "Estadu de sitiu ida ne'e mos limita tiha ona ita nia direitu balun, polisia sira mos agresivu liutan no la uja poder ne'e ho didiak, maibe sira uja poder ne'e atu hakarak baku ema arbiru deit maske oras seidauk to'o ba oras estadu de sitiu ninian. No hahalok ne'ebe sira halo, ida ne'e liu tiha ona regulamentu nebe iha".

Marcio, joven ida nebe mos sai sobrevivente husi massacre 12 Novembru 1991, husu ba instituisaun PNTL no F-FDTL atu sira bele hanoin no tau iha pratika katak, sira ne'e laos forsa ida ne'ebe ke hanesan uluk nian. Sira tenke aprende husi hahalok forsa indonesia nian ne'ebe uluk sira hatudu ba ema, no husu atu foti lisaun ida husi exemplu ba hahalok aat ne'ebe forsa Indonesia halo hasoru povu Timor, tuir nia atetude baku ema tun sae, viola ema nia direitu.

Marcio mos hatutan ho laran triste katak, labele sente povo ne'e hanesan fali inimigo boot ba sira. Marcio kondena hahalok ne'ebe polisia sira halo ba nia, tamba la tuir lei no kontra lei ne'ebe iha.

Ba jornalista kla'ak katak ho estadu de sitiu nebe iha ba loron tolu nolu (30) nee hanesan hamenus ema nia liberdade tamba sira nia atuasaun ba estadu de sitiu la equilibriu tamba halai liu ba povo sivil nebe lahatene problema. Tuir lolos, sira tenke buka ema nebe halo dunik problema, ema ne'ebe submente krime, sira serve para kaer ema sira ne'e. Agora sira nia hahalok hirak ne'e hanesan membabibuta tiha ona, arbiru deit. Dalaruma ema fila husi servisu ou ema iha ema nia uma oin mos sira ataka arbiru deit. Sira hanesan fali ema polisia ou forsa ne'ebe la profesional, sira hanoin katak ema hotu-hotu ne'e Alfredo nia ema karik?

Timotio de Deus, Direitor JSMP: "Estado de Sitio la Defini Klaru iha Konstituisaun"

Diretor Judisial System Monitoring Programme (JSMP), Timotio de Deus (28), preukupa ho implementasaun estado de sitio no estado de emerjensia ne'ebe halo populasaun balun hetan baku no ameasas husi forsa. Tuir Timotio, atuasaun hanesan ne'e halo povu barak lakon sira nia direitu ba liberdade. Timotio ne'ebe hasai ninia fakuldade iha area sistema judisiariu iha Universidade Widya Mataram, Yogyakarta tinan 2005 ne'e koalia barak konaba implementasaun estado de sitio. Atu hatene diak liu, sani nain sira bele lee direitamente dada lia ne'ebe almerio ALVAREZ husi kla'ak halao ho Direitor JSMP ne'e iha eskritoriu JSMP, Kolmera 24/03 foin lalais ne'e.

Daudaun ne'e iha diskusaun barak husi sosiedade konaba implementasaun estado de sitio. Oinsa observasaun JSMP nian konaba implementasaun estado de sitio depois atentadu 11/2 ba Xefi Estado, Prezidente Jose Manuel Ramos Horta?
Implementasaun estado de sitio depois atentadu 11/2 ne'e kuandu kompara ho krizi ne'ebe mosu iha 2006, tuir lolos iha 2006, implementa mos estado de sitio. Maibe ita hotu hatene katak iha 2008 ne'e mak governu implementa estado de sitio.

Tuir lolos, definisaun estado de sitio ne'e mak saida?
Definisaun estado de sitio iha Konstituisaun RDTL nian tuir hau nia hatene katak estado Timor-Leste bele implementa estado de sitio, wainhira hetan atakes no perigu ruma husi nasaun seluk mai Timor-Leste ne'ebe ho intensaun hakarak okupa nasaun Timor-Leste. Atakes mai husi rai liur ne'e, Prezidente da Republika halo konsultasaun ho orgaun sira ne'ebe kompetente hanesan Konsellu Seguransa atu bele aplika estado de sitio iha Timor-Leste. To'o ikus, bele impede ameasas ne'ebe mai husi rai liur no normaliza fali situasaun atu nune'e orgaun publiku bele halao sira nia aktividade hanesan baibain.

Atentado hasoru Prezidente da Republika iha 11/2 ne'e kontradisaun ho definisaun estado de sitio ne'ebe mak ita boot esplika tiha ona. Tuir ita boot nia haree, ida ne'e laos kontra lei?
Hahalok ida hanesan ne'e krimi no sai ameasa boot atu nasional Timor-Leste lao ba oin. Kuandu atentado ida ne'e mak estado la atua, nasaun sira seluk bele haree katak nasaun Timor-Leste, nasaun ida ne'ebe mak falladu. Tanba ne'e mak implementasuan estado de sitio iha momentu hanesan ne'e, ami konkorda. Atu nune'e povu tomak bele halao sira nia aktivadade ho diak. Tuir lei ne'ebe mak vigora iha Timor-Leste katak maluk sira ne'ebe laos militar maibe kaer kilat, ne'e hau senti ameasa mos ba funsionamentu orgaun publiku iha nasaun Timor-Leste. Bele mos sai ameasa ba povu sira. Ho realidade ida ne'e, governu bele hato'o proposta ba Parlamentu Nasional atu bele aplika estado de sitio. Ikus liu, Prezidente RDTL deklara estado de sitio ne'e hodi implementa to'o bainhira.

Kuandu ita kompara krizi 2006 ho atentado 11/2, tuir ita nia hanoin ida ne'ebe mak grave liu no presiza duni atu implementa estado de sitio?
Intrepretasaun konaba estado de sitio ne'e oioin. Implementasaun estado de sitio iha 2008, ema hotu kestiona katak orgaun publiku lao normal hanesan baibain. Ita haree depois akontesementu atentado 11/2, aktividade publiku lao nafatin hanesan baibain. Maibe ikus mai governu hato'o proposta atu implementa estado de sitio iha fatin hotu-hotu, tanba grupu armado halai ba ai-laran. Ho razaun hirak ne'e mak estado deklara estado de sitio.

Haree ba iha orgaun publiku ne'ebe lao normal, estado de sitio ne'e sei bele prolonga tan ka lae?
Ami rona informasaun katak ita nia populasaun barak hetan ameasas no hetan baku husi ita forsas PNTL no F-FDTL. Izemplu, ami rona informasaun katak kuandu forsas operasaun konjunta ne'e husu perguntas ba ema ruma, ema ne'e tenki hatan kedas. Kuandu la hatan, entaun povu sira ne'e hetan baku husi forsa sira ne'ebe mak halo operasaun iha fatin ne'eba. Ida ne'e hatudu imajen ne'ebe ladun diak ba povu sira. Maske povu balun deklara katak sira senti kontenti ho implementasaun estado de sitio. Maibe iha lokasaun ne'ebe implementa estado de sitio, povu barak mak senti moris iha ameasas nia laran. Tanba povu sira nia direitu ba liberdade ne'e hetan violasaun husi forsas.

Tuir ita nia haree iha estado de direito, governu implementa kondisoens rua (estado de sitio no estado de emerjensia) ne'e iha baze juridiku ka lae?
Iha Konstituisaun regula jeralmente deit konaba estado de sitio no estado de emerjensia. La defini konaba alternativa kondisoens. Kuandu iha kondisaun hanesan ne'e, estado implementa estado de sitio no iha kondisoens seluk implementa estado de emerjensia ou implementa rua ne'e (estado de sitio no estado emerjensia-red) ba tempu ne'ebe hanesan. Implementasaun kondisaun rua ne'e la defini klaru iha Konstituisaun RDTL.

Entaun lei konaba implementasaun estado de sitio ne'e depende ba situasaun?
Los. Konaba durasaun implementasaun estado de sitio mos iha ne'eba regula kedas ona. Kuandu lei koalia konaba durasaun estado de sitio ne'e loron tolu nolu, estado tenki konsidera lei ne'e. Maibe kuandu governu hakarak hanaruk tan estado de sitio, governu tenki hato'o pedidus foun ba iha Parlamentu Nasional.

Tuir ita nia analiza, governu no estado iha razaun duni atu prolonga tan estado de sitio ka lae?
Buat ne'ebe mak ami kestiona nafatin mak tanba sa implementasaun estado de sitio ne'e laos ba teritoriu tomak. Ne'e tuir Konstituisaun. Perguntas seluk fali mak tanba saida mak la implementa estado de emerjensia deit. Kona-ba razaun ida ne'e, karik iha distritu balun, governu implementa estado de sitio tanba hakarak rekolla kilat sira ne'ebe mak ita nia maluk Timor-oan sira balun kaer tan deit ideias ne'ebe la hanesan ho governu. Ida ne'e mos governu iha responsabilidade moral atu bele halo atuasaun ruma hodi prevene akontesimentu hanesan 11/2. Maibe, ema ne'ebe halao operasaun konjunta iha tempu estado de sitio ne'e labele hamosu fali violasaun ka krimi foun kontra povu sira nia direitu ba liberdade no direitu ba moris. Kuandu ida ne'e akontese, sira kontra lei no ema sira ne'ebe komete krimi, labele moris bebeik ho kultura impunidade iha Timor-Leste. Ema ne'ebe komete krimi tenki hakruk ba lei no wainhira hetan ona desizaun husi tribunal atu bele ezekuta, tenki kumpri desizaun ne'e. Lei mak boot liu ema hotu-hotu. Ema hotu tenki hakruk ba lei. Atu nune'e labele akontese fali diskriminasaun entre povu iha Timor-Leste. Ema ne'ebe mak poder barak liu uza fali situasaun hanesan ne'e halo krimi ba povu nia moris.

Mário Viegas Carrascalão: "...Estado de Sitio no Estado de Emergência la Proteje Povu Nia Moris..."

Governu AMP propoin tan prolongamento periudu Estado de Sitio. Prolongamento Estado de Sitio dala ida ne'e aplika ba distrito balun de'it nebe maioria husi parte loromonu. Ba parte lorosa'e, tuir proposta governu AMP, Estado de Sitio muda ba Estado de Emergência. Durasaun prolongamento ba situasaun 2 ne'e hanesan de'it: loron 30. Proposta ne'e hetan reasaun kontra husi deputado barak iha Parlamento Nasional. Karik uluk, votus kontra husi de'it bankada opozisaun maioritária, Fretilin, dala ida ne'e, deputado husi bankada partido nebe kaer ukun mos vota kontra.

Deputado husi bankada Partido Social Democrata, PSD, Eng. Mário Viegas Carrascalão konsidera proposta governu nian ne'e nudar violasaun direitos humanos povu Timor-Leste nian.

Carrascalão lamenta tebes ba prolongamentu periodu Estado de Sitio no Estado de Emergência ne'e tan sei fo impaktu negativu ba ekonomia nasaun nian. Ho razaun ne'e, mak Carrascalão vota kontra proposta ne'e, maski proposta ne'e mai husi governu AMP nebe PSD halo parte.

Atu hatene kle'an liu kona ba razaun politika husi pozisaun ne'e, jornalista kla'ak, Zevonia Vieira dadalia ho Prezidente PSD ne'e iha Parlamento Nasional, hafoin votasaun iha plenária.

Ita vota kontra proposta governu AMP atu prolonga periudu Estado de Sitio no kriasaun Estado de Emergência. Oin sa reaksaun husi ita nia partido rasik?
Molok atu tama iha votasaun, ami halo reuniaun bankada PSD nian. Iha reuniaun ne'e, iha deputado balun konkorda no balun seidauk esklaresidu loloos. Tanba ne'e ha'u husu kedas ba sira: konkorda ka lae, ha'u nia votu ne'e votu kontra. Iha PSD, ida-idak tenke hanoin bainhira ko'alia kona ba prinsipiu partido nian. Hotu-hotu tenke tuir disiplina partidária. Maibe ko'alia kona ba proposta ne'e, la'os prinsipiu partidária nian. Tan ne'e, ida-idak bele deside tuir nia konsiensia rasik. Ita fo liberdade ba membru parlamentu hotu atu vota tuir nia konsiensia. La'os tuir ema seluk nia politika. Kestaun agora ne'e la'os prinsipiu PSD nian, maibe avaliasaun ida-idak ninian atu hare los ka lae prolongamentu Estado de Sitio no kriasaun Estado de Emergência ba loron 30 ne'e.

Tuit ita nia hanoin, diferensa Estado de Sitio ho Estado de Emergência ne'e sa ida?
Iha ita nia konstituisaun la iha duni no la fo deferensa. Maibe, hafoin tau ba lei, bele interpreta katak iha Estado de Emergência poder barak iha governu nia liman. Poder konstituisaun nebe garante direito ho liberdade sidadaun nian ne'e lakon tiha. Poder sira ne'e militar mak kaer fali. Sira kaer poder ne'e ho razaun katak hamosu Estado de Sitio, hasai direito moris povu nian atu hadi'a fali proteksaun ba povu.

Ho razaun atu fo proteksaun ba povu nia moris mak Governu propoin atu deklara Estado de Sitio durante ne'e. Ita konfirma?
Realidade hatudu katak Estado de Sitio no Estado de Emergência la proteje povu nia moris. Povu barak mak sente sira nia moris sai komplikadu liu durante periudu Estado de Sitio. Barak sente katak Estado de Sitio viola ona sira nia direitus humanus no garantia. Estado de Sitio katak poder iha militar nia liman.

Oin sa ho Estado de Emergência?
Estado de Emergência katak polisia iha ita nia rain ne'e iha governu nia okos. Ne'e duni governu lori polisia maka implementa Estado de Emergência. Bele mos utiliza militar bainhira situasaun aperta. Maibe ha'u hare pratika iha Timor la iha deferensa. Atu Estado de Sitio ka Emergência, povu lakohi hatene. Povu hatene mak, kalan nia tenke ba toba sedu. Dadersan, molok tuku 4 ka tuku 5, labele sai lai. Ida ne'e mak prejudika no fo impaktu loloos ba povu nia moris. Ita hotu hatene katak povu ki'ik sira husi Maubisse no Aileu atum ai fa'an sira nia modo iha Díli, tenke la'o kalan. Ema sira nebe buka moris iha restorante mos hetan konsekuensia husi Estado de Sitio ne'e tanba molok tuku 10 kalan, restoranta no ba sira tenke taka ona. Kredibilidade internasional iha tempu Estadu de Sitio ka Estado de Emergência hanesan de'it. Investor sira tenke hanoin dalarua molok atum ai investe iha ne'e. Atu importa sasan mos, prioridade ba sasan nebe nudar nesesdade primaria de'it. Ema ta'uk atum ai iha ne'e tan sira fiar katak, bainhira iha Estado de Sitio ka Emergência, ne'e katak iha buat ruma la'o la di'ak iha Timor-Leste.

Tuir ita, Estado de Sitio ho Estado de Emergência ne'e fo impaktu negativu ba povu nia moris?
Ba ha'u, situasaun politika rua ne'e negativu. Estado de Sitio ka Emergência bele iha bainhira iha Dili ne'e ema rame-rame tuda malu, oho malu, tuda kareta, lori rama ambon. Situasaun iha tinan 2006 ne'e maka lolos ne'e hamosu Estado de Sitio ka Estado de Emergência. Se maka dehan Estado de Sitio ka Emergência ne'e mak lori hakmatek iha Dili, ne'e la los. Tanba loloos ne'e hakmatek iha Dili ne'e hahu mosu ona iha Natal, bain-hira unidade PNTL, taks force ho UIR sira hahu halo seguransa iha bairro-bairro iha Díli laran.

Estado de Emergência mos sei limita ema nia direito atu halo reuniaun ka demonstrasaun hasoru governu?
Hanesan de'it ho Estado de Sitio. Ita presiza komprende didi'ak bain-hira hateten labele halo reuniaun. Labele halo reuniaun ne'e ba grupu nebe la iha estatutu. Grupo sira nebe iha estatutu bele halo reuniaun nafatin, maski labele halo manifestasaun. Ida ne'e mos, tuir ha'u nia hare, hanesan limitasaun ida ba povu atu ekpresa nia direitu hodi halo sa ida de'it maka povu hakarak. Dala ruma, ita interpreta sala. Ema tur iha nia varanda mos forsa sira bandu hotu, tan konsidera hanesan reuniaun. Kona ba ida ne'e, akontesimentu barak mak mosu ona, no ema hotu hatene.

Tuir ita nia hare, prolongamentu periodu Estado de Sitio ba distrito sira iha loromonu no kriasaun Estado de Emergência iha lorosa'e ne'e nudar nesesidade politika ida ka ne'e politika governu nian atu bandu ema halo demonstrasaun?
Ha'u hanoin governu nia objetivu ikus mak atu trava manifestasaun husi ema sira nebe la kontente ho akontesimentu 11/2. Ema balun iha razaun atu halo manifestasaun tanba akontesimentu halo ema mate no seguransa ba ita nia Prezidente mos la di'ak. Ita hotu hatene katak, bainhira ema konsegue tiru kanek prezidente, ne'e hatudu katak, seguransa la di'ak. Ida ne'e, fo razaun ba ema balun atu sente la kontente ho situasaun ne'e.

Ema barak seidauk hatene los sa ida mak akontese iha 11/2 ne'e. Rona katak halo ona investigasaun, maibe to'o agora seidauk fo sai ba povu. Alfredo ba iha ne'eba, seguransa mak tiru ka ema balun mak hein Alfredo iha ne'eba? Ita hatene katak, Alfredo ne'e hetan tiru no mate ona liu minutu 30 mak Prezidente Ramos Horta foin hetan tiru. Tansa maka seguransa sira iha Ramos Horta nia uma ne'e, la fo protesaun ba Ramos Horta bainhira nia ba tasi ibun ne'e. Ha'u hanoin, buat barak kona ba insidente 11/2 ne'e seidauk los. Tan ne'e, ita hakarak prosesu investigasaun ne'e tenke la'o ba oin. Maibe, ita mos hahu kestiona kona ba Komisaun Inkeritu Internasional nebe Parlamentu aprova ona, maibe to'o ohin loron seidauk forma. Kona ba ida ne'e, ami sei ejiji bebeik. Tanba ami hakarak trajedia 11/2 sai loloos kona ba se se mak involve no se se mak iha kotuk hodi estraga nasaun ne'e.

Che Guevara: "Hasta La Vitoria Siempre"

nuno rodriguez TCHAILORO
Che Guevara nudar eroi ne'ebé koñesidu laos deit iha mundu maibe mos iha Timor-Leste; laiha eroi internasional ne'ebé naran boot liu Che Guevara. Nia imajen no nia naran bele haree iha hosi aldeia too sidade. Ema kiik, ema boot, feto ka mane, iha relijiaun ka laiha gosta hatais imajen Che Guevara; barak mos hakas an atu banati tuir dalan revolusionariu Che Guevara.

Ema barak mos gosta hatais no hatudu imajen Che iha faru, xapeu, pasta, parede, kareta no fatin ne'ebé atu hatudu ba publiku katak sira mos tuir trend ka bele dehan gaul, maibe, barak hosi ema hirak ne'e la hatene se los mak Che Guevara. Iha nasaun barak liu-liu iha Estadus Unidus koko atu instrumentaliza imajen Che Guevara ba orientasaun lukru deit. Tamba ne'e ohin loron ema barak hatene imajen Che Guevara nudar eroi bonitu no uniku maibe la hatene luta lolos Che Guevara ninian.

Che Guevara moris iha Argentina iha 14 de Juñu 1948, nia nurak liu fulan sanulu hosi Fidel Castro. Che estuda medisina iha iha Universidade Buenos Aires. Nudar estudante nia ativa movimentu opozisaun hasoru lider Argentina Juan Peron. Estudante ne'ebe ho kreatividade oin-oin, nia komesa halao viazen haleu Amerika Latina hodi hatene liu tan realidade povu nia moris. Nia lalaok haleu Amerika Latina ohin loron hasai tiha ona ba filme ho titlu Motorcyle Diaries. Viazen ne'e mak hametin liu nia konsiensia politika atu luta hasoru imperialista. Che Guevara iha tinan 1953 hamutuk ho Jacobo Arbenz Guzman ne'ebé CIA hatun liu hosi golpe estadu.

Che Guevara nia naran komesa mosu iha Amerika Latina nudar joven revolusionariu ida ho kapasidade intelektual ne'ebé as. Fidel Castro hasoru Che Guevara iha Mexico iha tinan 1954 hodi hahu halo planu atu halo revolusaun. Konsiensia politika ne'ebé Che hetan bain-hira haleu Amerika Latina halo nia sai forte liu hodi luta hasoru Yankee sira no liberta povu oprimidu hosi imperialismu.

Hosi Mexico Che Guevara ho Fidel Castro forma grupu armadu hamutuk ema nain 81 ne'ebe roh "Granma" lubun oan ne'e ba Kuba ho objetivu halo revolusaun hatun Governu Ditadura Fulgencio Batista. Barak hosi sira mak ema kaer no mate, iha deit 16 mak konsege halai ba fohon Sirea Maestra, hosi ne'e sira hetan tulun hosi toos nain sira no grupu ne'e moris sae forsa revolusionariu atu harii estadu sosialista no iha tinan 1959 Che Guevara hamutuk Fidel Castro no Camilo Cienfuegos nudar lider prinsipal iha tempu ne'ebe halo marsha no hatuun Ditadura Batista iha tinan 1959.

Triumfu revolusaun iha 1959, Che Guevara kontinua halo nia knaar nudar revolusionariu ida hanesan minustru iha area oin-oin hanesan ministru ekonomia no planu dezenvolvimentu, ministru industria too tinan 1965. Nasaun sosialista Kuba ne'ebe liberta an no halao programa sosialista ne'ebe povu mayoria mak kontrola estadu nia moris. Che Guevara hanoin solidariedade internasional nudar fator determinante ida atu liberta povu oprimidu sira hosi kolonialismu.

Tamba ne'e, Che Guevara mos lidera forsa hamutuk 120 hosi Kuba ba Kongo (Afrika). Maibe misaun ne'e la susesu tamba estrutura resistensia iha Kongo seidauk iha. Che mos mai vizita Indonesia hodi hasoru malu Soekarno atu hametin gerakan non blok hodi hasoru Imperialista.

Hosi Kongo, Che Guevara fila fali Kuba no nia kontinua hakarak liberta nasaun sira seluk hosi kapitalista nia ukun no nia husu despedida ba Fidel Castro no povu Kubanu no nia ba Bolivia. Iha karta despedida nia rohan Che hateten: "Hasta La Vitoria Siempre" ne'ebe ohin konhesidu iha mundu tomak. Che Guevara mate iha Bolivia tamba CIA nia koloborasaun ho forsa Bolivia nian.

Loron 8 Outobru nudar loron Che Guevara nia maten. Imperialista sira fiar katak Che Guevara nia maten sai hanesan vitoria ba sira. Hanoin salan ne'e hateten katak Che nia maten nudar rohan ba nia hanoin, rohan ba nia tatika, rohan ba nia konseitu guerilla, rohan ba nia teze.

Maibe realidade hatudu fali oin seluk, Nia hanoin no pratika la mohu maibe sai buras tan iha mundu neoliberalizadu. Che Guevara ohin loron sai simbolu lutador ba sosializmu no sai ezemplu puru ida ba internasionalizmu. Nia hetan inspirasaun hosi lider revolusionariu sira seluk hanesan Simon Bolivar, Jose Marti, Antonio Maceo, Emilio Zapata no sst. Che Guevara nudar roman ne'ebe leno dalan povu oprimidu sira sai husi nakukun laran.

Fidel Castro hateten: "Che Guevara nia hanoin, nia tatika, nia konseitu guerila, nia teze sai rohan laek."

Bainhira ami vizita Kuba iha Outobru 2003 ami haree katak loron-loron estudante eskola primaria primaria hakilar "Seremos Como Elle" katak Ami Hakarak Hanesan Nia. Ohin loron laos deit iha Kuba maibe iha nasaun hotu-hotu kontinua nafatin estuda no banati tuir Che Guevara. Che Guevara ohin loron nudar mata dalan ba jovem barak iha mundu atu luta hodi harii dezenvolvimentu ne'ebé la bazeia ba lukru maibe bazeia ba nesesidade umanu.

Che Guevara iha enkontru konferensia solidariedade Amerika Latina hateten katak: "Karik nia mate iha fatin ruma, nia sei fo benvindu ba nia mate bainhira ema tilun simu tiha ona nia hakilar ba luta no ema seluk hatutan hodi hamrik foti nia kilat".

Che Guevara nudar ema maten tiha ona, maibe nia hanoin no espiritu hamutuk ho ita. Che Guevara moris iha Timor Leste. Hasta La Vitoria Siempre/Too Manan Rohan Laek.

Sistema Asuransi Saúde Estadus Unidus Hamate Kliente

nuno rodriguez TCHAILORO
Michael Moore, film maker koñesidu hosi Estadus Unidus produz filme dokumenter ne'ebé investiga sistema tratamentu saúde Estadus Unidus. Filme ho titulu Sicko foka ba sistema seguru (asuransi) lukru no industria farmasia. Michael Moore halo komparasaun entre sistema saúde hodi hetan lukru no Estadus Unidus ho sistema universal laho lukru hosi Kanada, Grande Britanika, Fransa no Kuba.

Iha Estadus Unidus ema hamutuk miliaun 50 laiha seguru, maibe, Moore iha Sicko la haree konaba sira ne'ebé laiha seguru, filme sicko foka ba ema hirak ne'ebé iha seguru maibe sai vitima hosi kompania seguru tamba lohi no red tape ne'ebé too ikus mate fali. Moore halo intervista ho ema hirak ne'ebé iha seguru maibe la hetan tratamentu saúde maski selu barak no mos eis funsionariu kompania ne'ebé koalia konaba inisiativa kua kustu/cost-cutting inisiative atu bele hetan lukru barak liu hodi nega direitu ema hirak ne'ebé iha seguru.

Iha filme ne'e rasik koalia konaba sistema saúde Estadus Unidus ne'ebé uluk sistema tratamentu saúde universal monu iha tinan 1950 tamba kampaña anti komunista. Kampaña ne'ebé haforte iha tempu Ronald Reagan ho tauk komunista nian, maibe mantein sistema edukasaun, koreiu, polisia nudar parte hosi servisu publiku nian.

Evidensia seluk ne'bé Moore fo sai mos konaba Kampaña ne'e rasik iha tamba ho hanoin katak buat hotu ne'ebé universal ne'e komunista sira nia hanoin. Evidensia forte seluk mak oinsa Health Maintenance Organization Act 1973 mosu, Moore konsege hetan gravasaun diskusaun entre Presidenti Richard Nixon ho John Ehrlichman iha Fevereiru 17, 1971; Ehrlichman hateten ba Nixon katak"...uituan liu mak sira fo, sei iha barak liu mak sira hetan," planu ne'ebé Nixon rasik apoiu tebtebes. Planu ne'e rasik mak sai nudar baze ba HMO modernu ba sistemta tratamentu saúde. Iha konekasaun makas entre Pharmaceutical Research no Manufacturers of América (PhRMA), parte loby hosi kompania aimoruk boot iha Estadus Unidus

Moore rasik ba Grande Britanika atu haree sistema saúde iha ne'eba. Grande Britanika mos iha sistema saúde ne'ebé gratuitu. Iha ne'ebé Moore fo sai katak laiha hasai osan hosi bolsu iha ne'eba. Moore vizita mos farmasia Grande Britanika , ema hirak ho tinan 16 ka liu tinan 60 la selu, hetan subsidiu makas, selu deit 6,65 Poundsterling. Hospital Servisu Saúde Nasional selu kasir ne'ebé nia servisu mak selu fila fali pasiente nia kustu transporte.

Iha Fransa, Michael Moore konsentra liu ba obstetrics no gynaecology iha hospital Fransa. Nia mos intervista "SOS Medicins" servisu saúde durante oras 24. Tuir Moore katak Governu Fransa fo servisu sosial seluk tan, hanesan tratamentu ba loron dólar 1 oras ida, suporta ba labarik foin moris, inklui tein, hamos, fase ba inan foun sira.

Fila mai Estadus Unidus, Moore intervista traballadores voluntariu ne'ebé salva ema nia moris liu tiha ataka 9/11; governu la rekoñese sira no la fo osan sira nia moris fiziku no psikolojiku ne'ebé sira hetan hanesan moras respitoria no PTSD. Moore mos hakur tasi hosi Miami ba Guantanamo no haree katak inimigu sira ne'ebé Estadus Unidus kastigu iha Guantanamo hetan tratamentu saúde livre.

Filme ne'e rasik lansa tiha ona iha Juñu 2007. Iha lansamentu ne'ebé halao iha teater AMC Lincoln Square hetan osan $68,969 kada screen no hahu lansa nasional hosi 29 Juñu-1 Jullu 2007 no hetan osan hamutuk $ 4,501,712 hosi teter 441.

Filme ne'e rasik bele hetan iha nasaun barak ona, inklui Timor-Leste. Filme dokumentariu seluk hosi Michael Moore hanesan Fahrenheit 9/11 no sira seluk bele hetan iha loza DVD iha Dili.

Haburas Foundation Harii Sentru Treinamentu Ambiental Iha Hera


Demetrio Amaral, Diretor Haburas
Foundation hatoo hela diskursu
no iha sorin, Emb. Finlandia,
Anti Koistinen.

efrem dos ANJOS
Anti Koistinen, Embaxador Finlandia tau fatuk ba dala uluk hodi harii sentru treinamentu Haburas Foundation liu tiha tinan barak ona halo sira nia atividade hodi proteze meu ambiente. Iha loron 25 Marsu foin dadaun ne’e, ONG ne’e realiza sira nia mehi boot ida liu husi tau fatuk ba dala uluk atu hari sentru treinamentu no rekursus ambiental iha suku Hera, aldeia Aitarak Laran.

Prosesu rekostrusaun tuir posibilidade ne'ebe ONG ne'e iha, hein katak sentru ne'e sei bele funsiona ou remata fulan 6 ka 7 tan, buat sira ne'e hotu depende ba mobilizasaun finansamentu husi Haburas Foundation rasik, katak Demetrio do Amaral de Carvalho.

Akar knotak primeiru ne'ebe monu hanesan sinal konstrusaun sentru treinamentu ambiental ne'e hahu lao ona. Kontribusaun ba nasaun liu husi inisiativa ne'e hetan sasin husi embaixadór Finlandia Anti Koistinen, xefe suku Hera, membrus Haburas Foundation no populasaun ne'ebe hela besik fatin ne'e.

Embaixadór Finlandia, Anti Koistinen, hatudu nia solidaridade liu husi prezensa iha seremonia simples ne'e, hato'o nia votus de apoiu liu husi tau fatuk ba dala uluk hanesan simbolu katak projetu rekonstrusaun ne'e hahu loke.

“Hili fatin diak”, lia fuan espontania ne'ebe Embaixadór ne'e hato'o, wainhira halo inspeksaun hamutuk ho diretor Haburas Foundation, ba rai ne'ebe atu hari uma sentru treinamentu hodi hafutar hanoin kmanek atu proteze Meu ambiente Timor-Leste.

Liu tiha inspesaun ba fatin ne'ebe refere, embaixadór ne'ebe hakman an husi Jakarta to'o iha Timor-Leste haklaken nia votus de apoiu planu hari sentru treinamentu ne'e. “Hau kontente mai iha fatin oan ida ne'e ohin, hodi observa tau fatuk primeiru hodi hari sentru treinamentu ne'e. Hau kontente hodi fo fundus tuir posibilidade servisu nian, hein katak sentru ida ne'e bele sai fatin ezemplu ida ba eco friendly (ramah lingkungan, red), esperansa katak imi nia sentru treinamentu bele hetan susesu boot ba futuru. Hau buka atu servisu diak ho imi nafatin”, hateten Koistinen.

Relasiona ho aktividade kultural ne'e, Koistinen apresia ba meius kultura ne'ebe halo tiha ona tanba ne'e demonstra respeitu ba ema Timor nia rai.

Ho apoiu no haree ba gastu ne'ebe boot hodi hari sentru ne'e diretor Haburas Foundation, Demetrio Amaral, reafirma katak, ba oin sentru ne'e sei benefisia povu Timor husi kapasitasaun. Ba primeiru etapa sei fo treinamentu ba membrus Konsellu de Suku, ba feto, juventude no estudante, tanba sira mak sai hanesan autor prinsipal ba dezenvolvimentu protesaun meu ambiente. Hein katak fatin treinamentu ne'e sei maneja diak liu tanba treinamentu.

Demetrio Amaral esplika liu tan katak, rai ne'ebe atu uza dadauk ne'e, Haburas Foundation hola ho osan ne'ebe hetan husi premio goldman ne'ebe simu iha tinan 2004, no ba konstrusaun ne'e hetan ajuda husi governu Finlandia ho osan $ 57,000 maibe husi kalkulasaun tékniku ninian, se atu finaliza sentru ne'e sei persiza tan 150,000 mill dollares, ne'e dunik ba projeitu ne'e sei gastu hamutuk 200,000 mil dollares. Osan istimativa.

Área ho nia medida 4000 metru kuadradu sei hari sentru ida ne'ebe bele akomoda ema 25 to 30 durante treinamentu halao. Iha fatin ne'e iha mos sentru piskiza lori produz informasaun ba meu ambiente, iha mos fatin demostrasaun modelu dezenvolvimentu.

Parte seluk xefi suku Hera Simão Pedro Ribeiro, hato'o nia apoiu maka’as ba planu ida ne'e. Simão rasik hanesan xefe suku fo kontribusan 100 porsentu ba projecto rekonstrusaun sentru treinamentu ne'e. Hein katak sentru treinamentu ne'e bele fo treinamentu ba ita nia komunidade tomak espesial ba suku Hera, no apoiu ba Haburas Foundation bele remata nia fatin ida ne'e ho susesu, katak Simao.

Iha tempu hanesan, señora Ana Maria populasaun Aldeia Aitarak Laran hato'o ba jornalista kla'ak katak, nia parte kontente ho projetu konstrusaun sentru treinamentu ne'e tuir nia fatin treinamentu ne'e halo movimentu ba sira nia rai Hera, no sira sei fo apoiu atu hamutuk lori Haburas liutan rai Timor.

Demetrio hatutan katak, sira deside Hera hanesan fatin treinamentu tanba hanesan Haburas nia hanoin atu labele halo konsentrasaun iha Dili, no ho konstrusaun ne'e fo spirito ba autór dezenvolvimentu seluk atu despersa dezenvolvimentu besik liutan ba komunidade sira.

Seremonia ne'ebe taka ho han hamutuk na'an lulik ne'e, la hetan prezensa husi membru governu no autoridade sira ne'ebe iha relasaun ho meu ambiente nian, maske nune'e plano ne'e hetan apoiu makas husi rai lulik ne'ebe tuir fiar no kultura Timor nian, katak ema ne'ebe hamahan an iha fatin ne'e. Matan dook ne'ebe hahu seremonia abertura ho dadolin lulik atu husu autorizasaun ba rai lulik sira. Hateten katak tuir urat ne'ebe nia hare laiha problema atu uza rai ne'e hodi hari sentru treinamentu.

Planu Estadus Unidus Hafahe Amerika Latina Frustradu

Federico Fuentes*
Lao hosi anin ne'ebé simu liutiha invazasun Kolombia iha loron 1 fulan Marsu ba Ekuador-rezultadu masakre brutal ba sivil no membru Forsa Armada Revolusionariu Kolombia (FARC), inklui xefi negosiador Raul Reyes-imperialismu Estadus Unidus dala ida tan hatun luta ne'ebé buras atu integra Amerika Latina.

Revolusaun Bolivariana Venezuela lidera hosi Presidenti Hugo Chavez ne'ebé nia governu haluan presaun atu halo nasaun Amerika Latina sai ida hodi kontra dominasaun Estadus Unidus, espesialmente sai nudar alvu.

"Rejiaun hasoru hela opsaun…..: hodi simu nonok vizaun terorista no demagojia, ka suporta ativamente lider demokratiku", Presidenti Estadus Unidus hateten iha Marsu 12. Bush hateten nia governu estuda hela se Venezuela sei tau iha lista nasaun ne'ebé "suporta terorismu".

Tuir hanoin Orwellian hosi Washington-iha ne'ebé funu mak paz no lideres eleitu mak ditadura-nia komentariu koalia konaba governu Venezuela ne'ebé eleitu demokratikamente ne'ebé oferese nia servisu atu asiste negosiasaun ba solusaun paz ba Kolombia liu dekade haaa funu sivil iha Kolombia.

Reprezentante Venezuela hosi Organization of American States (OAS), Jorge Valero, ataka iha loron hanesan, bolu governu Estadus Unidus "governu terorista par excellence".

Valero argumenta "ne'e absolutamente estupidu atu hateten hosi Governu Mr Bush…ne'ebé pratika terorismu estadu, ne'ebé invade Irak no Afghanistan laho respeitu ba lei internasional ne'ebé komete pratika jenosidiu iha nasaun barak iha mundu, mak invade nasaun Amerika Latina no Karibia…"

Haree fila fali Amerika Latina no nia istoria dekade ba kotuk, Washington sai ema ne'ebé preokupadu ho dezenvolvimentu sul hosi fronteira. Ulun fatuk moras boot liu mak Venezuela, ne'ebé nia governu halo tiha ona dalan importante atu hodi governu Amerika Latina hamutuk, hodi hatun kapitalismu iha Venezuela nia laran.

Washington halao kampaña publika konstante (hanesan ho kampaña hasoru Irak molok invazaun) tenta atu halo relasaun ho Venezuela ho trafiku drogas no ameasa ba seguransa rejional.

Advogadu Estadus Unidus - Venezuela Eva Golinger argumenta iha TV Venezuela La Hojila katak kampaña ne'e atu hametin influensa Chavez no hatun integrasaun Amerika Latina-prosesu ne'ebé suporta hosi eleisaun hosi numeru governu, iha nivel balun, hatudu tiha ona katak bele ezerse independensia hosi Washington no hakbseik kolaborasaun rejional.

Ba Dario Azzelini, autor hosi livru balun konaba intervensaun Estadus Unidus iha rejiaun, atake illegal hosi Kolombia ba fronteira (publikamente suporta hosi governu Estadus Unidus, fo osan no kilat militar Kolombia) nudar pasu uluk atu kria infrasaun militar iha fronteira atu provoka resposta hosi Venezuela no fo ahi ba konflitu ne'ebé iha.

"Sira nia objetivu atu kria destabilizasaun masivu iha rejiaun iha ne'ebé Kolombia sei halo nia papel hanesan Israel iha Arabi," Azzellini hateten ba Green Left Weekly.

"Governu Kolombia hateten katak sira hateten Reyes iha ne'ebé iha fulan nia laran, durante ami bele hatene nia muda hosi teritoriu Kolombia, Venezuela no Ekuador nudar parte hosi negosiasaun korente hosi FARC atu husik prizioneiru sira. Kestaun mak tamba sa sira hili fatin iha Ekuador?

"Ne'e nudar teste ida, sira hakarak halo iha teritoria Ekuador no laos iha Venezuela atu haree reasaun internasional oinsa."

Luis Bilbao, diretor ba revista Amerika Latina America XXI hateten ba Green Left Weekly imperialismu Estadus Unidus iha objetivu rua iha sira nia hanoin ho atake Kolombia (ne'ebé klaramente kordena ho Estadus Unidus)-atu tahan esperansa akordu ba umanitaria ho FARC, ne'ebé loron molok husik prizioneiru hat unilateralmente no sabotajen konverjensia Amerika Sul ne'ebé mosu dadaun ona.

Atu hetan solusaun politika ba konflitu korente Kolombia sai nudar perigu ba Washington, ne'ebé uza atu justifika hodi harii prezensa militar iha Kolombia. Ida ne'e kestaun paz iha Kolombia iha relasaun makas ho prosesu integrasaun Amerika Latina.

Atake Kolombia akontese loron balun molok protestu global ne'ebé fo valor ba solusaun paz ba funu sivil Kolombia no kontra estadu no violensia paramilitar, ho alvu ativista politiku, ho merkadoria unionista oho iha Kolombia mate tinan-tinan kompara ho nasaun sira seluk. Iha loron 6 fulan Marsu rihun ba rihun ema marsa iha Kolombia atu kontra represaun hosi paramilitar sira.

Associated Press fo sai iha Marsu 14 katak organizador 6 hosi marsa ne'e ema oho, no liu ema rua nulu hetan ameasa atu oho hosi the Black Eagles death squad.

No mos, Bilbao fo sai katak liutiha eventu ne'e, ema sei la imazina katak enkontru hosi South American Community of Nations (Unasur, harii iha Abril 2002 ho objetivu atu kria modelu Uniaun Europeia iha Amerika Sul) ne'ebé sei halao iha Kolombia iha fulan ne'e nia rohan sei la akontese tan.

Ne'e oportunidade sei lao tuir Washington, nudar dezenvolvimentu Unasur ameasa abilidade Estadus Unidus atu kontrola rejiaun bazeia ba interese kompania Estadus Unidus.

Bilbao argumenta katak asaun laos salan boot hosi parte Kolombia nian. Bilbao argumenta katak "sira la ataka Venezuela", hanesan ministru negosiu estranjeiru Venezuela Nicolas Maduro hateten katak Venezuela espeta,"tamba sei hamrik metin katak Venezuela foti tiha ona no la ataka Ekuador tamba hein resposta…fo presedente atu repete fali asaun no haluan ne'e ba Venezuela".

Maski nun'e pozisaun firme hosi Ekuador no Venezuela hosi governu rua hakotu relasaun diplomatiku no muda tropaz ba fronteira Kolombia-tau Kolombia iha ain kotuk.

Realidade, duke kontra trend ba integrasaun, resposta hosi atake Kolombia bele marka realianamentu rejional-asiste prosesu ba integrasaun rejional.

Eventu signifikante mak enkontru hosi Grupu Rio ne'ebé halao iha loron Marsu 6 no 7. Reportazen vivu iha Televizaun ba kontinente tomak, reprezentante hosi governu Amerika Latina debate topiku laho prezensa governu Estadus Unidus.

Liu hosi debate ida ne'ebé todan, enkontru mai ho desizaun unanimente atu rejeita asaun governu Kolombia no violasaun ba soberania nasaun seluk nian. Krusialmente, votu atu rejeita doutrina "funu preventivu" ne'ebé Estadus Unidus tau iha pratika liutiha ataka terorista iha 11 Setembru 2001.

Ekuador no Venezuela hakas an atu iha enkontru iha loron 17 Marsu ba OAS (iha ne'ebé Estadus Unidus nudar membru) atu ratifika mosaun Grupu Rio. Presidenti Ekuador Rafael Correa hateten tiha ona katak enkontru OAS la kondena agresaun, katak tenki soe ba lixu istoria nian"
Argumenta katak "difisil atu governu Estadus Unidus kontra rezolusaun ne'e," Valero hateten katak "Hau la fiar Estadus Unidus iha forsa naton atu hapara vontade nasaun hosi Grupu Rio nian."
*) Traduz hosi Green Left Weekly, numeru 744, 19 Marsu 2008.

Opiniaun: Globalizasaun sai Ameasa ba Estadu Nasional

Antero Benedito da Silva*
Tinan hirak liu ba Dr. Geogre Aditjondro halo visita mai Timor-Leste, no hakerek artigu ida ho titulu "Timor-Leste sai husi okupasaun Indonesia, tama fali ba Kapitalismu Global." Interpretasaun nee los duni, tanba Timor-Leste ukun-an iha kedan periudu neebe globalizasaun domina debate publiku. ONU nia prezensa iha Timor husi tinan 1999 mai hamutuk kedan ho makinas kapitalismu nian. Esbosu Lei Tributaria modelu neo-liberal neebe debate dadaun iha parlamentu kria husi rekomendasaun Banku Mundial no IMF nian. Ita bele fiar katak membru parlamentu sira sei la forma iha linea hodi hateten "yes sir" ba buat hothotu iha lei nee tanba sira nia persistensia ba luta libertasaun nian.

Globalizasaun
Matenek nain sira hatoo interpretasaun oioin kona saida mak globalizasaun. William Robinson hateten katak globalizasaun konstitui buat tolu. Primeiru, kapital transnasional espesifikamente sa'e makaas iha nasaun balun no mobilizasaun kapital global aumenta no sirkula livre husi kontrola nasaun sira. Katak povu no lideres nasional sira laiha kbiit atu proteze sira nia nasaun husi invazaun kapital liur nian. Mundansa teknolojia, liu-liu revolusaun komunikasaun no informasaun, transportasaun, automatizasaun jestaun, fo posibilidade ba kapital atu too ba mobilizasaun global no hamosu dadaun espasu ekonomia global foun ida. Segundu, kapitalismu transnasional foun nee troka ona faze kapitalismu nasional hanesan sistema sosial ida. Aspeitu sabe ka importante iha nee mak globalizasaun paraleliza tiha estadu-nasaun hanesan forma primaria husi organizasaun sosial. Globalizasaun dudu ses ona estadu-nasaun hanesan dalan atu organiza kapitalismu global no formasaun klase. Estadu-Nasaun laos ona framework institusional ida iha prosesu nee atu akumula-halibur kapital, no halao dezenvolvimentu. Merkadu mak kontrola no halao dezenvolvimentu tuir lojika neo-liberal nian katak, privatizasaun no prinsipiu kompetisaun merkadu nian. Terseiru, bainhira relasaun organika no internal entre povu sira sai global duni ona, formas instituisaun estadu-nasaun oioin sei transforma no troka fali ho konfigurasaun transnasional husi vida sosial nian. Globalizasaun, iha prosesu formasaun povu nasional sira sai povu global ida 'global village.'

Matenek nain seluk, hatoo mos katak globalizasaun laos deit sobu soberania nasaun sira maibe mos elimina ekolojia mundial ne'ebé mos sai ameasa ba ezistensia humanidade. Vandana Shiva, lider movementu sosial India nian ho akademiku koñesidu ida hakerek katak globalizasaun hanesan konseitu ida " Ema tau hamutuk ho kontrola, maibe produz sistema ida neebe lakon ona kontrola,…tanba sobu estadu- nasaun sira no sobu sosiedades no prosesu ekolojika.." Globalizasaun mos sai hanesan formas foun neo-kolonialisme no imperialismu. Teoria sira nee esplora dinamika forsas ne'ebé la equilibra no hare Estadus Unidus Amerika no Europa, korporasaun internasional, industria kilat sira no media-media global mak sai forsas ne'ebé dominante no bele dita ba mundu tomak sira nia hanoin no hakarak.

Globalizasaun sobu ekonomia nasional
Globalizasaun hamosu kapital global atu hakor baliza nasaun sira ho livre sem kontrola, mobilizasaun ida nee sei dudu ses tiha ekonomia nasional. O'Brien, akademiku ida hateten, katak Rapid Finance Capital Movement, espefisikamente forti tebes, kapital finansial sira nee la kona quota permanente lokasi, neebe assosia ho kapital industria nian. Katak kapital sira nee tama ba nasaun ida sei la kona quota (Biaya) husi nasaun nee. Hetan fasilidade husi teknolojia komunikasaun foun nian, kapital finansial sei muda rapidamente ba fatin hothotu iha mundu, no sei dezafia buat barak inkluindu kapasidade estadu nasional sira atu kontrola sira nia osan (mata-Uang Nasional) rasik.

Hoogvelt hakerek katak tinan 1980s too 1990, volume transaksaun-cross border -iha forma Saham aumenta husi $120 billaun kada tinan sae-ba $1.4 trilliun kada tinan. Banku internasional sira neebe fo kreditu aumenta husi $324 billaun sae-ba $7.5 trilliun. Informasaun figurativu sira nee indika kapital finansial global ida neebe sae dramatika tebes. Bainhira transaksaun kapital finansial hakoor baliza estado nasional sira ho libre, relasaun finansial iha nasaun nee nia laran rasik aumenta no kompetisaun entre povu kiak sira ho kapitalista sira sei makaas liu tan, no obriga ema neebe kiak ona, ba nivel neebe mukit liu tan. Ekonomia nasaun sul (negara-negara selatan) sem justa inkorpora ba redi finansial internasional, bainhira movementu kapital too ona ba potensia kapital flight (osan semu husi nasaun laran ba rai seluk), osan sira nee elitos nasional nian iha nasaun sul sira. Mundu hotu sei sente impaktu Capital flight, maibe liu husi dalan ida neebe hakbit segementu sosiedade balun no tau risku ba grupu balun.

Kapitalisme global ho nia kultura konsumerisme, individualisme no kompetisaun, komesa kaptura merkadu mundial no nasaun riku sira hahu dita sira nia hakarak no hamosu rezistensia foun iha nasaun hothotu. Nasaun kapitalista sira G8 (nasaun 8) kontrola 50 pursentu votus eleisaun membru nian iha IMF no Banku Mundial no iha direitu veto iha organisasaun sira nee. Signifika sira iha meius atu aumenta tan injustisa ekonomia neebe globalizadu dadaun no instituisaun sira nee mak sai protagonistas duni. Oras nee dadaun parte husi povu mundial no 2/3 governu iha mundu nee mak hakruk ba disiplina IMF no Banku Mundial, liu husi programa formal kona estabilizasaun ekonomia ou liu husi deve osan Banku Mundial nian. Organizasaun-organizasaun transnasionais invade nasaun sul sira no hases laos deit kapital nasional maibe mos sistema governansia demokratiku nasionais sira, no buka hakiak rejime boneka forsas ditadura merkadu nian.
*) Estudante MBS iha Kooperativu no Sosial Enterprise, Universidade Kolejio Cork, Irlandia

Knar Kultura ba Nasaun Foun Timor Leste

Jose 'Josh' Trindade
Kultura, iha antropolojia katak, banate/dalan husi klalaok (tingkah laku/behaviour) no hanoin (thinking) nebe ema moris iha grupu sosial ida aprende, kria no fahe ba malu. Ho kultura ita bele haree diferensia entre grupu humanu ida ho seluk. Kultura mos haketak ita ema ho animal. Kultura ema nian ida inklui sira nia fiar, sira nia regulamentu ba hahalok, lingua, ritual, arte, teknolojia, hatais, relijiaun, no sistema ekonomia no politika.

Antropolojia nain sira baibain uza termu kultura hodi refere ba sosiadade ka grupu ida nebe barak ka ema hotu nebe moris no hanoin ho dalan nebe hanesan. Nune'e mos, grupu ema sira nebe iha kultura nebe hanesan, partikularmente, iha regulamentu kona ba moris nebe hanesan no iha organizasaun sosial basiku nebe hanesan sei forma sosiadade.

Kultura hanesan aspeitu importante ida iha istudu antropolojia. Kultura iha karakteristik nebe oin-oin, hanesan:

  1. Kultura hanesan simbol - dalan abstrak hodi refere ba buat ruma no hodi komprende ideias, objetu, sentimentu (feeling), ou hahalok. Abilidade hodi halo komunikasaun ba simbol mak lingua.
  2. Kultura hanesan buat ida ita fahe ba malu - Ema nebe moris iha sosiedade hanesan fahe hahalok no hanoin nebe hanesan kulturalmente.
  3. Kultura hanesan buat ida ita aprende - Ema ida-idak tenki aprende sira nia kultura.
  4. Kultura hanesan adaptivu - Ema uja kultura flexivelmente hodi adapta an ba mudansa natureza iha sira nia sorsorin.

Kultura Timor Nebe sei Forte to'o Agora
Tuir mai hau sei koalia kona ba kultura Timor nebe sei forte to'o agora. Primeiru hau hakarak hare kona ba ita nia UMA LULIK. Tamba sa mak Uma Lulik, tamba Tuir hau nia hare'e, uma lulik mak hanesan simbol aas liu ba Kultura Timor nian. Uma Lulik hanesan sentru kultura ba ita Timor oan.

Saida mak Uma Lulik?
Uma Lulik ka Uma Lisan, hanesan uma ida nebe konsidera sagradu ba Timor oan hotu-hotu. Uma Lulik ne'e ita hetan tutan husi visi avo sira iha tempu uluk liu ba. Uma Lulik mos hanesan fatin ida nebe ita halo ceremonia ka ritual sagradu sira iha laran. Sasan sira nebe ita konsidera lulik sei rai iha uma lulik nia laran. Nune'e Uma Lulik ida-idak iha valor nebe aas tebes ba Timor oan sira nia moris. Ho Uma Lulik, relasaun entre ema individual, familia, ka knua sira sei hametin. Iha Uma Lulik nia laran, ita sei fiar malu, respeitu malu, hanai malu no kuinhese malu diak liu tan.

Wainhira ita laiha Uma Lulik, nudar Timor oan, ita sei namlele. Ita laiha abut ida nebe metin. Ita la fiar malu no la respeitu malu. Nune'e wanhira laiha uma lulik, Timor Oan sira sei moris hanesan animal fuik ida, sei laiha respeitu malu, lafiar malu, no konflitu sei mosu bebeik, ita moris la hakmatek, hafuu malu hanesan busa ho laho.

Ho Uma Lulik, ita sei kuinhese Bandu, lei no ordem nebe ita nia visi avo sira rai hela ba ita. Sosiedade ida-idak nebe moris hamutuk iha uma lulik bo'ot ida nia okos, sei iha sira nia Bandu rasik. Ho bandu ida ne'e, sira sei respeitu malu, hanai malu, iha relasaun diak ba malu no iha unidade ba malu nebe metin.

Hodi ita nia Uma Lulik, ita hatene ita ne'e husi nebe. Ita nia visi avo sira mai husi nebe, I ita husi fatin nebe. Nune'e ita nia Uma Lulik, tradisinalmente fo identidade ida nebe klaru ba ita ida-idak nudar Timor oan. Wainhira ita nia identidade klaru ona, ita hatene ona mai husi uma lulik ida nebe, ida ne'e sei fo fiar aan makas mai ita nudar ema kriatura ida. Fiar aan ida ne'e, sei ajuda ita atu halo relasaun diak ho ema seluk, tanba ita hatene ita nia hun no abut mai husi nebe.

Uma Lulik mos determina ema ida-idak nia status iha sosiadade, nune'e ema, familia ka knua ida-idak sei hatene sira nia knar iha komunidade nia laran. Status ida ne'e baseia ba hirarkia nebe avo beiala sira determina ona iha tempu uluk.

Dala barak ita lahetene katak, Uma Lulik mos iha ninia strutura nebe kalru tebes. Sosiadade nebe moris hamutuk iha uma lulik ida sei fahe sira nia puder tuir tradisaun ida-idak ninia. Geralmente, sosiadade iha uma sei fahe sira nia poder ba oin tolu. Iha poder Politika, Poder Ritual no Poder Judisial. Poder ida-idak sei iha ninia uma lulik rasik.

Iha strutura Uma Lulik, ema kuinhese uma Lulik ki'ik no Uma Lulik Bo'ot ka Uma Lulik central. Uma Lulik ki'ik sira sei hamutuk iha uma lulik Bo'ot nia okos.

Uma Lulik Bo'ot sira ne'e sei kaer poder politika hodi ukun rai no povu, no poder ne'e Liurai sira mak kaer. Iha tempu avo beiala sira nian, liurai sira ukun rai no povu ho buat ida sira bolu naran ROTA. Rota mak simboliza leijitimidade politika nian. Hodi ROTA, povu sira sei rona no respeitu malu. Rota nudar sasan lulik importnte ida nebe rai iha Uma Lulik.

Iha tempu protuguesa nia ukun, Portuguesa sira mos kria Rota foun ida, no sira fahe Rota foun ne'e ba Uma Lulik bo'ot sira nebe namkari lemorai iha rai klaran. Objetivu Portuguesa nia hodi fahe sira nia Rota rasik no fahe ba Liurai sira, atu nune'e Liurai sira labele revolta kontra protuguesa nia ukun. Entaun Portuguesa sira iha tempu neba, rekuinese importansia kultura Timor nian, no manipula buat ida ne'e, ba sira nia interese, sira nia ukun.

Iha tempu ukun aan ne'e, komunidade Timor tomak hari'i fila fali ona sira nia uma lulik sira nebe hetan sunu no estraga iha tempu Indonesia nian no iha '99.

Ida ne'e hatudu katak, mesmu Governu, ONG, UNO no Donor sira, la rekuinese importansia Uma Lulik ba Timor oan sira, maibe Timor oan sira rasik hatene no sei halo tuir pratika hirak nebe avo beila sira rai hela ba sira.

Hakerek nain,
Analizador Kultura Timor.
Artigu ne’e sei kontinua ba edisaun tuir mai.

Istoria Colimau 2000

Ozorio Leque*
Grupo adorasaun ne'e mosu iha Same Oela Luhu Manufahi, husi mestri ida naran Martinho Vidal nebe Milisia oho iha 1999 iha Hera-Metinaro. Nia hela iha Aituri Laran Taibesi area Gruta Imaculada da Conceição de Maria, gruta nebe membru sira mak halo no Inagura husi Padre Romana Igreja Katholika nian. Mestri Martinho Vidal mak inisia hari'i gruta ne'e no sempre halibur membru sira iha fatin neba, hare tuir fatin nebe sira halibur malu ema bolu grupo Gruta Aituri Laran.

Kada ema nebe mak sai membru de adorasaun iha obrigasaun atu rai oratorio ida iha uma atu nune'e sira bele reza dader, meudia no loron kraik, orasaun nebe uza mak orasaun komun nebe igreja uza no orasaun spontan. Tamba sira rai oratorio, ema nebe la membru bolu sira grupo Oratorio.

Membru presiza aranza kruz Jesus Kristu ida no kabas oin nen atu kesi kruz ne'e hodi tara iha sira nian kakorok nudar sinal salvasaun ida ba sira. Balun nebe la iha kruz sempre lori terco. Hare ba sasan nebe sira lori ema bolu grupo Terco Cruz. Moral ba membrus sira bazea ba nai Maromak nia ukun fuan sanulu, hare tuir moral nebe mestri sira hanorin ema bolu grupo Dez Mandamentus. Grupo ne'e moris iha Same, nia Mestri hela iha Dili. Ema barak liu nebe tuir husi Hauba sub-distritu Bobonaro inklui suku Colimau. Bainhira kalan, sira halibur hodi rona moral mestri sira fo hanoin ba membru sira katak tinan 2000 ita sei ukun an. Ne'e duni seksaun intelejensia Indonesia fo naran Colimau 2000.

Iha grupo de adorasaun ne'e respeito malu tebes, sempre bensa mestri nia liman no hakruk ba membru nebe tuan. Ho loyalidade ne'e ema nebe laos membru konsidera moral no halalok nebe halo hanesan Santo nebe iha realidade sira rasik la hanaran an nudar santo. Tamba la iha naran formal ida nebe legalize, membru nebe involve iha klandestina no forcas libertasaun senti haksolok ho naran Colimau 2000 tanba naran ne'e iha sentidu abreviasaun Comando Libertasaun Povo Maubere 2000, ho naran ida ne'e senti furak no folin ba luta.

Grupo ne'e dezorganizadu dezde tinan 2000. Mestri 12 nebe Mestri boot Martinho Vidal hili hela, halo deklarasaun ida iha Bobonaro, iha tinan 2000 hodi taka grupo Colimau ho razaun katak funu hotu ona la bele organiza malu tan. Maske nune'e membru balun nebe iha parte Atsabe, Atabae, Cailaco, Balibo, Hatolia, Ainaro no Same, sei fiar katak presiza nafatin figura ida para bele orienta no organiza sira ba aspektu dezenvolvimentu no politika iha era independensia. Membrus grupo ida ne'e nian, namakari ba grupo sosiedade sivil no partidus politiku.

Depois ita ukun an, hatudu momos katak bainhira membru sira halibur malu ema duun forma Bispu, Padre ho Madre. Pior liu, kuando krize akontese grupo arte/ritual marciais naran sai kuinesidu ba asaun krime. Ho situasaun ne'e halo organizasaun ne'e naran sai kuinesidu iha parte negativu no ikus mai buka dalan oinsa mak bele halo transformasaun?

Metode transformasaun vizaun politika intrega ba partidu politiku no vizaun dezenvolvimentu transforma ba sosiedade sivil, no movimentu juventude nian iha aktividades de adorasaun transforma ba ritual marciais nudar parte ida kultura Timor nian bazea ba dutrina novo testamentu. Ne'e duni tuir istoria seidauk iha naran definitivas, maibe naran sira nebe temi iha leten asosiadu ona ho grupo ne'e. Agora dadaun membru sira iha baze moris hakmatek ho sira nian akividades agrikultura, negociantes, estudantes, funcionarius publiku, policia no balun nebe iha militar barak liu mak sai grupo peticionariu no to'o ohin loron seidauk intrega an. Maibe proprio ba kazu ne'e laos grupo nian mas nasional. Simplesmente maske hanesan ritual marciais maibe ba oin grupo ne'e bele konsidera nudar Timorizasaun ba kultura Catolica Romana nian.
*) Porta voz Colimau 2000 (+670 729 2457) Maromun_timor@yahoo.com
Seroja Raikotu Comoro,
Ex Radio Loro sae
Cede Antigos Combatentes

Lei Komunikasaun Sosial Atu Salva Se?

Husi karuk: Virgilio Guterres, Prezidente Assosiasaun Jornalista Timor Lorosa’e (AJTL), Otelio Ote, Prezidente Sindikatu Jornalista Timor-Leste (SJTL), Eurico Pereira, Sekretario Komunikasaun Sosial (Kolkos)

almerio ALVAREZ, zevonia VIEIRA
Komisaun Lejilasaun ba Komunikasaun Sosial (KOLKOS) ne'ebe mak koalia sobre futuru jornalista Timor-Leste nian futuru, halao workshop mini iha loron 6-7 Marsu liu ba iha eiz edifisiu CNRT, Balide-Dili. Problema fundamentais ne'ebe mak jornalista hamutuk ho sosiedade sivil diskute mak iha futuru, jornalista sira atu lao tuir dalan ne'ebe. Hakarak iha lei ida ne'ebe responde nesesidade jornalista nian ka lae? Jornalista Timor-oan ne'ebe mak to'o agora seidauk iha unidade, mos kestaun ketak ida iha diskusaun ne'e.

Prezidente KOLKOS, Otelio Ote, iha ninia diskursu hateten katak workshop mini ne'e atu halibur ideias hodi diskute konaba lei komunikasaun sosial. "Nasaun Timor-Leste presiza iha lei komunikasaun sosial. Maske ita nia hakarak mak atu harii demokrasia iha Timor-Leste, maibe tenki iha lei komunikasaun ida mak regula jornalista nia servisu. Jornalista sira sei la halao sira nia papel jornalizmu ho diak, signifika la iha demokrasia," katak Ote iha ninia lia makloke ne'ebe nia fo sai iha ninia diskursu.

Timor-Leste hetan ona ninia independensia, maibe to'o agora seidauk iha organizasoens ida mak atu koalia sobre lei komunikasaun sosial. "Durante tinan 8 nia laran, jornalista balun hetan ameasa no tortura husi ema balun, maibe la iha kanal independenti ida mak halao ninia servisu legalmente hodi nune'e bele sai nu'udar sumbrina ida ba jornalista sira atu hato'o keixa ka reklamasaun ruma kona-ba jornalista ninia servisu no mos reportajen ne'ebe jornalista sira fo sai liu husimeius komunikasaun," hatutan Ote.

Inisiativa jornalista sira hodi halibur ideias konaba lei komunikasaun ne'e importante. Secretario Estado ba Konsellu Ministru, Agio Pereira, ne'ebe mak reprezenta governu AMP iha ninia deskursus esplika katak halibur Konsellu Ministru husu ona ba Parlamentu Nasional atu hamosu lei komunikasaun sosial. "Wainhira ita atu halo lei ida, ita presiza hatene saida mak akontese iha rai laran. Tanba kuandu haree didiak profisaun jornalizmu nian, seidauk dezenvolve didiak. Ho prezensa institutu jornalizmu nian, jornalista sira bele halao sira nia knar diak liu tan iha baze; liliu wainhira jornalista sira halao kobertura," katak Sekretariu Estadu ba Konsellu Ministru ne'e.

Agio Pereira hatutan liu katak atu media nasonal alkansa liu tan iha futuru, bele harii institutu jornalizmu hanesan orgaun autonomia ketak ida. Kuandu ida ne'e labele realizta tanba razaun rekursu umanus, tuir Agio katak bele mos iha ligadu ho universidade atu halao formasaun ba jornalista sira.

Wainhira koalia konaba lei imprensa, Agio Pereira mos husu ba jornalista sira atu halo mos dikusaun konaba lei kodiku penal nian. Konsellu Ministru husu ona ba Parlamentu Nasional atu elabora no halo lei ida ne'ebe bazeando ba lei kodiku penal nian. "Tanba debates konaba lei kodiku penal, Konsellu Minstru mos iha ninia versaun rasik," esplika nia.

Ideias prioridade sira ne'ebe mak hamosu iha diskusaun ne'e, Sekretariu Estadu ba Konsellu Ministru husu para bele hato'o ba iha governu. "Governu haree katak lei importante duni ba jornalista sira, tanba ne'e mak governu presiza halo debates klean liu tan ba esbozu lei komunikasaun sosial nian," afirma Agio Pereira.

Legal Advisor ba lei komunikasaun sosial husi UNDP, Sofia Calado hahu halao ninia servisu iha Timor-Leste tinan 2006. Komesa 2006, nia sai nu'udar konselleiru Parlamentu Nasional atu halo esbozu lei komunikasaun sosial, maibe durante ninia prezensa iha Timor-Leste, dokumentu lei komunikasaun sosial ne'e la konsege sai debates iha Konsellu Ministru no nia rasik la hatene lei ne'e ninia paradeiru. "Koalia konaba obstakulu atu halo lei, primeiru, tanba hau mai husi rai liur. Buat ne'ebe ke hau haree katak situasaun progresu iha Timor-Leste la hanesan ho rai seluk. Segundu, oinsa atu halibur maluk jornalista sira hodi deskute hamutuk hahu husi relasaun servisu jornalista nian konaba obstakulu ne'ebe jornalista sira hetan no infrenta iha terenu. Agora ora oinsa ultra pasa obstakulu rua ne'e. Importante mak ita servisu hamutuk ho legal advisor sira ho jornalista sira husi elektronika no media cetak. Atu nune'e aban bain rua lei ne'e mosu karik, sei la hamosu perguntas barak iha komunidade ka jornalista sira nia leet," afirma Sofia.

Atu presiza lei komunikasaun ka lae, ne'e depende jornalista timor-oan sira nia nesesidade. "Maibe aspeitu seluk ne'ebe mak ita tenki defende no prova katak buat ne'ebe ita fo sai ba iha publiku tenki los no justu. Kuandu ita halo sala iha ita nia media, ita mos tenki halo koreksaun ba sala ne'ebe mak ita halo. Ida ne'e importante ba media sira," hateten ne'ebe mak fo ninia diskursu iha lian ingles ne'e. Ikus liu tuir Sofia ninia esperensia katak, jornalista sira, wainhira halao servisu iha terenu, tenki halo servisu tuir sira nia konsiensia.

Jose Texeira, ne'ebe foti topiku konaba papel lei komunikasaun sosial kompara ho nasaun seluk, iha ninia diskursus, esplika katak kuandu iha lei komunikasaun, tenki haree se mak bele nain ba media ne'e rasik. "Tuir hau nia hanoin, lei komunikasaun sosial, tenki kontrole propriedade jornais sira nian. Ema ne'ebe mak laos sidadaun, labele nain ba media ne'e rasik. Tenki sidadaun rai ne'e duni mak nain ba media ne'e rasik," deklara Jose Texeira iha ninia diskursus.

Vital dos Santos husi Parlamentu Nasional iha ninia diskursus mos hateten katak lei komunikasaun sosial ne'e presiza atu regula ezistensia media iha Timor-Leste. "Forma da imprensa komunikasaun sosial ne'e halo nusa. Imprenza ho ninia personalidade juridika (badan hukum) ne'e mos tenki klaru, tanba iha relasaun ho responsabilidade," esplika Vital dos Santos.

Prezidente Komisaun A, Parlamentu Nasional, Fernanda Borges ne'ebe toma konta atu halo lei, iha ninia esplikasaun hateten katak presiza iha lei komunikasaun sosial atu jornalista sira halao sira nia knar ho didiak. "Atu nune'e povu bele hetan informasuan oioin iha area hotu-hotu ne'ebe funsiona iha nasaun ida ne'e. Importante mos ba ita atu haburas ita nia demokrasia, ita presiza media ida forte no independente, konfiansa, integridade no hetan apoiu husi aspeitu hotu-hotu," afirma Fernanda Borges.

Pe. Domingos Sequeira ne'ebe reprezenta Radio Timor Kmanek (RTK) iha ninia diksursu hateten katak diskute konaba esbozu lei komunikasaun sosial ne'e importante. "Maibe iha aspeitu seguransa no ekonomia, se ita onestu ba ita nia aan karik, ita seidauk soberanu lolos atu hamrik mesak hodi afirma ita nia autonomia, perante nasaun sira seluk. Nune'e mos iha aspeitu lejislasaun. Ita nia kapasidade atu produz lei, sei hetan reforsu husi ema peritu ka ema neon nain sira husi rai liur," tenik Direitor RTK ne'e. Tanba ne'e mak Pe. Domingos haklean liu tan katak ho produtu lei komunikasaun sosial ne'ebe agora daudaun ita hakarak halo estudu, ita hakarak hatudu ita nia lejislasaun iha nivel ida ke as tebtebes.

Atu halo lei komunikasaun sosial ne'ebe iha valor boot no aprezenta ideias jornalista sira hotu, presiza kontribuisaun hosi parte jornalista sira hotu. maibe oinsa realidade iha terenu. Jornalista sira seidauk hamutuk!