(PERFIL): Zelia Fernandes: "Presiza Kontra Operasaun no Esplorasaun"

Zevonia VIEIRA

"Iha tinan 1995, hau komesa la hamutuk ho hau nia familia. Hau nia aman kastigu iha Atauro. Hau nia inan mos hela ketak. Maske nune'e, familia tomak fo apoiu ba hau hodi halo servisu ki'ik oan hanesan lori karta to'o iha ai laran fo ba Falintil".

Fraze ida iha kraik ne'e hato'o husi Zelia Fernandes ba kla'ak, wainhira jornalista husi jornal ne'e halao dada lia ho nia kona ba feto iha vida rezistensia. Invazaun no okupasaun ne'eb governu indonezia halao iha Timor-Leste durante tinan 24 nia laran halo povu atus ba atus mak monu iha sofrimentu nia laran. balun mate, tan hetan tortura. Oan barak mak lakon inan-aman tanba, militar Indonezia sira oho lakon deit.

Maske povu barak mak monu ona iha sofrementu nia laran, maibe povu "maubere" ne'ebe defende luta ukun rasik aan, la tauk hetan tortura, presaun, ka kilat musan ne'ebe militar Indonezia sira tiru sai. Povu Timor-Leste hamrik no hakilar nafatin hodi luta hasoru kolonializmu Indonezia.

Partisipasaun feto iha tempu rezistensia, sai mos pontu importante ne'ebe  mak la bele nega. Katuas, ferik feto, no mane sira halo stratejia oioin oinsa luta atu hetan objetivu komum, ukun rasik an ne'e.

Zelia Fernandes, feto maluk ida ne'ebe ho konxiensia boot hodi entrega nia vida atu luta kontra okupasaun ilegal governu Indonezia iha Timor-Leste. Feto simples ne'ebe moris iha Watulari, Distritu Viqueque tinan 1979 ne'e wainhira jornalista kla'ak dada lia nia iha ninia servisu fatin, Timor Leste Media Development Centre (TLMDC), Kolmera Dili hateten ho onestu katak nia rasik laos autor luta hasoru okupasaun Indonezia.

Zelia konta ninia esperiensia ba kla'ak katak razaun fundamental ne'ebe halo nia involve hodi luta wainhira nia ho idade ki'ik. "Hau haree katak operasaun no esplorasaun barak mai husi sira ne'ebe iha poder, liliu sira ne'ebe iha ligasaun maka'as ho inimigu. Ida ne'e hamosu espiritu ida katak presija kontra esplorasaun ho operasaun ne'ebe iha," tenik Zelia.

Iha tinan 1982, Zelia nia idade tama iha tinan 4. Zelia haree rasik ho matan katak iha Abril 1982 militar Indonezia sira kaptura no lori sai Zelia nia aman ba iha Atauro no husik fali iha tinan 1991. "Tempu ne'eba komesa iha perguntas oioin mak mosu iha hau nia laran. Tanba sa mak militar sira kaer pai?  Sira lori pai ba iha ne'ebe no halo saida?" tenik nia wainhira hanoin kona fali realidade ne'ebe akontese iha tinan hirak liu ba.

Seguransa ba Zelia bele dehan la iha ona. Aman ne'ebe sempre fo protesaun ba oan, ikus mai sai deit mehi, tanba militar sira kaer tiha Zelia nia aman. "Iha tinan 1998 situsaun perigozu tebes. Maske nune'e, ameasas no presaun husi militar indonezia, la halo Zelia ho kolega sira hakfodak. "Hau ho kolega sira komesa involve iha Dewan Solidaritas Mahasiswa Timor-Timur (DSMTT). Ami hahu halao servisu ki'ik oan sira hanesan lori karta balun to'o ai laran hodi fo ba Falintil sira. Feto barak mak involve iha tempu ne'eba," dehan nia.

Esperensia ida ne'ebe mak Zelia rasik asiste direitamente mak iha loron 10 Juñu 1998, DSMTT komesa halo demonstrasaun ba dahuluk. "Iha tempu hanesan ne'e grupu feto ne'ebe involve iha DSMTT hahu hanoin oin sa feto sira bele forma an hodi suporta mos mane maluk sira. Feto hamutuk 13 mak forma grupu ho naran Feto Foin sa'e Timor Lorosa'e," hatutan Zelia.

Ho grupu Feto Foin sa'e Timor Lorosa'e ne'e, halo grupu sira ne'ebe mak involve-an iha rede klandestina komesa forte no metin liu tan. Iha loron 3 Outubru 1998, feto maluk sira hala'o mini kongresu iha Aileu ho objetivu oin sa atu rona lian husi ferik sira ne'ebe mak uluk partisipa iha luta. "Ami rona sira nia ideias no fo korazen diak liu tan ba feto foin sa'e sira. Komesa husi ne'eba, hahu organiza demonstrasaun no aktividades seluk ho objetivu ida: hakarak ukun rasik aan.

Istoria úniku barak mak feto maluk sira hetan wainhira halao klandestina. Maske sei halao knar nu'udar universitaria iha fakuldade siensia no edukasaun, iha departementu ingles, maibe Zelia involve nafatin iha tempu importante hanesan wainhira komisaun Parlamentu husi Uniaun Europeia mai Dili, haree mos mate ne'ebe hetan tiru husi Militar Indonesia iha Manatuto. "Familia matebian entrega ba iha Dewan nia liman hodi halo demonstrasaun haleu Dili. To'o iha kantor governur, militar sira aserku metin tiha ami. Sira komesa tiru. Ema hotu halai tanba tauk. Hela deit kareta ambulansia, inklui hau," katak Zelia, ne'ebe nunka atu haluha realidade ida ne'e iha ninia moris laran. "Hau to'o agora la imajina tanba ambulansia lori halai hau. Uniku tanba hau tuur iha ambulansia nia kapon to'o iha Manatuto," hanoin hetan Zelia.

Realidade seluk ne'ebe Zelia rasik hasoru durante iha tempu rezistensia mak sistema patriakal sei maka'as iha Timor-Leste iha tempu ne'eba. "Maibe iha  komprensaun  no iha hanoin ida katak feto no mane sira tenki hamutuk hodi  hetan objetivu ida mak Ukun Rasik An. Maibe sistema ne'ebe Dewan Solidaritas uza mak desizaun hotu-hotu laos ema ida deit mak foti maibe inklui feto," sublina Zelia.

Ho situasaun ida hanesan ne'e, zelia nunka sente desperadu. Mane maluk barak mak fo korazen ba nia ho ninia maluk sira seluk. "Sistema patriakal forti maibe oinsa feto ho mane bele suporta malu hasoru inimigu. Wainhira halo propaganda protokolu ajita populasaun, dala barak feto mak responsabilidade. Ne'e hatudu katak mane sira fo oportunidade ba feto hodi partisipa másimu maske ho numeru oituan," tenik Zelia.

Numeru feto oituan ka barak mak involve iha luta naruk ne'e, laos tempu ona atu konta, maibe povu barak mak terus no moris iha perigozu nia laran. "Iha kondisoens hanesan ne'e, feto mak sempre hetan presaun no sofrementu husi militar indonezia," esplika Zelia ne'ebe hela iha Bebonuk ne'e.

Iha tinan 1995, Zelia komesa la moris hamutuk ona ho ninia familia. "Hau nia aman kastigu iha Atauro no hau nia inan mos hela ketak. Maibe familia tomak fo apoiu ba hau hodi halo servisu ne'e, hatutan Zelia. Zelia esplika liu tan katak iha difikuldade barak mak feto maluk sira hasoru durante iha tempu okupasaun Indonezia nian.

Wainhira maluk feto sira halao servisu iha tempu kalan, ema balun sempre interpreta negativu. Maibe wainhira esplika nia objetivu, la iha ona difikuldade. "Liliu iha hau nia familia ne'ebe hau hela ba. Sira ladun komprende saida mak ukun rasik an," Zelia hateten.

Depois ukun aan, problema rai laran ninia tensaun aumenta nafatin. Haree ba iha realidade ne'ebe akontese, fen husi Deomentino da Cruz ne'ebe mos involve iha luta hodi kontra kolonializmu ne'e hateten katak, iha buat importante ne'ebe mak agora lakon ona mak, unidade. Iha tempu rezistensia, maske maluk sira hotu mai husi distritu ne'ebe diferente no husi familia ne'ebe la hanesan maibe ami sempre hamutuk. "Ida ne'e mak valor importante tebes. Ne'e la ses husi prinsipiu ne'ebe Dewan Solidaritas kuda. Prinsipiu fundamental mak solidaridade, meio ambiente no humanizmu," afirma Zelia.

Timor-Leste hetan duni ninia objetivu katak duni sai ona kolonializmu husi pais ida ne'e. Iha tempu ukun rasik an Timor-Leste enfrenta krizi foun entre Timor oan ho Timor oan mak kria krizi ne'e.  "Ita bele aprende husi situasaun, tenki halo reflesaun fila fali, karik iha naksala ruma. Importante liu mak oin sa bele fo hanoin no fo korazen atu haforsa liutan no haree do'ok liu ba oin konaba ita nia soberania nasaun nian. Timor-Leste sedu liu enfrenta sasan hanesan ne'e," hatutan Zelia.

Zelia hatutan katak timor oan sira terus liu ona, lakohi ona atu terus tan. Barak mak lakon nia ema, sasan no maluk sira ne'ebe mate nia rate mos iha ne'ebe ita la hatene. "Ho krizi ne'ebe agora ita enfrenta, mai tuur hamutuk hodi halo reflesaun maka'as, " espera Zelia.

Loron mundial ba feto ne'ebe monu iha 8 Marsu foin lalais ne'e, fo hanoin ba Timor oan hotu-hotu oin sa fo honra ba feto maluk sira ne'ebe mate ona; liliu saudozu sira ne'ebe mak fo hela espiritu fundamental ba feto hodi partisipa iha aktividade politika. Feto maluk sira ne'e mak hanesan Rosa Muki Bonaparte feto maluk ne'ebe mak kaer kilat hasoru okupasaun, Etelvia ho naran kodiku Buidolimau, maske ikus mai nia mate laos tan funu maibe nia mos kontribui".