Fretilin : "Estado de Sitio no Emerjensia Hatudu Inkapasidade Governu AMP"

zevonia VIEIRA
Estadu de sitio prolongga ba loron 30 no kria tan estadu de emerjensia. Bankada Fretilin hato'o deklarasaun katak ejijensia atu dekreta estadu de sitio no emerjensia, hatudu deit inkapasidade governu AMP atu ukun iha situasaun normal.

Trajedia 11/2 to'o agora sei halo povu Timor-Leste konfuzaun. To'o agora Salsinha ho nia grupu balun sedauk entrega an, maske operasaun konjuta ne'ebe diriji husi F-FDTL no PNTL seidauk suksesu. Perguntas boot ba povu sira tansa maka Salsinha sedauk bele entrega an?

Estadu de sitio ne'ebe kria husi 48 oras, loron 10, loron 30 no agora iha loron 20/3 prolongga tan estadu de sitio iha parte loromonu no kria estadu de emerjensia iha lorosae, hahu iha loron 20/3 iha Parlamentu Nasional.

Bankada Fretilin ne'ebe hetan kadera mayoria ho total 21 iha Uma Fukun Parlamentu Nasional kuaze kontra no abstein tanba tuir bankada Fretilin nia hanoin katak, "estadu de sitio ka emerjensia fo impaktu negativu ba povu ki'ik sira nia moris liuliu iha parte ekonomia no mos viola ona direitus humanus hodi moris livre".

Ho razaun hirak ne'e mak Vice Prezidente bankada Fretilin, Francisco Miranda Branco hato'o kestaun ne'e liu husi deklarasaun katak bankada Fretilin depois haree besik ba impaktu ne'ebe oras ne'e lori ba povu ki'ik no kiak iha baze no rona mos reazen barak husi sosiadade.

"Konsekuensia husi dekretu estadu de sitio ne'ebe halakon dadaun direitus bazikus sidadaun barak nian, maske situasaun de poder ida ne'e, lori hakmatek ba ema balun," katak Branco. Bankada Fretilin ne'e hatutan liu tan katak Timor-Leste la presija dekreta estadu de sitio ne'ebe hahu husi 48 oras, loron 10, loron 30. Tuir lolos se governu haree ida ne'e presija duni tanba situasaun estadu ninian husu dala ida loron 30. Se la sala estadu de sitio ka emerjensia ne'ebe naruk hanesan ne'e, karik la iha presediensia iha mundo tomak.

Bankada Fretilin fo apoiu deit ba iha operasaun konjuta F-FDTL no PNTL. Branco hateten: "ami apoiu atu halao nafatin ba operasaun konjuta ne'e tanba Timor-Leste hetan iha tempu kotuk esperiensia rua operasaun militar, ida maka operasaun ba Atsabe no Hatulia tinan 2003. Seluk fali mak operasaun iha Manufahi 2006. Iha tempu ne'eba estadu Timor-Leste la presija dekreta estadu de sitio ka emerjensia, hodi halao operasuan militar".

Branco hateten husi partidu Fretilin mos rejista, iha tempu ne'eba governu husi Dr. Mari Alkatiri, liu tiha operasaun Atsabe no Hatulia, halao governasaun aberta iha Atsabe no la presija dekreta estadu de sitio ka emerjensia. Governasaun aberta ne'e hetan sussesu no ajuda servisu seguransa nian.

Iha deklarasaun Fretilin nian ne'e, Branco haforsa liu tan katak ezijensia atu dekreta kontinuidade estadu de sitio no estadu de emerjensia ne'e bele hatudu deit inkapasidade governu AMP atu ukun iha situasaun ida normal. Tanba ne'e maka halo opsaun hodi halakon direitus bazikus sidadaun sira nian, liu husi estadu de sitio ka estadu de emerjensia. "ida ne'e prejudika dadaun ona sidadsaun ki'ik sira nia moris lorloron. Ukun iha kondisaun ida ne'e, bele loke dalan halakon estadu de direitu iha Timor-Leste no harii fali estadu ne'ebe sidadaun sira lakon sira nia direitu," tenik nia.

Branco hatutan katak governu AMP ukun iha kondisaun hanesan ne'e hatudu katak governu la ukun maibe governu komanda no situasaun ida ne'e halo ita hanoin fila fali ba tempu rezistensia ne'ebe buat hotu iha komandu ida deit nia okos.

Bankada Fretilin mos hato'o nia preokupasaun katak oras ne'e dadaun mosu ona tauk iha sidadaun sira nia le'et kona ba asaun operasaun polisia intelejensia ninian, hanesan Premeiru Minsitru atual, Xanana Gusmao rasik hateten situasaun ida ne'e hanesan iha tinan 24 nia laran, tempu okupasaun Indonesia.

Tuir observasaun bankada Fretilin nian katak oras ne'e povu moris iha estadu ida ne'ebe la iha primado de lei. "Ita iha estadu ida ne'ebe, ema ukun goza, laos deit imunidade maibe mos impunidade. Ami hakarak hato'o ami nia preukupasaun atu uma fukun parlamentu nasional ne'e labele sai hanesan cavalo mandadu deit, hodi tau karimbu ba desizaun hotu ne'ebe mai. Ezeptu ba deputadus balun no mos opozisaun Fretilin. Situasaun ne'e bele lori ita nia estadu lao lalais los ba ditadura.

Tuir bankada Fretilin nia haree ba kondisaun ne'ebe nasaun hasoru oras ne'e, la iha ameasa boot ba ordem Konstituisional demokratika.

Ho razaun ne'e, bankada Fretilin hato'o nia deklarasaun katak labele fo apoiu deklarasaun ba prolonggasaun estadu de emerjensia muito menus, ba estadu de sitio iha ita nia nasaun. "Maibe ami hakarak iha ne'e fo nafatin, apoiu tomak ba operasaun konjuta F-FDTL/PNTL hodi halao opersaun," tenik nia.

Bankada Fretilin husu ba povu tomak, liuliu ba militantes no simpatizantes Fretilin atu tulun komando konjuta F-FDTL/PNTL atu halao nia operasaun ho susesu. La haluha bankada Fretilin mos husu ba Salsinha atu voluntariamente entrega aan bna iha justisa liu husi forsa seguransa. "Operasaun ne'ebe lori estadu RDTL ninian desizaun tanba nudar ema moris deit mak bele fo kontribuisaun boot ba lia los no justisa iha Timor Leste," dehan Branco.

Entretantu jornalista kla'ak mos dada lia ho Prezidente partidu UNDERTIM, Cornelio Gama, alias L7. Bankada UNDERTIM votu kontra, wainhira governu husu ba parlamentu nasional atu hanaruk tan estado de sitio no estado de emerjensia. "Hau vota kontra tanba estadu de sitio aplika iha Loromonu no estadu emerjensia aplika iha Lorosae," afirma L7.

L7 hatutan liu tan katak ida ne'e sei bele hamosu fila fali problema Lorosae-Loromonu. L7 hatutan liu tan katak diak liu kria nafatin estadu de sitio iha Timor tomak, hodi nune'e governu bele rezolve problema ho diak. "Tanba povu balun sei hela iha lona okos no justisa maka sedauk lao ho diak," dehan L7.