HALIRI: Surpresa Politica ou Supressão Politica?

Até que em fim! Desizaun ne'e sai duni. Infelizmente, desizaun ne'e la tuir espektativa publiku nian, maibe tuir receio ema barak nian. Receio ema barak nian katak governu AMP sei prolonga tan periudo Estado de Sitio.

Xanana Gusmao, nudar politiku, nunka kole atu hamosu surpreza politika. Iha 2006, bainhira sei nudar Prezidente Republika, nia kehe "ahi-kla'ak loromonu-lorosa'e" nebe Salsinha ho nia grupo tau iha sira nia petisaun sai "ahi-lakan" liu husi nia "Mensagem ba Nasaun." "Ahi-lakan" nebe teki-tekir halo sidade Dili sai "ahi-latun," karik lakohi dehan "ahi-kdesan."

Agora nudar Primeiro Ministro, Xanana Gusmao kontinua halo surpreza. Hafoin, hamosu Estado de Sitio durante fulan ida, ho governu AMP nebe nia ukun, hamosu situasaun politika rua nebe perpetua nafatin problema loromonu-lorosa'e nebe oras ne'e ema Timor ta'uk atu ko'alia.

Situasaun rua nebe, konsiente ka inkonsientemente, governu AMP hamosu hodi hafahe Timor-Leste mak Estado de Sitio ba loromonu, Estado de Emergencia ba lorosa'e. Hein katak, interpretasaun ida ne'e sala.

Interpretasaun kona ba politika governu AMP ne'e bele sala, maibe inisiativa atu halo interpretasaun la'os buat ida nebe sala iha konstituisaun no lei nia oin. Karik ita nia konstituisaun halo difinisaun klaru kona ba diferensa Estado de Sitio ho Estado de Emergencia, biban sei la iha atu halo interpretasaun. Tan konstituisaun la difini, loke biban ba ema ka grupo ida-idak atu halo interpretasaun tuir nia tendensia ideolojika no tuir nia interese politiku. Hanesan foin lalais, hafoin eleisaun jeral, ita interpreta artigo 106 Konstituisaun RDTL.

Bainhira publiku sei konfuzu kona ba insidente 11/2 no sei kestiona hela aktuasaun forsa seguransa nian iha periodu Estado de Sitio, Governu AMP hamosu tan konfuzaun seluk kona ba Estado de Emergencia. Bainhira ema no politiku sira ejiji atu governu muda Estado de Sitio ba Estado de Emergencia, governu AMP nia resposta mak simu pedasuk sorin, maibe mos oferese fali tomak ida: kria duni Estado de Emergencia tuir ejijensia publiku, maibe mantem nafatin Estado de Sitio.

Ida ne'e bele dehan, nudar implementasaun kontrariu husi hahalok kultural ema timor nian "han isin, sikat ruin." Hahalok governu AMP nian ne'e "han isin mesa-mesak, fahe ruin ba ema tomak." Karik implementasaun Estado de Sitio no Estado de Emergencia ne'e, hamosu vantajem politika ruma, vantajem ne'e serve liu atu sustenta no haboot governu AMP nia ukun, do que atu fo proteksaun ba povu Timor-Leste nia moris.

Tan ne'e, la iha duvida bainhira proposta governu AMP nian atu prolonga periudu Estado de Sitio no hamosu Estado de Emergencia, hetan reaksaun kontra, la'os de'it husi Fretilin nebe nudar rival AMP nian, maibe mos husi deputado AMP rasik.

Deputado Parlamento Nasional, Mario Viegas Carrascalão, husi PSD, fo nia votu kontra iha Parlamentu ba proposta AMP nian atu prolonga periudu Estado de Sitio. Tuir Carrascalão, atu Estado de Sitio ka Estado de Emergencia, la proteje povu nia moris, maski mosu ho objectivu atu hadi'a proteksaun ba moris povu nian.

Ho lensa ka binokulu politiku oinoin, ita la konsegue hare hetan pontu ka linha sa ida mak halo Estado de Sitio ho Estado de Emergencia ne'e la hanesan. Karik ho mikroskopiu politiku AMP nian mak bele hare hetan.

Politikamente, situasaun rua ne'e signifika buat ida de'it: konsentrasaun de poder iha governu no militar nia liman. Karik ho liafuan seluk, ita bele dehan perpetuasaun de poder autoritariu.

Maski mosu ho naran la hanesan, kondisaun nebe uza atu justifika situasaun rua ne'e hanesan de'it. Rekolhimentu obrigatoriu ho oras hanesan, labele iha reuniaun no manifestasaun politika. Sa tan, manifestasaun hasoru governu. Surpresa politica ou supressão politica?

Populasaun barak mak sai vitima ona ba surpreza politika ukun-na'in sira nian. Surpreza politika ho karakter atu halo supressão politica, liu husi meios politicos nebe persuasivo. Meios politicos nebe obriga povu atu neneik-neneik, sai apatiku ho mal administrasaun governu no mal funcionamento estado nian.

Receio kona abuzu de poder durante periudu Estado de Sitio no Estado de Emergencia hanesan fulan ida liu ba sei kontinua. Tan to'o agora la iha mekanismu legal ida atu kontrola no fo sangsaun ba abuzu de poder no autoridade sira ne'e. Husu deskulpa bebeik, la'os mekanismu politiku, sa tan legal atu assume responsabilidade. Deskulpa dala barak liu sai tiha ona reasaun espontanea nebe hamoris inisiativa atu halo sala bebeik.

Se loron ruma mosu duni poder ditadura ida iha rai ne'e, ita hotu tenke hatan ba pergunta ne'e: Ne'e tanba ukun-na'in sira mak kanten demais atu ukun ka ita povu mak obediente exagerado. Obediente exagerado aat liu ta'uk ten demais.