Jose 'Josh' Trindade: Knar Kultura Timor ba Prosesu Hari'i Nasaun

Kultura hanesan aspeitu ida nebe importante tebes ba ema nia moris nudar individual, membru sociadade no sidadaun ba nasaun ida. Konstituisaun RDTL mos rekuinhese importansia Kultura iha hari'i nasaun foun ida ne'e.*

Iha Konstituisaun RDTL artigu 59.1 hakerek katak:

"Nasaun tenke rekunese no garantia katak sidadaun
hotu-hotu iha direitu ba edukasaun no kultura, …"

Artigu 59.5 mos hakerek katak: "Ema hotu-hotu iha direitu atu goja kultura no kreavidade no obrigasaun hodi preserve, proteje no fo valor ba kultura sira nebe fo hela ba ita". Klaru ba ita katak, ita nia direitu kultura garantia ona iha konsituisaun. Maibe realidade hatudu oin seluk. Iha kotenstu prosesu hari'i nasaun-istadu, ita haluha tiha ita nia kultura, ita nia hun no abut. Iha Prosesu hari'i nausaun, ita importa but husi rai liur sira mak mai implementa iha ne'e. Tradisaun diak husi ita nia avo beiala sira, ita la liga tiha. Malisan sei kona tan ita karik? Tanba Kultura ne'e importante tebes ba vida nasaun ida hodi hakat ba oin, foin lailais ne'e hau halo peskiza ida kona ba oinsa atu usa kultura Timor nian hodi rezolve konflitu politika iha 2006. Iha peskiza ida ne'e, hau foka ba 'problema ka konflitu entre Lorosa'e - Loromonu" nudar sentru analisa iha hau nia peskiza. Relatoriu final husi peskiza ida ne'e ho titulu "Hanoin Fila Fali Identidade Timor Oan Nian Nudar Estratejia Hari'i Dame: Konflitu Entre Lorosa'e - Loromonu Husi Perspetiva Tradisional" (Bele asesu iha website ne’e iha Tetum ho inglés).

Hare ba problema Lorosa'e - Loromonu nebe mosu iha krize 2006, hau hetan katak, konflitu entre Lorosa'e - Loromonu ne'e problema foun ida. Problema ne'e hanesan fenomena foun iha Timor nia istoria. Hare' fila fali istoria Timor nian, iha tempu visi avo sira nian, tempu Portuguese, funu sivil 74-75, no okupasaun Indonesian nian, nunka mais mosu isu ida Lorosa'e - Loromonu. Relatoriu CAVR mos hatudu momos katak, mesmu iha konflitu bo'ot entre Timor oan iha 74-75, maibe konflitu ne'e nunka mais daet ba Lorosa'e - Loromonu.

Pergunta bo'ot ida mai ita, tansa problema ne'e mosu iha krize 2006?

Iha peskiza no relatoriu barak-barak hodi analiza asuntu Lorosa'e - Loromonu ne'e. Relatoriu barak hare liu ba aspeitu ekonomia, asesu ba servisu, edukasaun, juventude hst, nudar fatores nebe kontribui ba krisi 2006.

Iha hau nia peskiza, hau koko atu no analiza krizi 2006 espesialmente problema Lorosa'e - Loromonu husi perspetiva tradisional nian. Hau koko atu analiza problema Lorosa'e - Lromonu husi perspetiva tradisional. Timor oan sira nia hanoin rasik kona ba asuntu ida ne'e.

Hau hetan konklusaun katak, kulturalmente, problema Lorosa'e - Loromonu ne'e laiha. Desde avo sira nia tempu to'o agora, hori uluk hori wain, laiha buat ida dehan Lorosa'e - Loromonu. Timor ne'e ida deit, mesak feton nian deit naan nian deit .

Maibe, politikamente, iha duni divisaun entre Lorosa'e - Loromonu. Divisaun ka konflitu hun husi Lorosa'e - Loromonu mak liafuan "rezistensia". Wainhira ita koalai ona kona ba ita nia esperiensia iha rezistensia nia laran, ita komesa ona reklama katak, ita husi rejiaun ka parte ida ne'e terus liu ou servisu makaas liu husi parte ka rejiaun ida neba. Ida ne'e sala. Maibe mos, liafuan rezistensia, laos deit kria problema entre rejiaun rua entre Lorosa'e - Loromunu ka PNTL - F-FDTL, iha nive individual mos, wainhira Timor oan nain rua tur hamutuk koalia kona ba rezistensia, ida komesa ona reklama katak nia servisu no kontribui makaas liu iha resistensia, kompara ho ninia kolega. Baibain ita rona lifuan barak ema koalia, "ha mak luta nain, hau mak terus nain, hau mak funu nain, hau ema resistensia". Kuitadu! Sira nebe uluk la involve aan iha rezistensia ita soe ba nebe? Sira nebe hanesan ferik katuas sira iha foho, uluk iha '99 ba deit vota ita faan fali sira ba nebe? Ita nia joven sira nebe laiha ligasaun ho rezistensia ka funu kontra Indonesia, sira ne'e sente sira parte husi prosesu hari'i nasaun ka lae? Tanba sira la involve iha resistensia, tanba ne'e dala ruma sira hanoin, se nasaun ne'e ba ema rezistensia deit, diak liu ita sobu rahun tiha, diak liu sunu. Dala ruma bele akontese hanesan ne'e.

Se sira, ema nebe laos luta nain, senti sira laiha direitu nebe hanesan, entaun sira komesa odi ona, komesa doko no sobu ona nasaun ne'e halo sai rungu-ranga tiha para ita hotu labele aproveita. Entaun buat ida dehan "rezitensia", nebe uluk halo ita sai unidade metin, agora tanba ita nia inimigu laiha ona be, ita komesa ona fahe malu. Ita nia unidade komesa mamar no fahe malu dadauk ona. Ita komesa ona iha Lorosa'e - Loromonu ka Mambae - Makasae. Maibe uluk ita bolu malu mesak "Timor Oan deit". To'o agora tuir lolos ita fahe malu namkari lemorai tiha ona, maibe ita sei taka matan, ita sei lakohi hare realidade ka fenomena ida ne'e. Ita halo finzi katak divisaun entre ita ne'e laiha, problema entre Timor oan laiha. Se problema entre ita laiha, tansa iha barak mak sei hela iha lona okos? Tanba sa mak ita sei hafu malu hanesan busa ho laho? Tanba sa mak ita sei hare'e malu matan la mos?

Tuir mai mos, iha hau nia peskiza ne'e, hau hetan katak, Timor nudar nasaun ida, ita iha ona krizi identidade. Krizi identidade nasional hanesan fator ida nebe kontribui ba Konflitu entre Lorosae'e - Loromonu. Se ita iha ona krisi identidade, ita nia nasaun nakdoko ona, no unidade nasional bele naksobu hanesan agora ne'e.

Balu mos fiar katak, ita nudar Timor oan, ladun rekuinese no fo valor ba ita nia kultura nudar nasaun ida. Entaun buat sira ne'e hamutuk babeur ita to'o mosu konflitu no problema barbarak.

Balu mos dehan katak, ita lanu liu ona iha manan funu ida ne'e nia laran. Tanba ne'e ita haluhan tiha funu nain sira nebe sai ona matebian no ba ona iha mundu seluk. Ita seidauk selu sira nia favor. Ita fo mak osan ba matebian sira ne'e nia familia. Maibe ita husu tok, sira uluk fo aan ba mate ne'e tanba osan ka tanba razaun seluk? Dala ruma ita halo buat lalos iha prosesu hari'i nasaun. Ita halao ita nia prosesu hari'i nasaun la tuir prinsipiu sira nebe matebian sira fo sira isin ho ran hodi sosa.

Iha tan balu mos interpreta katak, problema hanesan Krizi 2006 mosu tanba Timor nia ai-rin nudar nasaun ida seidauk kuda metin. Ai-rin Timor nia sei namlele hela, tanba ne'e nasaun ne'e sei doko bebeik. Se ita hanoin didiak, ai-rin Timor mak saida? Hau hanoin ai-rin Timor mak ita nia Kultura. Se ita la respeitu no la fo valor ba ita nia kultura, ita nia hun no abut ne'e la metin. Timor bazeia liu nasaun ida ne'e ba demokrasia no direitus humanus. Maibe, barak interpreta katak, demokrasia agora, hanesan kroat ida ba povu hodi oho malu. Direitus humanus hanesan lia kroat ida hodi la respeitu malu. Tanba sa mak sai hanesan ne'e?

Buat sira ne'e mak hanesan fatores nebe kontribui ba krisi 2006 espesialmente iha problema entre Lorosa'e - Loromonu. Oinsa solusaun ba problema Lorosa'e - Loromonu? Dalan saida mak it abele usa atu hametin fila fali relasaun no unidade entre Lorosa'e - Loromonu iha nasaun foun Timor Leste? Peskija ida ne'e fo rekomendasaun atu uja dalan kultura. Atu resolve konflitu entre Lorosa'e - Loromonu to'o hun no prevene atu labele mosu fila fali iha jerazaun oin mai mak liu husi dalan Kultura.

Atu hadame Lorosa'e - Loromonu, ita tenki bolu Lia Nain, Liurai no lider tradisional sira, atu tur hamutuk no koalia iha BITI Bo'OT nia leten atu hakotu problema ida ne'e. Winhira sira koalia hotu ona iha BITI BO'OT nia leten, ita tenki halo juramentu ida, atu nune'e jerazaun foun labele tan hamosu buat ida ne'e.

Maibe NAHE BITI BO'OT no HEMU RAN seidauk to'o atu rezolve problema hotu-hotu. Ita mos tengke haforsa ita identidade, hametin ita unidade nasional, hamosu respeitu malu, no kria kompresaun diak ba malu. Atu nune'e it abele moris iha dame no hakmatek nia laran iha nasaun ida.

Tanba ne'e, ba longu prazu, peskiza ida ne'e fo rekomendasaun katak, ita tengki hari'i UMA LULIK NASIONAL ida iha Dili hodi simboliza ita nia kultura no identidade, no hametin ita nia unidade. Uma Lulik Nasional ne'e sei simboliza unidade ba Uma Lulik Bo'ot hotu-hotu iha Timor laran tomak. Nune'e hotu-hotu sei senti katak, Uma Lulik Nasional ne'e hotu-hotu ninian, no sei fo mahon ba ema Timor oan tomak, inklui etniku minoria sira hanesan chinesa, ema Indonesia, ema eropeia sira nebe agora sai nudar Timor oan.

Iha Uma Lulik Nasional nia laran, Timor oan hotu-hotu sei konsidera malu nudar maun alin, laiha ona Lorosa'e - Loromonu ou Firaku Kaladi. Timor oan hotu-hotu iha dever atu kria no manten dame no unidade iha Uma ida ne'e nia laran, atu nune'e it abele moris hakmatek hodi hare'e ba oin.

Se Uma Lulik Nasional iha, Lia nain no Liurai antigu sira husi rai-ulun, rai-klaran no rai-ikun mak sei tur hamutuk no desidi atu oinsa bele hari'i uma lulik ida ne'e. Desenhu Uma Lulik nasional nian tengki inklui simbol husi Uma Lulik hotu-hotu iha Timor laran, atu nune'e bele garantia katak ema hotu-hotu sente inklui iha laran.

Hanesan iha sistema tradisional, se Uma Lulik nasional iha ona, ita mos persiza Sasan Lulik Nasional. Ita bele kria tan Rota Nasional ida hodi simboliza poder politika hodi ukun rai no povu ida ne'e. Rota Nasional ne'e sei fob a Presidente eleitu mak kaer hodi simboliza ninia legitimidade liu husi dalan kultura. Nune mos ita bele uja ita nia Bandeira Nasional no Livru Konstituisaun ida hodi sai hanesan Sasan Lulik Nasional, hodi simboliza ita nia unidade no identidade. Maibe sasan lulik nasional sira ne'e molok atu tau iha Uma Lulik nia laran, uluk tenki halulik lai atu ema bele respeitu. Lia nain no Lider Tradisional sira husi Uma Lulik Bo'ot tomak iha Timor laran tenke fo bensa ka halulik sasan sira ne'e, molok atu hatama iha Uma Lulik nasional nia laran. To'o ohin loron, tanba ita la halo lulik simbol nasional sira, ita hare ita nia Bandeira nasional ne'e hanesan hena baibain ida, ema la respeitu. Ita nia konstituisaun ne'e hanesan surat tahan la vale ida. No simbol nasional sira ne'e ladun iha signifika ba Timor oan hodi hametin sira nia unidade.

Se mehi hanesan Uma Lulik Nasional ho Sasan Lulik nasional mak iha ona, ita bele apresenta ideias hanesan "diversidade iha uma ida nia okos" ho Bahasa Indonesia karik dehan "beraneka ragam di bawah naungan satu rumah", Ingles karik dehan "diversity under one house". Ho prinsipiu ka ideias sira hanesan ne'e, ita bele hametin ita nia unidade no fiar malu, hodi garantia dame no hakmatek iha ita nia nasaun.

*) Hakerek nain Analizador ba Kultura Timor. Artigu ne’e sei kontinua ba edisaun tuir mai ho nia sub-titulu “Oinsa Lideransa Nasional?”