Estanislao da Silva: "Iha Salan Rua Ne'ebé Nia (Jose Luis Guterres) Halo"

Bankada Fretilin levanta kazu Vise Primeiru Ministru Jose Luis Guterres iha fulan Fevereiru maibe seidauk iha rezultadu, semana kotuk dala ida tan Fretilin levanta kazu ne'e ba publiku ho evidensia balun. Salan saida los mak Jose Luis Guterres halo bainhira asume kargu nudar Ministru Negosiu Estranjeiru? Tuir mai intervista jornalista kla'ak Nuno Rodriguez Tchailoro no Zevonia Vieira ho membru Parlamentu Nasional Estanislao da Silva ne'ebé uluk mos asumi kargu nudar Primeiru Ministru.

Bele esplika konaba kazu Jose Luis Guterres ne'ebé fo osan ba nia kaben iha Nova Yorke?
Ida ne'e asuntu ne'ebé seriu tebes tanba kazu tranferensia osan husi fundu publiku. Fundu publiku ne'e osan estadu nian absolutamente povu nia osan. Transfere ne'e halo ho konsentementu husi Sr. Jose Luis Guterres altura ne'e nudar ministru negosiu estranjeiru, ida ne'e maka problema seriu tanba nia kaben servisu iha ne'eba tuir despasu vise ministra negosiu estranjeiru ninian, servisu hanesan funsionariu lokal para manan osan deit $ 2800. Hau koalia rasik ho vise ministra, no nia hateten mai hau katak wainhira atu despasu osan ba Amerika ne'e, Vise Ministra Adaljisa Magno la hatene buat ida. Portantu ida ne'e signifika katak orientasaun ne'e mai husi ministru negosiu estrangeiru altura ne'e Jose Luis Guterres rasik, nia maka halo despasu. Entaun, nia mak autoriza osan para aumenta nia kaben nia vensimentu hanesan diplomata. Tuir lei nia kaben labele sai hanesan diplomata.

Osan husi $ 2800 ne'e atu aumenta ba hira?
Nia salariu $ 2800 hanesan funsionariu lokal depois aumenta ba salariu diplomata, nia manan osan boot liu. Husi osan ne'e ita bele hare nia total no nia trasferensia, nia diferensia hira. Husi traferensia 10 mil. Iha primeiru ne'e portantu 10.773 mill, portantu ne'e signifika katak nia vensimentu ne'e liu $ 2800.

Tuir esplikasaun katak osan hirak ne'e uza ba aluguer uma nian?
Sira maka hela iha ne'eba, ne'e laos kumprimisiu governu Timor Leste maka hili, atu selu nia kaben ba hela iha Amerika, ida ne'e laiha kumprimisiu. Tanba ne'e maka aseita katak nia kaben sai hanesan funsionariu lokal iha ne'eba.

Ho osan total $ 2800 ne'e inkui uma ba funsionariu sira ne'ebé hela iha ne'eba ?
Sim ne'e inklui uma hotu.

Vise PM hateten katak buat sira ne'e liu prosesu normal, iha tempu bainhira hili nudar ministru negosiu estranjeiru, Ramos Horta no mos ita boot rasik mak dehan lalika preokupa ho ita nia kaben, tanba governu sei tau matan?
Hau la hatene buat ida ne'e, ami altura ne'e kontaktu nia maibe Jose Luis Guterres hateten aseita no hakarak simu kargu ida ne'e. Laiha kumprimisiu ida atu selu fali nia kaben ho salariu spesial ne'e. Tanba ne'e maka aseita altura ne'eba, Sr.Jose Ramos Horta hanesan PM, nia aseita no konkorda Sr. Jose Luis nia kaben hanesan funsionariu lokal.

Deklarasaun vise PM hateten ne'e la los?
Deklarasaun ne'e la los, tanba hau hanesan vise premeiru ministru iha altura ne'eba nunka asume kumprimisiu ida para dehan atu hatama ninian kaben hanesan diplomata. Altura ne'e Sr.Jose Ramos Horta hanesan PM, nia koñesimentu katak konfirmadu husi Vise Ministra Magno katak Jose Luis Guterres nia kaben atu servisu iha embaxada Timor iha Nova Yorke hanesan funsionariu lokal. Derepente nia sae ba diplomata, nia salah boot. Salah boot liutan tanba Jose Luis Guterres nudar ministru iha tempu ne'eba tuir lolos hatene katak lei Timor ne'e la premiti ema estranjeiru atu simu kargu diplomata. Portantu iha salan rua ne'ebe nia halo: ida, nia aseita nia kaben servisu sai diplomatika, ida fali aumenta nia kaben nia osan. Depois nia foti desizaun Ambaxador Nelson Santos mos la hatene buat ida. Ikus mai Ambaxador Nelson Santos hatene maka nia buka klarifikasaun husi Vise Ministra Adaljisa Magno.

Wainhira Nelson Santos halo klarifikasaun ba saida maka Adaljisa hateten?
Momentu nia klarifika, hateten katak vise ministra halo despasu para Jose Luis Guterres nia kaben servisu hanesan funsionariu lokal.

Jose Luis mos dehan katak tanba sa maka uluk la levanta agora maka foin levanta?
Tanba altura ne'e Embaxador Nelson Santos kontatu Vise Ministra Adaljisa Magno, haruka hapara kedas no kansela kedas. Iha tempu ne'eba mos Nelson Santos bolu fungsionariu ministeriu negosiu estranjeiru nian hodi husu. Tanba sira halo buat la iha koñesimentu. Signifika katak Jose Luis Guterres altura ne'eba servisu nem konsulta no hato'o ba vice ministra negosiu estranjeiru. Laiha kombinasaun, se nia Ministru tenki halo desizaun no despasu funsionariu sira seluk. Portantu nia halo desizaun unilateral. Adaljisa Magno tanba nia hatene, altura ne'e hau Primeiru Ministru, Adaljisa haruka para kedas pagamentu sira ne'e.

Pagamentu ne'e lao oinsa?
Altura ne'e halo investigasaun, i altura ne'e seidauk denunsia tanba governu ne'e iha rohan tiha, ami mos laiha tempu atu kontinua halo investigasaun. Ne'e duni ami husik hela no hein katak governu agora ne'e halo prosesu ne'e. Hanesan mos informasaun koalia katak Embasador Nelson Santos hato'o relatoriu mai to'o ministeriu negosiu estranjeiru no to'o agora la hola medidas ida.

Wainhira halo tranferensia hosi Ministru Negosiu Estranjeiru Jose Luis Guterres nia Kaben Ana Maria lao durante fulan hira?
Nia hahu iha Novembru 2006 to Marsu ka Abril 2007, altura ne'e Jose Luis Guterres hanesan Ministru Negosiu Estranjeiru. Abril hahu tiha ona kampanha ba elisaun presidensial depois tama kampanha elisaun legislativa haree katak tempu ki'ik demais ona maibe medidas hola nafatin buka hatene tuir nafatin kona ba problema ne'e. Iha tempu ne'eba nia bolu ema administrasaun no finansas nian para hatene tansa maka nia halo buat ne'e. Buat ida grave liutan kuandu ho aumenta ema ida nia osan hola desizaun ne'e, premeiru o tenki anula despasu ida ne'ebe halo tiha ona. Sr. Jose Luis Guterres la anula despasu ida ne'ebe Adaljisa Magno halo para hatama nia kaben hanesan funsionariu lokal, signifika desizaun ne'e abritraria. Nia hola buat ne'ebé benefisia ninian ema no familia deit. Osan ne'e estadu no povu nia, laos gasta osan arbiru deit tenki tuir prosidementu no regras ne'ebe iha.

Tuir deklarasaun Fretilin katak osan ne'e hola grand piano, maibe Jose Luis Guterres dehan ida ne'e laiha relasaun?
Ida ne'e tanba Embasador Nelson bolu Jose Luis Guterres nia kaben ba koalia no husu ba nia, Ana Maria ne'e dehan osan ne'e nia gasta hola saida deit, ne'e maka ami hatene katak osan ne'e nia utiliza para hola grand piano, la interese segunda ka terseiru mao, na realidade katak nia hola grand piano, utiliza osan povu nian, selu nia la tuir prosidementus. Hola grand piano ho osan rasik ne'e la iha problema, se hola grand piano ho osan ne'ebe la los no osan povu nian, ne'e sala boot.

Saida maka atu halao ba iha prosesu ne'e ba oin tanba kazu foti tiha ona?PDHJ kontaktu ona hau para ami hato'o informasaun hodi bele haree kazu ida ne'e. Tanba kazu ida ne'e liga ho fungsionariu publikus, ami kontinua nafatin ijiji ba PM Xanana Gusmão para demiti Jose Luis Guterres tanba nia ema ida ne'ebe laiha integridade, utuliza fundus estadu nian ba benefisiu pesoal. Portantu ida ne'e koerentu, tanba nia hakarak governu ida transparensia, integridade. Pelu menus halo suspesaun ba nia no halo investigasaun, to'o agora desde ami levanta kazu ne'e, iha fulan Fevereiru to agora ami seidauk buat ida. Ne'e hatudu katak laiha esforsu, laiha komitmentu para halo governasaun ne'e ho transparansia.