Matan Wen Horta Akompana Marxa ba Paz

almerio ALVAREZ, zevonia VIEIRA
Hanoin hetan loron 11 Fevereiru (11/F-red), imajinasaun ita nian la ba iha buat seluk. Prezidente da Republika, Jose Ramos Horta hetan tiru no kanek. Alfredo Reinado hamutuk ho ninia membru Leopoldinho mate kedas iha Prezidente da Republika ninia rezidensia.

Dili, 11/F nonok no kalma. Ema hotu hakarak buka tuir informasaun loloos konaba saida mak akontese ona ba Prezidente da Republika, Ramos Horta. Iha loron 11/F, liafuan dame no domin, teki-tekir lakon tiha deit, hanesan we boot husi foho mak lori ba iha tasi.

Akontesementu 11/F, dame, domin, no matan wen ne'ebe mak lakon, derrepente mosu fali espiritu bo'ot ida, oinsa Timor-oan hotu-hotu hamutuk atu kria estabilidade iha rai ida ne'e. "Hau fo hau nia agradese ba partidu Fretilin, tanba durante ne'e Fretilin halo kolaborasaun ida ke diak ho estadu atu kria estabilidade, tenik Prezidente Ramos Horta iha konferensia imprensa ne'ebe mak halao iha Aeroportu Internasional Prezidente Nicolao Lobato Komoro Dili.

Labarik kiik-oan, joven, ferik katuas sira, kaer bandeira RDTL hamrik no nakonu iha dalan-dalan; hahu husi Aeroportu Komoro to'o iha Uma Fukun, Parlamentu Nasional. Antuziasmu komunidade sira hodi simu Prezidente mos bo'ot.

Iha estrada, estudante universitaria, estudante husi eskola pre-primária, pre-Sekundaria, Sekundaria, komunidade, inklui ema estranjeiru, kaer spanduk ho kor oioin, kesi metin iha populasaun sira nia liman. Spanduk balun hakerek nune'e, bem vindo Prezidente da Republika. Spanduk seluk fali hakerek nune'e : "Ami povu Timor-Leste hakarak para Prezidente Ramos Horta asume fali ninia kargu nu'udar Prezidente."

Spanduk hamutuk 20 resin ne'e, bele dehan reprezenta apoiu povu Timor-Leste nian ba Prezidente da Republika atu assume fali ninia kargu nu'udar Xefi do Estado. "Hau nia laran kontenti, tanba Prezidente da Republika bele fila hikas mai Timor-Leste. Povu kiik-kia sira hadomi tebtebes Prezidente Ramos Horta," subliña Anabela Maria (35) ba kla'ak, iha Komoro Dili, wainhira akompaña Laureadu Nobel da Paz 1996 ne'e.

Buat ida ke úniku husi marxa ba paz ne'e mak militar no polisia hamutuk ho forsas estabilizasaun internasional tau siguransa máximu iha fatin hotu-hotu. Hahu husi Aeroporto Komoro tama to'o iha Uma Fukun Parlamento Nasional. "Antes atentadu 11/F, seguransa iha Dili laran metin hanesan ne'e durante oras 24 nia laran karik, ita nia Prezidente, Sr. Ramos Horta la hetan tiru husi Alfredo Reinado ho ninia grupu sira," katak Manuel Sarmento (46) ba kla'ak iha Palacio Governu nia oin, hafoin asiste marxa paz hodi simu Laureadu Nobel da Paz ne'e.

Maske Prezidente Ramos Horta fila hikas ona mai Timor-Leste, maibe iha problema barak ne'ebe sai nu'udar naha todan tula hela iha ninia kabas rasik. "Hau nia preukupasaun liu mak ne'e; iha oras ne'e daudaun iha mundo tomak hahan la iha. Husi Bangladéx to'o Haití, Indonezia, Filipina folin foz sae tebtebes. Sira ne'ebe mak uluk kiak, agora kiak tebtebes," esplika Ramos Horta, iha ninia diskursu iha Uma Fukun, Parlamentu Nasional Kinta-feira 17/04, foin lalais ne'e.
Prezidente da Republika mos foka maka'as, konaba ezistensia Gastão Salsinha ho ninia grupu sira ne'ebe mak durante ne'e sai alvu ba Komando Operasaun Konjunta "HALIBUR; liliu ba Estado Timor-Leste. "Hau husu ba nia (Gastão Salsinha-red) para entrega aan. Besik tinan rua liu tiha ona, nia la kohi rona hau nia liafuan. Lalika rona nafatin ema balun ne'ebe mak ba hatama foer no veneno iha imi nia tilun. Hakarak rona Prezidente Ramos Horta Nobel da Paz ou hakarak rona aventureiru balun ne'ebe hakarak sobu nasaun ne'e," esplika Prezidente da Republika, Ramos Horta nakonu ho sentimentu emosional no matan wen.

Ramos Horta mos husu ba Komando Operasaun Konjunta "HALIBUR" atu la bele oho Salsinha, maibe buka mieus halo nusa para Salsinha bele entrega aan. "Hau halo apelu ba Gastão Salsinha no nia ema sira. Labele dada nafatin nia ema ba mate. Ne'e duni hau husu ba Gastão Salsinha entrega kilat no entrega aan ba iha justisa," apelu Laureadu Nobel da Paz ne'e ba Salsinha ho ninia grupu sira ne'ebe mak to'o agora sei subar hela iha ai-laran.

Kuandu Gastao Salsinha entrega aan ba iha justisa, tribunal rasik bele hatene, se mak haruka Alfredo Reinado ho Salsinha atu halo atentadu iha 11/F ba iha Prezidente da Republika. Ho meius hanesan ne'e duni mak justisa bele lao. "Fatin ne'ebe nia (Gastão Salsinha-red) bele koalia mak ida deit. Tribunal. Laos tanba nia kulpadu ou inosentu. Ita la hatene. Tanba tribunal mak foti desizaun se mak inosentu no se mak kulpadu," afirma Prezidente Ramos Horta.

Prezidente Ramos Horta rekopera fila-fali ona husi kanek todan ne'ebe mak nia hetan wainhira Alfredo Reinado ho ninia grupu sira halo atentadu iha 11/F. Depois atentadu 11/F, Komando Operasaun Konjunta konsege kaer tiha ona autor atentadu, hanesan Susar ne'ebe entrega aan iha loron 2 Marsu. Ema hotu espera katak loron 11/F, la'os deit istoria nakukun ba País ida ne'e. Importante mak justisa tenki implementa halao ho loloos. Mensajen ne'ebe mak populasaun sira hato'o ba Prezidente Ramos Horta iha loron 17 Abril, ne'e mensajen marxa ba paz no justisa. Povu hakarak hatene loloos, se mak hatama "veneno" ba iha Alfredo Reinado no Salsinha atu halo atentadu ba iha Prezidente da Republika no Primeiru Ministru.