Grupu Haksesuk Kla'ak (Discussion Group)

Subscribe ba Kla'ak Online
Email:
Vizita grupu ne'e

01 May 2008

Kazu Jose Luis Guterres Hahu Hosi Ne'ebé?

nuno rodriguez TCHAILORO
Kazu Vise Primeiru Ministru Jose Luis Guterres hahu sai ba publiku iha fulan Fevereiru 2008 bainhira Bankada Fretilin levanta kazu uza osan estadu ba benefisiu pesoal iha plenaria Parlamentu Nasional. Bainhira kazu ne'e foti iha Parlamentu Nasional membru Parlamentu Nasional husu ba Bankada Fretilin atu hatudu faktus no provas.

Iha loron 8 fulan Abril, deputada Ilda Conceicão levanta kazu ne'e iha Parlamentu Nasional. Tuir komunikasaun imprensa ne'ebé Fretilin haruka ba media katak Jose Luis Guterres ne'ebé uluk asumi kargu nudar ministru negosiu estranjeiru transfere osan liu hosi Ministerio Finansas ba nia kaben iha Nova Yorke. Tuir karta ne'ebé Ana Maria, Jose Luis Guterres nia kaben haruka ba Vise Ministra Negosiu Estranjeiru iha tempu ne'eba hateten katak Ministerio Finansas halao transferensia ba nia konta pesoal iha loron 24 de Novembru 2006 hamutuk $ 10,673.33 ba primeiru trimester, $ 8.005 iha loron 11 Janeiru 2006 ba segundu trimester no iha loron 11 Abril hamutuk $ 18.667.14 ba terseiru trimester.

Bainhira Mari Alkatiri rezigna an hosi Primeiru Ministru, Ramos Horta nudar Primeiru Ministru foun husu Ambaxador Timor-Leste iha Estadus Unidus Jose Luis Guterres atu sai nudar ministru negosiu estranjeiru. Jose Luis Guterres simu kargu ne'e no fila mai Timor, maibe nia kaben Ana Maria no nia oan mane Paolo Guterres (21) no oan feto Niara Guterres (16) kontinua hela iha Nova Yorke.

Vise Primeiru Ministru Jose Guterres hateten ba kla'ak katak Ramos Horta rasik mak hateten estadu sei tau matan ba nia familia ne'ebé kontinua hela iha Nova Yorke. Tuir Deputadu Estanislao da Silva ne'ebé uluk mos asumi kargu nudar primeriu ministru hateten ba kla'ak katak estadu tau matan duni hodi kontrata nia nudar funsionariu lokal. Funsionariu lokal iha Nova Yorke fulan-fulan simu $ 2800.

Ana Maria la kontrata nia hanesan funsionariu lokal maibe sai nudar diplomata. Tuir karta ne'e rasik mos Ana Maria hateten katak maski nia hetan pasaporte diplomatiku maibe nia rasik laiha direitu atu sai nudar sidadaun Timor Leste tamba tenki hela minimu tinan 8 iha Timor. Tamba ne'e labele klasifika nia hanesan diplomata ida. Tuir informasaun ne'ebé kla'ak hetan katak ambasador Timor-Leste iha Estadus Unidus Nelson Santos rasik la hatene mudansa hirak ne'e halao. Tansa Ana Maria bele sai diplomata no la kontratu nia hanesan funsionariu lokal?

Provedor Adjunto, Dr. Amândio de Sá Benevides, ne'ebe halao nia knar iha area boa governasaun, ba kla'ak halao entrevista iha edifisiu Provedoria Direitus Humanus e Justisa (PDHJ) iha segunda-feira 14/04 liu ba hateten katak husi PDHJ nia parte akompana informasaun konaba kazu Vise Primeiru Ministru Jose Luis Guterres nian ne'e. "Ami agora buka hela meius hotu-hotu atu bele buka dadus. Rekolla informasaun. Ami identifika ona ba ema sira ne'ebe mak atu ami bele hetan informasaun hirak ne'e. Atu nune'e bele haree posibilidade bele investiga Vise ka labele investiga. Ida ne'e mak agora ami halo hela," esplika Provedor Adjunto.

Lei fo duni autoridade ba PDHJ, atu klarifika duvidas hirak ne'e. Tanba ne'e mak Amândio de Sá Benevides husu ema hotu-hotu ne'ebe mak iha dadus bele aprezenta ba iha PDHJ hodi nune'e, PDHJ bele halo investigasaun klean liu tan ba eiz Ministru Negosiu Estranjeiru Jose Luis Guterres. "Ita hakarak atu hatene, transferensia ne'e iha baze ruma ka lae no tamba saida mak tenki halo transferensia osan hirak ne'e liu husi kontas privada. Iha tempu ne'eba iha duni fiskalizasaun konaba transferensia osan ne'e ka lae," hatutan Amândio de Sá Benevides.

Husi transferensia osan ne'e, Amândio de Sá Benevides esplika liu tan katak la'os atu buka ema ne'ebe mak ema akuza. Maibe problema osan ne'e povu nian. "Karik iha duni iregularidades ne'ebe mosu, ita buka meius hotu-hotu atu bele hadia situasaun ne'e para aban bain rua kazu hanesan ne'e labele akontese tan," subliña Amândio de Sá Benevides.

Kuandu to'o ikus mak iha duni erro katak Jose Luis Guterres ne'ebé uluk asumi kargu nudar Ministru Negosiu Estranjeiru transfere osan liu hosi Ministerio Finansas ba nia kaben iha Nova Yorke, ita bele foti asaun dixiplinar, asaun korrektiva liu husi dalan tribunal, konforme husi rezultadu. "Karik iha tendensia administrativa, tuir lei prosesu penal, iha obrigasaun atu partisipa. Atu fo hatene ba polisia, atu fo hatene Procurador Geral da Republica (PGR)," hateten Amândio de Sá Benevides.

Provedor Adjunto ba iha área boa governasaun ne'e husu ba parte ne'ebe mak halo alegasaun atu entrega dokumentus. "Ami to'o agora seidauk bele bolu vise Primeiru Ministru Jose Luis Guterres, tanba ami tenki haree didiak lai iha duni irregularidade ka lae. Tamba ne'e mak ami presiza halao kontaktu ho ministeriu finansas atu haree liu ba tamba saida mak iha transferensia. Tamba osan hotu-hotu mai husi ministeriu finansas. Depois tenki haree mos iha duni baze legal ruma ka lae," tenik Amândio de Sá Benevides.

Amândio de Sá Benevides hatutan liu tan katak maske ema seidauk hatama keixa ruma maibe tuir lei PDHJ nian katak Provedoria tenki foti inisiativa rasik atu investiga no atu rekolla dadus konaba alegasaun ruma ne'ebe mosu iha publiku nia leet. "Ema ruma, ami deskonfia katak nia halo duni abuzu de poder, ami bele toma inisiativa rasik atu halo investigasaun ba nia," esplika nia.

Akuzasaun ba Vise Primeiru Ministru aktual, Jose Luis Guterres konaba transfere osan liu hosi Ministerio Finansas ba nia kaben, Ana Maria iha Nova Yorke to'o agora sei sai hanesan misteriu ne'ebe mak sei rai iha fatin nakukun ida. PGR rasik mos seidauk hola inisiativa atu halo investigasaun konaba alegasaun ne'e. Maske nune'e membru Parlamentu Nasional husi partidu opozisaun, bankada Fretilin husu ba Primeiru Ministru, Xanana Gusmão atu hasai tiha Jose Luis Guterres husi ninia kargu nu'udar Vice Primeiru Ministru. To'o agora seidauk iha medidas ruma husi Primeiru Ministru. Maske nune'e Vise Primeiru Ministru, Jose Luis Guterres presiza esplika ba publiku alegasaun ne'e los ka lae. Kuandu Vise Primeiru Ministru nonok hela deit, ema bele foti konkluzasaun katak alegasaun ne'e los duni.

No comments: