Fretilin Husu Governu Demite Jose Luis Guterres

nuno rodriguez TCHAILORO, zevonia VIEIRA
Bankada Fretilin iha loron 8 fulan Abril foti fila fali kazu Jose Luis Guterres iha Parlamentu Nasional, iha biban ne'e Fretilin mai ho provas ho evidensia.

"Iha fulan Fevereiru 2008 iha Uma Fukun Parlamentu Nasional, ami Bankada Fretilin aprezenta kazu konaba Sr. Jose Luis Guterres bainhira nia kaer kargu Ministru Negosiu Estranjeiru, momentu ne'e nia fo autorizasaun ba finansas halo transferensia salariu ida ke aas tebtebe ba nia kaben ne'ebé halo knaar iha Embaxada Timor Leste iha Nova Yorke, Bankada Fretilin konsidera kazu ne'e grave tamba ami haree involve abuzu de poder, korupsaun no nepotismu," Ilda hateten.

Bankada Fretilin hatoo nia deklarasaun hodi fo sai karta ne'ebé Ana Maria, Jose Luis Guterres nia kaben hakerek mai Vise Ministra Adaljisa Magno. Tuir karta ne'e hateten katak Ministerio Finansas halao transferensia ba nia konta pesoal iha loron 24 de Novembru 2006 hamutuk $ 10,673.33 ba primeiru trimester, $ 8.005 iha loron 11 Janeiru 2006 ba segundu trimester no iha loron 11 Abril hamutuk $ 18.667.14 ba terseiru trimester.

Tuir Vise Primeiru Ministru Jose Luis Guterres hateten katak bainhira nia simu kargu nudar ministru negosiu estranjeiru Ramos Horta rasik koalia ba nia atu lalika preokupa nia familia iha Nova Yorke tamba estadu sei tau matan. Deputadu Parlamentu Nasional hosi Bankada Fretilin Estanislao hateten: "Laiha kumprimisiu ida atu selu fali nia kaben ho salariu spesial ne'e. Tanba ne'e maka aseita altura ne'eba, Sr.Jose Ramos Horta hanesan PM, nia aseita no konkorda Sr. Jose Luis nia kaben hanesan funsionariu lokal.'Lei funsionalismu publiku nian hateten katak ema estranjeiru labele sai diplomata. Iha Ana Maria nia karta ne'e hateten katak maski nia hetan pasaporte diplomatiku maibe nia rasik laiha direitu atu sai nudar sidadaun Timor Leste tamba tenki hela minimu tinan 8 iha Timor. Tamba ne'e labele klasifika nia hanesan diplomata ida. Maski nune'e bainhira kla'ak konfirma ho Jose Luis Guterres iha nia servisu fatin hateten katak iha fatin barak ema estranjeiru halo funsaun diplomatiku hanesan uluk iha Geneva no Eric Hotung iha Asia.

Deputadu Parlamentu Nasional hosi Bankada Fretilin Estanislao da Silva hateten: "Ida, nia aseita nia kaben servisu sai diplomatika, ida fali aumenta nia kaben nia osan." Jose Luis Guterres hateten ba kla'ak katak buat hotu-hotu liu hosi prosidementu formal no la los buat ne'ebé levanta iha Parlamentu Nasional.

Estanislao hateten katak liutiha Jose Luis Guterres foti desizaun hodi foti Ana Maria nudar diplomata no hasae nia salariu Ambasador iha Estadus Unidus Nelson Santos rasik la hatene desizaun tamba ne'e nia buka klarifikasaun hosi Vise Ministru Negosiu Estranjeiru Adaljisa Magno. Bainhira Adaljisa Magno hatene kestaun ne'e nia diretamentu hapara pagamentu.

"Sr Jose Luis Guterres, nudar Ministru Negosiu Estranjeiru hatene katak nia kaben, nudar ema estranjeiru, labele hetan estatutu nudar diplomata iha Embaxada Timor-Leste nian iha Nova Yorke. Tamba sa nia foti desizaun ida ne'e? Ne'e laos kazu abuzu de poder, korupsaun no nepotismu," Ilda hateten iha konferensia imprensa ne'ebé kla'ak simu.

Tuir Estanislao katak osan hirak ne'e rasik mak uza hodi hola grand piano. Bainhira Vise Primeiru Ministru Jose Luis Guterres ba tuir konferensia iha Australia konaba boa governansia iha fulan Fevereiru, tuir radio ABC katak Jose Luis Guterres hateten nia laos ema riku no se nia la hetan servisu ba nia kaben ho salariu ne'ebé hanesan nia simu, nia ho nia oan sira sei uma laiha. Jose Luis Guterres mos kestiona tamba sa mak Fretilin hein too agora mak levanta problema ne'ebé akontese iha tempu governu uluk nian.

Iha nia intervista iha Radio ABC, Jose Luis Guterres hateten: "ida ne'e nudar solusaun temporariu, tempu ne'eba tempu krize hau tenki fila mai Timor atu servi nasaun, tamba ne'e nudar solusaun iha tempu ne'eba."

"Ida ne'e asuntu ne'ebé seriu tebes tanba kazu tranferensia osan husi fundu publiku. Fundu publiku ne'e osan estadu nian absolatamente povu nia osan", dehan Estanislao da Silva.

Deputadu CNRT Aderito Hugo hateten: "Povu iha direitu atu hatene prosesu ne'e oinsa. Ida fali maka ne'e buat ne'e los ka los tenki ba instituisaun ne'ebe kompotente para atu prosesa, se la prosesa maka ita maka hanesan ne'e deit ona."Estanislao hateten katak Fretilin sei kontinua husu ba Primeiru Ministru Xanana Gusmão atu demite Jose Luis Guterres hosi governu.